940
Буряад Уласай Засагай газарай Түрүүлэгшын нэгэдэхи орлогшо Игорь Шутенков Загарай аймагай тамирай эмхинүүдтэ болон Новоильинск һууринай уласай һалбари хоорондын техникумдэ хүрэһэн байна.
Новоильнскын техникумэй һуралсалай мастерскойнууудые заһабарилгада Буряад Уласай бюджетһээ 15 саяһаа дээшэ мүнгэн һомологдоо. Һүүлэй хэдэн жэлнүүдтэ эндэ заһабари хэлгэдэ мүнгэн һомологдоогүй байгаа. Техникумэй мастерскойнуудта һуралсалай танхимууд, лаборатори, эмнэлгын таһаг, автомашинануудые хэрэглэхэ, шудалха таһагууд ажалаа ябуулха. Мүнөө эндэ заһабарилгын ажалнууд түлэг дундаа. Новоильинск һууринай уласай һалбари хоорондын техникумэй захирал Виктор Киреевэй хэлэһээр, 1931 ондо баригдаһан байшанда хэшээлнүүдые үнгэргэхөөр бэшэ болоо. Тиихэдэ энэ техникум уласай хүдөө ажахын һалбарида ехэ удха шанартай юм. Новоильинскын техникумдэ хүдөө ажахын һалбарида хабаатай 6 мэргэжэлээр 300-һаа дээшэ хүн һурадаг.
Сентябриин тэн болотор заһабарилгын ажал дүүрэхэ ёһотой. Тиихэдэ хушалта, шала хушажа дүүргэхэдэ, мүнгэн дуталдана. Буряад Уласай Засагай газарай Түрүүлэгшын нэгэдэхи орлогшо Игорь Шутенковай хэлэһээр, Новоильинскын техникумда туһа үзүүлэгдэхэ.
«Энээнһээ урид үнгэргэгдэһэн худалдаанда алмагдаһан мүнгөөр заһабарилгын ажал үргэлжэлүүлэгдэхэ. Үхибүүд болбосон түхэлтэй оршондо һураха ёһотой», - гэжэ Игорь Шутенков хэлэбэ.
Удаань Буряад Уласай Засагай газарай Түрүүлэгшын нэгэдэхи орлогшо Загарай, Онохой һууринуудай тамирай эмхинүүдтэ хүрэбэ. Буряад Улас дотор Загарай аймаг ажаһуугшадай тоогоор түрүүшүүлэй тоодо оробошье, аймагай хэмжээнэй тамирай стадион үгы юм. 1970-аад онуудай эхеэр баригдаһан стадион Онохой һууринда өөһэдынгөө хүсөөр һэргээнэ. Эндэ гүйхэ харгы хэгдэжэ, хоройлогдоо. Барилгын ажалда 4,5 сая түхэриг һомологдоһон байна.
Аймагай түб Загарай һууринда стадион барилгын түсэблэлгын-гаргаша тоололгын дансанууд бэлдэгдэнэ. Барилгада 30 сая түхэриг хэрэгтэй. Стадион барилгада хайшан гэжэ дэмжэлгэ үзүүлхэб гэжэ удаан хэлсэгдээ. Хүдөөгэй тамирай наадануудай хэмжээндэ тамирай хангалгын байгууламжа бариха арга эгээл таарана гэһэн шиидхэбэри абтаа.
Тиихэдэ Загарай аймагай Онохой һууринда гиирь үргэлгын түб баригдана. Тэрэнэй барилгада 17 саяһаа дээшэ мүнгэн хэрэгтэй.
«Энэ хадаа Алас Дурна зүгтэ орин ганса гиирь үргэлгын түб болоно. Гурбан жэлэй саана түб бариха тухай шиидхэбэри абтаа. Хойто жэлдэ барилга дүүрэхэ гэжэ найданабди. Эндэ үхибүүдшье, томошье зон бэеэ һорихо аргатай болохо», - гэжэ Буряад Уласай Засагай газзарай Түрүүлэгшын орлогшо Игорь Шутенков хэлэбэ.
Анна Огороднигой гэрэл зураг
