652
Буряад Уласай Толгойлогшо Алексей Цыденовэй хүтэлбэри доро өөһэдөө газар эзэлжэ, гэрнүүдые бариһан ушарнуудаар суглаан үнгэргэгдэбэ. Уласай хүтэлбэрилэгшын хэлэһэнэй ёһоор, гэрнүүдые дансатай болгохо талаар ажал үргэлжэлүүлэгдэхэ, тиихэдээ ушар бүхэн һайса шүүмжэлэгдэхэ. Саашадаа иимэ ажал ябуулагшадые засагай газар дэмжэхэгүй.
Жэлэй туршада Буряад уласта Солдатский, Площадка, Матросова, Левый Берег, Южный, Бабушкинай гудамжада оршодог 2,3 мянган газар хуулиин ёһоор дансатай болоо.
«Буряад Уласай Засагай газар, Улаан-Үдэ хотын захиргаан болон Арадай Хуралда абтаһан шиидхэбэринүүдээр гүрэнэй болон нютагай засагай байгууламжын мэдэлдэ байһан газарнуудые түлбэригүйгөөр эрхэтэдтэ үгэхэ тухай хуулида хубилалтанууд оруулагдаа», - гэжэ Буряад Уласай Зөөриин болон газарай харилсаанай сайдай нэгэдэхи орлогшо Марина Коротич хэлэбэ.
Буряад Уласай Толгойлогшын дурадхалаар, 2010 оной декабриин 31 болотор баригдаһан гэрнүүд, эзэлэгдэһэн газарнуудые дансатай болгохо тухай хубилалтанууд уласай хуулида оруулагдаа гэжэ һануулнабди.
«Энэ хугасаада хуби ниилүүлһэн нээмэл «Бурятнефтепродукт», «Улан-Удэнская птицефабрика» бүлгэмүүдэй санитарна-хамгаалгын газар элирүүлэгдээ. Түмэр харгыһаа 0-50 метрэй зайдо оршодог газарнуудые эзэлхэ тухай Зүүн Сибириин түмэр харгытай хэлсэгдээ. Зайн галай һужаануудай харууһалалгын газарта баригдаһан гэрнүүдые дансатай болгохо тухай «МРСК Сибири» - «Бурятэнерго» бүлгэмэй таһагтай хэлсээбди», - гэжэ Марина Коротич тоособо.
Уулзалгын үедэ түлбэригүй газарнуудые үгэдэг гуримда хубилалтануудые оруулха тухай олониитын түлөөлэгшэд үүсхэл гаргаһан байна. Эзэлһэн газараа хуули ёһоной болгохо талаар дансануудай бүридэл үргэдхэхэ тухай тэдэнэр хэлэбэ. Жэшээлбэл, зайн галай һужаада хабсаргагдаһан тухай, зайн галай түлөө түлбэри, сэрэгэй дансанууд гэхэ мэтые оруулжа болохо. Гэрэй ном, газарай татабари түлэһэн тухай саарһан, ажаһуудаг газарта бүридхэлдэ абтаһан тухай болон бусад – эдэ нэгэнэй байбалнь, эзэлһэн газараа дансатай болгохо аргатай.
«Южный, «Таежный», «Горный», «Патриот». «Хвойное», «Ургаса», «Орбита» микрорайонуудай эдэбхитэд эзэлһэн газараа, бариһан гэрээ дансатай болгохо талаар ушардаг бэрхэшээлнүүд, тэдэниие яажа шиидхэхэб гэжэ Буряад Уласай Толгойлогшодо хэлэбэ.
Южный һууринда ажаһуудаг эхэнэрэй хэлэһэнэй ёһоор, уһанда абтажа болохо гэһэн газарай хорюул болюулха тухай дурадхаба. Юундэб гэхэдэ, уһанда абтажа болохо хорюулһаа шэнэ гэрнүүдые бариха аргагүй. Южный һууринай ажаһуугшадай болон үйлэдбэринүүдэй хүсөөр уһанда хаалта баригдаа.
Алексей Цыденов уһанда абтажа болохые, уһанай хаалта сэгнэхэ тухай Байгаалиин нөөсын яаманда даалгаба.
Анна Огороднигой гэрэл зураг
