Августын 15-да Мүнгэ хүрэнгэжүүлгын байдал һайжаруулха талаар Буряад Уласай Толгойлогшын дэргэдэхи зүблэлэй зүблөөн үнгэргэгдөө юм. Эндэ Холын хараата үүсхэлнүүдэй агентствын (АСИ) юрэнхы захирал Светлана Чупшева хабаадаһан байна.
2017 оной дүнгүүдээр Буряад орон нютагай олзын хэрэг эрхилэгшэдэй сэгнэлтээр Холын хараата түсэбүүдэй агентствын рейтингын мүнгэ хүрэнгэжүүлгын байдалай эгсэ һайжаржа байһан гүрэнэймнай эрхим 5 можо нютагуудай тоодо оронхой. Уласта барилгада зүбшөөл абаха, оньһото түхеэрэлгэнүүдтэ холбогдохо, зөөри ба эмхи гүрэнэй бүридхэлдэ абаха болзор, ябадалыньшье бага болоо. Мүн тиихэдэ Буряадай ажаүйлэдбэриин болон эдэй засагай яамануудай бага олзын хэрэг эрхилэлгые дэмжэлгын хэмжээнүүдтэ, хүгжөөлгын байгуулгануудай ажалда олзын хэрэг эрхилэгшэд һайн сэгнэлтэ үгэһэн байна.
Уласай Толгойлогшо Алексей Цыденовэй тэмдэглэһээр, мүнгэ хүрэнгэжүүлгын байдал һайжаруулга хадаа Буряадай Засагай газарай гол зорилгонуудай нэгэн болоно. Холын хараата үүсхэлнүүдэй агентствын рейтинг можо нютагтахи байдал харуулна, засаг зургаанай олзын хэрэг эрхилэлгые хүгжөөхэ болон олошоруулха эрхэ байдал тогтоолгодо шэглүүлэгдэһэн хэмжээнүүдтэ сэгнэлтэ үгэнэ. Гэбэшье Буряад Уласай Засагай газар рейтингын түлөө оролдоно бэшэ.
– Манай гол зорилго - улас дотор ажабайдал һайжаруулха. Тиигэхын тула үйлэдбэри хүгжөөхэ, эдэй засагай эдэбхи дээшэлүүлхэ хэрэгтэй. Энэ талаар ямар эрхэ байдал тогтоохоб, яагаад тогтоохоб – эдэ бүгэдэ асуудалнууд дээрэ Холын хараата үүсхэлнүүдэй агентствэтэй суг хамта хүдэлнэбди. Рейтинг гээшэ сэгнэлтэ ха юм даа. Тиимэһээ бидэ мүнгэ хүрэнгэжүүлгын эрхэ байдалаар нэн түрүүн эрхим хорин можо нютагуудай тоодо орожо абаад, һүүлдэ арбан соошье орохо хүсэлтэйбди, - гэжэ Буряадай Толгойлогшо хэлээ.
Светлана Чупшевагай тэмдэглэһээр, улас олзын хэрэг эрхилэгшэдтэй хүдэлмэриин талаар холбоо саашадаашье хүгжэхэ ёһотой. Тэрэшэлэн олзын хэрэг эрхилэлгэ хүгжөөлгын байгуулгануудые һайжаруулха, интернет-портал зохёохо шухала. Гадна Буряадай олзын хэрэг эрхилэгшэд харгынуудай, мэдээсэл дамжуулдаг оньһонуудай шанар дээшэлүүлхэ тухай тэмдэглээ. Үшөө нэгэ шухала асуудал - бага олзын хэрэг эрхилэлгые дэмжэлгэ.
– Уласта мүнгэн зөөреэр дэмжэлгын хэмжээнүүд, зүбшэл заабариин болон һургалгын хангамжанууд һанаһанда хүрэнэгүй, - гэжэ Светлана Чупшева онсолоо.
Холын хараата үүсхэлнүүдэй агентствэ бусад можо нютагуудай ашаг үрэтэй ниигэмэй-эдэй засагай дүй дүршэлнүүдые Буряадта нэбтэрүүлхэ хүсэлтэй. Намартаа хэдэн можо нютагуудта, тэрэ тоодо манай уласта Ородой Холбоото Уласай Юрэнхылэгшын майн зарлигуудта шэглүүлэгдэһэн, эдэй засагай хүгжэлтын, болбосоролой болон соёлой һалбаринуудта хабаатай, харгын шанар һайжаруулгын, мүн федеральна засагай газарай табиһан бусадшье зорилгонуудаар гүйсэд шиидхэбэринүүдые дурадхаха.
– Буряад орон тус шиидхэбэринүүдые ашаглажа, жэлэй туршада һайн дүнгүүдые туйлаха аргатай. Холын хараата үүсхэлнүүдэй агентствэ онол аргануудай, эмхидхэлэй талаар туһалжа байха. Эдэй засагай, ажаүйлэдбэриин болон бусад яамануудтай суг хамта уласта удха шанартай шэглэлнүүдые шэлэжэ абахабди, - гэжэ агентствын юрэнхы захирал хэлээ.
Светлана Чупшевагай тэмдэглэһээр, аяншалгын һалбари шухалада тоологдоно. Холын хараата үүсхэлнүүдэй агентствэ аяншалгые бодото дээрээ хүгжөөхэ, олзо оршотой болгохо аргатай уласхоорондыншье, гүрэнэйшье түсэлнүүдтэй юм.
Зүблөөнэй урда үдэрынь агентствын юрэнхы захирал Кабанска аймагай Танхой һууринда Байгалай дархан газарай уулзалгануудай түбтэ аймагай түлөөлэгшэдтэй уулзажа, аяншалга хүгжөөлгын шиидхэгдээгүй асуудалнуудые зүбшэн хэлсэһэн байна. Гадна хэдэн стартап болон шэнэ зүйл нэбтэрүүлгын түсэлнүүдтэй танилсаа юм.
– Аяншалгын табан стартап шэлэжэ абаабди. Эдэ түсэлнүүдтэ дэмжэлгын элдэб янзын хэмжээнүүд хэрэгтэй: мүнгэ зөөри хабаадуулга, хүгжөөлгын программанууд, гүрэнэй компанинуудай захилда хабаадалга... Ехэ һонин түсэлнүүд байна, - гэжэ Светлана Чупшева хэлээ.
Холын хараата үүсхэлнүүдэй агетствын юрэнхы захирал Буряад орон ерэхэдээ, үндэр оньһото үйлэдбэринүүдтэ хүдэлдэг олзын хэрэг эрхилэгшэдтэй уулзаа, “Буряад Уласта аяншалга болон байгаали хамгаалга” гэһэн асуудалаар зүбшэн хэлсэлгэдэ хабаадаа гэжэ һануулая.
“Буряад үнэн” мэдээсэлэй албан