Хүн түрэлтэн энэ орёо асуудалда харюу бэдэрһээр үнинэй. Илангаяа мүнөөнэй үрдилдөөтэ, зүрилдөөтэ, сахилгаан мэтээр хурдалһан, элдэб эреэн мэдээсэлэй элбэг сагта зүб хүмүүжүүлхэ, зүб һургаха гээшэ шухала болонхой. Ондоо дэлхэй үгы хадаа, хүн бүхэн сэдьхэлээрээшье, үзэл бодолоороошье, бэлиг шадабаряараашье олониитэһээ таһарангүй, ямар хэмэршье байг, өөрынгөө һуури оложо, жаргал эдлэхэ ёһотой. Тус асуудал дээрэ ганса багшанарай толгой үбдэхэ бэшэ, харин булта эбээрээ хэлсэжэ, мүнөөнэй болбосорол, һургуули һудар хубилгаха хэрэгтэй...
Үнгэрһэн долоон хоногто Буряад орондомнай Байгалай болбосоролой VII уласхоорондын хуралдаан эмхидхэгдээ. Сэдэбынь – “Болбосоролой шанар: олониитэтэй хөөрэлдөөн”. Хэмжээ ябуулгада федеральна ноёд һайд, гүрэнэймнай 47 можо нютагуудай, мүн хари гүрэнүүдэй түлөөлэгшэд хабаадаа. Августын 15-да Улаан-Үдэ хотодо Пленарна зүблөөн болоһон байна.
Муу нүлөөтэй мэдээсэлһээ хүүгэдые холодуулха шухала
Ородой Холбоото Уласай Юрэнхылэгшын дэргэдэхи үхибүүнэй эрхэнүүдэй талаар бүрин этигэмжэтэ Анна Кузнецовагай онсолһоор, хүүгэдэй оршон тойронхидо, тэрэ тоодо сэнхир дэлгэсээр юу харуулнаб, сүлжээ холбоондо ямар мэдээсэл табинаб – ехэ харюусалгатайгаар хандаха шухала. Хэнэйшье мэдэһээр, үнгэрһэн һуралсалай жэлдэ гүрэнэймнай хэдэн можо нютагуудта, мүн Буряадташье болбосоролой эмхинүүдтэ аюулта ушарнууд дайралдаа. Болбосоролой байгуулгада хэр зүб зорилгонууд табигдана гээшэб? Юундэ һурагшад сасуутандаа болон багшанартаа шэрүүнээр ханданаб, добтолноб? Эдэ бүгэдые һайса шэнжэлхэ, шалтагаануудыень элирүүлхэ, саг үргэлжэ шалгаха хэрэгтэй. Мүнөө энэ талаар абтаха хэдэн хэмжээнүүд Ородой Холбоото Уласай Засагай газарта дурадхагдаа. Буряадай сэгнэн шэнжэгшэд, мэргэжэлтэд тус ажалда баһа хабаадалсаа юм.
Үхибүүдые далай мэтэ мэдээсэлэй оршон соо төөришэнгүй, муу һайнииень шүүбэрилэн, тон хэрэгтэйень лэ түүбэрилэн хэрэглэжэ һургаха шухала. Энэ талаар багша, һургуули хүүгэдэй замайнь залуур болохо зэргэтэй.
“Бидэ хорюул, хизаарлалта тухай бэшэ, харин дүримүүд тухай хэлэнэбди. Светофорой ногоон нюдэнэй носоходо, харгы хүндэлэн гарадаг гэжэ булта мэдэнэбди. Хэншье энээниие хизаарлалта гэжэ тоолоногүй. Тус дүрим эбдэбэл, ами наһанда аюултай гэжэ ойлгонобди. Тэрээн шэнги дүримүүд хаанашье, тэрэ тоодо мэдээсэлэй оршондошье байха ёһотой”, - гэжэ Үхибүүнэй эрхэнүүдэй талаар бүрин этигэмжэтэ хэлээ.
Ганса 100 баллай хойноһоо ухаа мэдээгээ алдаһанай хэрэг бии гү?
