483
Мүнөөдэр, августын 21-дэ, Буряад Уласта алан һүрдэгшэдтэ эсэргүүсэһэн комисси болон оперативна штабай түлөөлэгшэд суг хамта суглаанда хабаадаба.
2018 ондо Буряад Уласай бюджетһээ 43,6 сая түхэриг һомологдожо, һургуулинуудые алан һүрдэгшэдһөө хамгаалха талаар асуудалнуудаар суглаанда зүбшэбэ. Һомологдоһон мүнгөөр һургуулинууд адаглалгын системэ, түймэр гараһан тухай дуулгаха, дохёо, хэрэгсэлнүүдээр хангагдаха, үүдэн, гэшхүүрнүүд һэлгэгдэхэ.
Һургуули бүхэндэ вахтёртой болохо хэрэгтэ 90,6 сая түхэриг һомологдоо. Байгша оной январиин 19-дэ Улаан-Үдэ хотын 5-дахи һургуулиин 9-дэхи ангиин һурагша һүхэ барин, 7-дохи ангиин үхибүүд болон ород хэлэнэй багшада добтолон орожо, ехэ гэнэ усал болоо һэн. Энэ аюулта ушарай удаа Буряад Уласай Засагай газарта бүхы һургуулинууд харууһалагдаха ёһотой гэһэн шиидхэбэри абтаа.
- Августын 31-һээ уласай бүхы һургуулинуудта вахтернууд хүдэлжэ эхилхэ, - гэжэ Буряад Уласай болбосоролой болон эрдэм ухаанай сайдай орлогшо Валерий Поздняков суглаанда хэлэбэ.
Энээнһээ урид 2018-2019 һуралсалай жэлдэ зорюулагдаһан суглаан июлиин 19-дэ үнгэгэгдэһэн байна. Буряад Уласай Толгойлогшо Алексей Цыденов эдэ хүдэлмэрилэгшэдые ажалда абаха эрилтэнүүд баталагдаа гү гэжэ асууба. Тэрэшэлэн эдэ зон ажалай тусхай эрилтэнүүдтэ таараха ёһотой гэжэ тэмдэглээ.
Буряад Уласай болбосоролой болон эрдэм ухаанай яаманай түлөөлэгшэдэй хэлэһээр, байгша оной апрель һарада эрилтэнүүд баталагдаа гэжэ хэлэбэ.
Сентябриин 1-һээ бүхы һургуулинуудта психологууд хүдэлжэ эхилхэ. Тиихэдэ 500 һурагшада нэгэ мэргэжэлтэн байха ёһотой. Зунай сагта 118 мэргэжэлтэдые ажалда абаха салин байгуулагдаа.
Мүнөөдэрэй байдалаар, Буряад уласай 462 һургуули, 373 хүүгэдэй сээсрлиг, дунда мэргэжэлэй 2 эмхи, нэмэлтэ һуралсалай 96 түбтэ түймэрэй гараһан тухай дуулгаха дохёо, гэрэлтүүлгэ хэгдээ.
Адаглаха системээр уласай 267 һургуули хангагдаа. Энэнь бүхы һургуулинуудай 50,7 хубинь болоно. Бабанта, Бэшүүр, Зэдэ, Загарай, Захаамин, Хэжэнгэ, Хяагта, Сэлэнгэ, Байгал шадарай аймагта энэ талаар байдал шахардуу. Тиихэдэ бүхы интернат-һургуулинуудта адаглаха системэ тохогдонхой.
Анна Огороднигой гэрэл зураг
