Августын 24-26-ай үдэрнүүдтэ Буряад Уласай хүдөө ажахын болон эдеэ хоолой яаман Улаан-Үдэ хотын захиргаантай суг хамта хүдөө ажахын эдеэ хоолой яармаг заншалта ёһоороо үнгэргэхэнь.
Намарай сагта үнгэрдэг энэ яармаг манай эндэ хүдөөгэй эдеэ ургуулдаг ажахынуудай, үмсын зоной бүхэли зунһаа хэһэн ажалайнь түрүүшын дүн харуулдаг гээшэ. Үшөө хүйтэн болоодүй сагта огородой элдэб ургаса, эдеэнэй һонин зүйлнүүд дурадхагдажа, һолонго мэтэ үнгэтэ хүдөө ажахын ёһотойл һайндэр хүн зониие хүлеэхэ. Эндэ томо хүдөө ажахынхидай хажуугаар ТОС-ууд, зуһаландаа ажалладаг юрын зоной элдэб эдеэ хоол дурадхагдаха. Яармаг Улаан-Үдэ хотын хэдэн дэлгүүрэй талмайнуудта болохо юм.