890
Буряад Уласай Толгойлогшо Алексей Цыденов нютагай засагай байгууламжануудай хүтэлбэрилэгшэдые дулаагаар хангалгын хаһада бэлэдхэл дүүргэжэ, дулаасуулгын хаһа гэнэ усалгүй үнгэргэхэ тухай уряалба. Шулуун нүүрһэеэ алмаха ушарһаа, дулаанай гурим эбдэгдэхэ ёһогүй гэжэ уласай хүтэлбэрилэгшэ тэмдэглэбэ.
2018-2019 онуудай дууласуулгын хаһада бэлэдхэл дүүрэхэ болонхой. Гэр байрын ажахынуудай, элшэ хүсэнэй болон ниигэмэй удха шанартай эмхинүүдэй дулаасуулгын хаһада бэлэн байһан тухай Буряад Уласай барилгын болон гэр байрын ажахы шэнэдхэлгын яаман октябриин 13 болотор захирамжа бэлддэхэ. Энээн тухай Буряад Уласай барилгын болон гэр байрын ажахы шэнэдхэлгын сайд Николай Рузавин хэлэбэ.
«Хүндэтэ нүхэд, дулаасуулгын хаһа эхилхэ гээшэмнай ехэ шухала ажал гэжэ һануулха хэрэггүй гэжэ һананаб. Дулаасуулгын хаһа эхилээд, шулуун нүүрһэ алмаха гэжэ гэрнүүдтэ хүйтэн байлгаха ёһогүйбди. Ажаһуугшадайнгаа гэрнүүдтэ дулаан байлгаха хэрэгтэй гэжэ уряалнаб», - гэжэ аймагуудай хүтэлбэрилэгшэдтэ Алексей Цыденов хандаба.
Мүнөө сагта Буряад Уласай Бэшүүр, Кабанск, Муя, Түнхэн, Хори, Байгал шадарай аймагуудта шулуун нүүрһэнэй нөөсэ хангаха талаар асуудалнууд шиидхэгдэнэ.
«Дулаасуулгын хаһада бэлэдхэл, түлишэ хаана, хэр зэргэ бэлдэгдээб гэһэн тухай үглөө бүхэндэ тоосохот», - гэжэ Алексей Цыденов Николай Рузавинда хандаба.
Тиихэдэ Буряад уласай зарим тэды эмхинүүдтэ дулаасуулгын хаһада бэлэдхэл хинаха тухай уласай хүтэлбэрилэгшэ тэмдэглэбэ. Тэрэ тоодо Буряад Уласай профсоюзуудай «Байкалкурорт» гэһэн санаторно-курортно эмхидэ.
«Түнхэн аймагта бюджедэй эмхинүүдэй котельнинүүдтэ бэлэдхэл ябуулагдана.«Байкалкурорт» эмхидэ тохёолдоһон байдал хинагдана. Тэндэ мүнөө 90 тонно шулуун нүүрһэн бэлдэгдэнхэй. 500 тонно түлишэ бэлдэхэ тухай хэлсээн баталагданхай, мүнөөдэрһөө түлишэ буулгагдаха. Дулаасуулгын хаһада торолтогүй орохобди», - гэжэ Түнхэн аймагай засаг даргын уялга дүүргэгшэ Вячеслав Цыбикжапов хэлэбэ.
Буряад Уласай барилгын болн гэр байрын ажахы шэнэдхэлгын яаманда нютагай засагай байгууламжануудай дулаагаар хангадаг үйлэдбэринүүдэй түлишэ буулгаха талаар асуудал хинагдана. Тиихэдэ уласай хойто аймагуудта дулаасуулгын хаһада бэлэдхэл онсо хинагдана. Сентябриин 4-дэ хуби ниилүүлһэн нээмэл «СУЭК» бүлгэмһөө түлишэ асарагдаха. Тэрэшэлэн Буряад Уластахи гэр байрын ажахы, барилга хинадаг гүрэнэй албан гэрнүүдэй жаса үбэлэй хаһада хэр зэргэ бэлэн бэ гэһэн нүүдэл шалгалтануудые улас дотор үнгэргэнэ.
Анна Огороднигой гэрэл зураг