Анна Кузнецова һургуулинуудта гэр бүлын жаргалай хэшээлнүүдые нэбтэрүүлхэ болон хүгжөөхэ талаар ажал ябуулжа байһанайнь түлөө гэгээрэлэй яаманда ба болбосоролой академидэ баярые хүргөө. Мүнөө ЕГЭ-дээ 100 балл абажа шадаха, ерээдүйдэ бэрхэ, харюусалга ехэтэй мэргэжэлтэниие бэлдэхэ эрилтэ табигдаашье һаа, эрдэм мэдэсэеэ, шадабарияа, арга боломжонуудаа аша үрэтэйгөөр хэрэглэжэ, ажабайдалаа зүбөөр зохёожо шадаха жаргалтай хүниие хүмүүжүүлхэ гэһэн зорилго шухала болонхой. Эндэ һургуулиин, багшын үүргэ тон ехэ.
Гэбэшье Болбосоролой болон эрдэм ухаанай талаар хиналгын федеральна албанай хүтэлбэрилэгшэ Сергей Кравцовой тэмдэглэһээр, ганса һургуули энээниие абараажа шадахагүй. Бүхы байгаа шиидхэгдээгүй асуудалнуудые олониитэ зонтой зүбшэн хэлсэхэ хэрэгтэй. Тиигэжэ олониитэдэ сэнтэйдэ тоологдодог гэр бүлын, шажан мүргэлэй, һэшхэлэй, зан заншалай шухала ойлгосонууд һуралсалай ябасатай холбогдохо ёһотой.
Болбосоролой байгуулга хадаа нэн түрүүн хүүгэдэй арга боломжонуудаа бэелүүлгэдэ туһалха үүргэтэй гээшэ ааб даа. Үхибүүн бүхэн ондо ондоо. Тиимэһээ һурагша бүхэнэй, тэрэ тоодо бэлигтэйшье, эрэмдэгтэйшье хүүгэдэй арга боломжонуудые, онсо шэнжэнүүдые бүри нягтаар хараадаа абажа, болбосоролой байгуулгые бултандань тааруу болгохо шухала гэжэ федеральна албанай хүтэлбэрилэгшэ тоолоно.
Москвадашье, Улаан-Үдэдэшье һура – адли байха ёһотой
“Мүнөөнэй болбосоролой байгуулгада, үрэ дүнгүүдтэнь сэгнэлтэ үгэхэдөө, тус һалбари һүүлэй хэдэн арбан жэлнүүдэй туршада тусгаар хүгжөө гэжэ хэлэхэ хэрэгтэй. Тиимэһээ можо бүхэнэй болбосоролой байгуулга өөрын онсо шэнжэнүүдтэй, - гэжэ федеральна болбосоролой сайдай орлогшо Татьяна Синюгина хэлээ. – Һаяын сагта шиидхэхэ зорилгомнай – ажаһуудаг болон һурадаг газарһаа дулдыдангүй, үхибүүдэйнгээ адли тэгшэ арга боломжонуудтай байхын тула ниитэ нэгэн болбосоролой дэбисхэр байгуулха”.
Тиимэһээ һаяын зургаан жэлэй туршада “Ородой Холбоото Уласта болбосорол хүгжөөлгэ” гэһэн гүрэнэй программа бэелүүлхэдээ, мүнөөнэй байдалда зүбөөр сэгнэлтэ үгэжэ, болбосоролой һалбарида һайн хубилалтануудые асарха түсэлнүүдые хараалха хэрэгтэй. Түбхын түрүүндэ багшанарай мэргэжэл дээшэлүүлхэ, һургалгын болон хүмүүжүүлгын шэнэ аргануудые нэбтэрүүлэн, болбосоролой шанар сэгнэлгын гурим һайжаруулха шухала.
Зүгөөр “Эврика” гэһэн болбосоролой бодолгын шиидхэгдээгүй асуудалнуудай дээдэ һургуулиин хүтэлбэрилэгшэ Александр Адамскиин хэлэһээр, хиналта шангадхагдаһаар, харин мүнгэн зөөри дуталдаһаар. Жэшээнь, гүрэн доторхи бүхы һургуулинуудай 60 хубинь хуушаранхай. Хубиин һомололгонуудгүйгөөр байдал заһаруулхын аргагүй. Тиимэһээ бодожо үзэхэ юумэн дүүрэн.
Буряад орон ямар байдалтайб?
Уласай болбосоролой болон эрдэм ухаанай сайд Баяр Жалсанов үнгэрһэн һуралсалай жэлэй дүнгүүд тухай элидхэл хэхэдээ, Юрэнхылэгшэ Владимир Путинай Федеральна Суглаанда хандалга соогоо элирхэйлһэн зорилгонууд яһала бэелүүлэгдэжэ байна гэжэ тэмдэглээ. Гэбэшье бэрхэшээлнүүд олон.
