679
«Аюулгүй, һайн шанартай харгынууд» гэһэн юрэнхылэгшын түсэлдэ Улаан-Үдын болон хото шадархи аймагуудай харгы заһабарилга 2025 он болотор оруулагданхай гэжэ Буряад Уласай Толгойлогшо Алексей Цыденов Загарай аймагта хүүргэ нээлгын ёһололдо хэлэбэ.
Загарай һууринай Брянка гол дээгүүр гараха 53 метр утатай хүүргэ 2015 ондо үмхиржэ, аюултай болоо гэжэ тобшологдоо. 1986 он болотор модоор баригдаад байһан хүүргэ, бетоноор шэнэлэгдээ. 2017 оной ноябрь һарада энэ хүүргэдэ заһабарилгын ажал эхилжэ, хэгдэхэ болзорһоо урид ашаглалгада тушаагдаба. Хүүргэ барилгада 29,64 сая түхэриг һомологдоо.
Болзорһоо дүрбэн һара урид ажалаа дүүргэһэн барилгашадта уласай хүтэлбэрилэгшэ баяраа мэдүүлбэ.
Буряад Уласай Толгойлогшо Загарайн ажаһуугшадые амаршалжа, «Аюулгүй, һайн шанартай харгынууд» гэһэн түсэлөөр Буряад уласта харгынууд үшөө 7 жэлэй туршада заһабарилагдаха гэжэ тэмдэглэбэ.
- «Аюулгүй, һайн шанартай харгынууд» гэһэн юрэнхылэгшын түсэлдэ батаар оронобди. Үнгэрһэн жэлдэ энэ түсэлдэ туршалгын можо гээд оруулагдаһан байгаабди. Хэхэ ажалаа болзор соонь һайн шанартайгаар дүүргэһэнэй ашаар, 2015 он болотор юрэнхылэгшын түсэлдэ хабаадахабди, - гэжэ уласай хүтэлбэрилэгшэ хэлэбэ.
«Аюулгүй, һайн шанартай харгынууд» гэһэн федеральна түсэл 2017 онһоо 2025 он болотор бэелүүлэгдэхэ. Буряад Уласта харгы заһабарилгада бүхыдөө 11,25 миллиард һомологдохоор түсэблэгдэнэ. Тиихэдэ жэл бүри 1,25 сая түхэриг гаргашалагдаха, федеральна бюджетһээ - 625 сая түхэриг, уласай бюджетһээ нүгөө хахадынь һомологдохо юм.
2017 ондо Улаан-Үдэ болон хото шадархи аймагуудта 56,3 модоной зайда харгынууд заһабарилагдаа. 2025 он болотор эндэ харгы 97 хубинь заһабарилагдаха гэжэ түсэблэгдэнэ.
Буряад Уласай Засагай газарай хэблэлэй албанай гэрэл зураг
