Үсэгэлдэр,августын 22-то, Буряад Уласай Толгойлогшо Алексей Цыденов албанай хэрэгээр Кабанск аймаг гаража, ниигэмэй хангалгын байгууламжын объектнүүдтэ хүрэбэ.
Байгал-Худара нютагта уласай хүтэлбэрилэгшэ больницада хүрэжэ, «Болбосон түхэлтэй хотын оршон байгуулга» программаар баригдаһан «Тополёк» парк нээлгын баяр ёһололдо хабаадаа.
- Ородой Холбоото Уласай Юрэнхылэгшэ Владимир Путинай байгуулһан программа бэелүүлэгдэжэ, парк нээгдэбэ. 2020 он болотор улас дотор олониитын газарнууд болбосон түхэлтэй болгогдохо. Эндэ заһабарилга хэхэ гэжэ таанар өөһэдөө шэлээт, - гэжэ Буряад Уласай Толгойлогшо нээлгын баяр ёһололдо хэлэбэ.
Байгал-Хударын больницада хүрэхэдөө, байгша ондо больницын лабораториин байшан заһабарилха тухай шиидхэбэри абтаа гэжэ уласай хүтэлбэрилэгшэ хэлэбэ. Энэ ажалда 2,6 сая түхэриг хэрэгтэй.
- Энэ байдал саг үргэлжэ шалгагдаха. Байгал-Хударада ажаһуудаг 9 мянган тухай хүндэ эмнэлгын туһа хүргэгдэнэ. Эмнэлгын шэнжэлэл хэхэ гэжэ 17 фельдшерскэ-акушерскэ пунктнуудһаа анализууд асарагдана. Тиимэһээ эндэ лаборатори хэрэгтэй. Һаяын сагта УЗИ хэхэ шэнэ хэрэгсэл асарагдаха. Федеральна программын хэмжээндэ түргэн туһаламжын машинануудые хүлеэнэбди, эдэ машинануудай ерэхэдэ, танай больницада заатагүй үгтэхэ, - гэжэ Алексей Цыденов үгэеэ үгэбэ.
Байгша ондо Байгал-Хударын больница байгуулагдаһаар 90 жэлэйнгээ ойн баяраа угтана. Кабанск аймагай түбэй больницын таһаг болохо Байгал-Хударын больницын нэгэ халаанда 130 хүндэ эмнэлгын туһа хүргэхэ поликлиника болон стационар хүдэлнэ.2017 ондо энэ больница уласай мэдээсэлэй эмнэлгын системэдэ оруулагданхай.
Буряад Уласай Засагай газарай хэблэлэй албанай гэрэл зураг