Буряад Уласта мүнөө һуралсалай жэлдэ бүхыдөө һурагшадай тоо 3 мянган 500 хүнөөр олошорхо. Илангаяа Улаан-Үдын болон хото шадархи аймагуудай гурбан халаанда хүдэлдэг һургуулинуудта бүри хүшэр болохо. Нёдондо 4 шэнэ һургуули баригдаһан байна, мүнөө жэл Улаан-Үдын 112-дохи кварталда болон Ивалга аймагай Гүрэльбэ һууринда һургуулинууд баригдаа. Гадна Буряад Уласай Толгойлогшо Алексей Цыденов болон Ородой Холбоото Уласай юрэнхы сайд Дмитрий Медведевэй уулзалгын дүнгүүдээр һургуулинуудай барилгада федеральна бюджедһээ нэмэлтэ мүнгэ һомолхо тухай шиидхэбэри абтаа юм.
79 һургуулиин тамирай танхимуудые заһабарилха хэрэгтэй. Һурагшадые һургуулидань зөөхэ автобусууд дуталдана. Мүнөө жэл уласай болон нютагай бюджедүүдһээ 16 автобус худалдан абахаар хараалагдана. Тиихэ мүртөө хуушарһан 48 автобус һэлгэхэ хэрэгтэй.
Үнгэрһэн жэлэй дүнгүүдээр, багшанарай салингай талаар майн зарлигуудай эрилтэнүүд бэелүүлэгдээ. Зүгөөр бүхыдөө салин түлбэриин тон бага хэмжээн ажамидаралай туйлай хэмжээндэ хүргэгдэжэ, мэргэжэлтэ хүдэлмэрилэгшэдэй салин мэргэжэлтэ бэшэ ажалшадай салинтай тухай барагай болоно. Энэнь багшанарай һанаанда тааранагүй.
Байдал заһаруулхын тула болбосоролой яаман иимэ хэмжээнүүдые дурадхаа:
- нютагай өөһэдын хүтэлбэриин зургаануудта байгша оной сентябриин 1-һээ салин түлбэриин урмашуулгын хубиин 10 процентһээ дээшэ гарадаг һургуулинуудта тус хэмжээень 10 процент хүрэтэр доошолуулжа, алмагдаһан мүнгыень багшанарай салин түлбэри дээшэлүүлгэдэ шэглүүлхые зууршалха;
- 2019 оной январиин 1-һээ багшанарһаа гадуур ажалшадые һургуулиин хүдэлмэрилэгшэдэй тооһоо гаргажа, тэдэнэй салин түлбэриин һомололгые нютагай бюджедтэ даалгаха;
- 2019 оной сентябриин 1-һээ хүдөө нютагуудта хүдэлдэг багшанарай коммунальна хангамжануудые түлэхэ талаар ниигэмэй дэмжэлгын түлбэринүүдые уласай ажаһуугшадые ниигэмэй талаар хамгаалгын яаманда дамжуулха;
- 2019 оной түрүүшын хахад жэлэй туршада нэгэ үхибүүнэй хангалгын хубита хэмжээ тоолон гаргадаг гурим шэнээр хаража үзэхэ.
Һургуулиин наһа гүйсөөгүй хүүгэдэй болбосорол тухай хэлэбэл, илангаяа Улаан-Үдэдэ болон хото шадархи аймагуудта хүүгэдэй сэсэрлигүүд ехээр дуталдадаг гэжэ мэдээжэ. Энэ асуудал шиидхэхэ аргануудай нэгэн хадаа үмсын хүүгэдэй сэсэрлигүүдые хүгжөөлгэ болон дэмжэлгэ болоно. Мүнөө 25 иимэ сэсэрлигүүдтэ 2 477 хүүгэд ябана. Нёдондо үмсын хүүгэдэй сэсэрлигүүдые дэмжэлгэдэ 37 сая гаран түхэриг хараалагдаһан байха юм.
Бүхыдөө болбосоролой һалбарида үнгэрһэн жэлдэ 11 миллиард 400 сая түхэриг гаргашалагдаа. Байгша ондо һомололгын хэмжээн 14 хубяар дээшэлжэ, 13 миллиард түхэригтэ хүрэнхэй. Энэнь уласай бюджедэй дүрбэнэй нэгэ хубинь болоно.
Буряад Уласай Засагай газарай сайтһаа гэрэл зурагууд абтаба