Эрэмдэг бэетэйшүүлэй дунда һур харбалгаар Европын чемпионадта Буряадай тамиршан Сергей Хутаков хоёр алтан медаль абаба. Энэ баяртай ушар үнгэрһэн амаралтын үдэр тохёолдобо.
Чехи гүрэнэй Пильзен хотодо Европын 26 гүрэнэй 130 гаран тамиршад суглараа. Ородой суглуулагдамал командын бүридэлдэ Буряадай хоёр тамиршад оруулагдаа. Александр Дорофеев хэды һайн харбаашье һаа, илагшадай тоодо орожо шадангүй, медальгүй үлөө. Тиихэдэ Сергей Хутаков ялас гэмэ амжалта туйлаба.
Хубиин тоосоондо Сергей Хутаков табадахи һуури эзэлээ. Харин командна тоосоондо илалтануудые туйлаа. Микст тоосоондо Краснодарай Светлана Баранцеватай тэрэ түрүү һуури эзэлхын түлөө Латви, Турци болон Польшо гүрэнүүдэй түлөөлэгшэдые шүүжэ гараа.
Командна тоосоондо Ородой суглуулагдамал команда адли 6:0 гэһэн тоотойгоор Италиин болон Польшын командануудые илажа шадаа. Командна бүридэлдэ манай Сергей Хутаков, Екатеринбург хотын Антон Зяпаев болон Үбэр Байгал аймагай Бато Цыдендоржиев гэгшэд харбажа, алтан медальнуудые абаа.
Хубиин тоосоондо Агаһаа гарбалтай Бато Цыдендоржиев шангай хоёрдохи һуури эзэлээ, финалда Польшын тамиршанда шүүгдэшоо. Мүрысөөнэй дүнгөөр Ородой суглуулагдамал команда 9 медаль абаа. Энэ хоёрдохи дүн болоно. 10 медальтай Италиин тамиршад түрүүлээ.
Һүүлшын шатын харбаан Пильзен хотын түб талмай дээрэ үнгэргэгдэжэ, олон тоото ажаһуугшадые, айлшадые һонирхуулаа.
Эрэмдэг бэетэй тамиршад энэ мүрысөөгөөр 2018-дахи оной зунайнгаа халааниие дүүргэбэ. Харин элүүр энхэ бэетэй харбаашад өөрын Европын чемпионадта бэлэдхэл хэжэ байнхай. Тус мүрысөөн августын 27-һоо сентябриин 2 хүрэтэр үнгэргэгдэхэ юм. Энэ шанга тулалдаануудай урдахана Ородой тамиршад Брест хотодо болоһон уласхоорондын мүрысөөндэ хабаадаһан байна.
Белоруссиин баруун хилын хажууда Буряадай тамиршад һайн дүнгүүдые харуулаа. Хубиин тоосоондо Инна Степанова түрүү һуури эзэлбэ. Гурбадахи һуурида Ородой чемпион Анна Балсукова гараһан байна. Эдиршүүлэй дундахи тэмсээндэ Виктория Харитонова алтан медальда хүртөө. Светлана Гомбоева эндэ хүрэл медаль абаа.
Европын чемпионадай сайтһаа гэрэл зурагууд абтаба