733
Буряад Уласай Толгойлогшо Алексей Цыденов сентябриин 5-да Л.П. Сахьяновагай болон П.Т. Абашеевэй нэрэмжэтэ хатарай колледж болон П.И. Чайковскиин нэрэмжэтэ соёл, урлагай колледждо хүрэбэ.
Худалдай наймаанай-эдэй засагай колледжын байшанай 1-дэхи, 2-дохи дабхарта хатарай колледж зөөжэ ороһон байна.
Буряад Уласай Толгойлогшо хатарай колледжын шэнэ байшанай заһабарилагдаһа танхимуудые хараба. Зунай туршада заһабарилгын ажалнууд эндэ хэгдэһэн байна. Хатарай колледжын зөөлгэн болон заһабарилгын ажалнуудта уласай бюджетһээ 7 сая түхэриг һомологдоо.
- Һаруул, уужам танхимууд, бүхы ханада үлгэгдэһэн гэрэл, хатарай тусхай линолеум, шэнэлэгдэһэн техникэ, хүгжэмэй шэнэ зэбсэгүүд – хэшээлнүүдые үнгэргэхэ тааруу оршон байгуулагдаа. Нёдондонойхидо орходоо, колледжын байдал тад хубилаа. Гансал талмайнь бага болоһон байна. Тиимэһээ саашадаа шэнэ байшан барихаар хараалнабди, - гэжэ Алексей Цыденов тэмдэглэбэ.
Мүнөө хатарай колледждо 142 оюутад һурана, тэрэ тоодо хари гүрэнүүдһээ залуушуул ерэнхэй юм. Колледжын захирал Ирина Хундановагай хэлэһээр, хатарай һургуули гүрэнэй федеральна болбосоролой стандартын эрилтэнүүдтэ таарана.
П.И. Чайковскиин нэрэмжэтэ соёл, урлагай колледжо Ородой Холбоото Уласай Юрэнхылэгшын нөөсын жасаһаа һомологдоһон мүнгөөр худалдан абтаһан хүгжэмэй зэбсэгүүдые Алексей Цыденов хараба. Бүхыдөө хүгжэмэй 9 зэбсэг худалдан абтаһан байна. Нэрлэбэл, виброфон, маримба, литаврнуудай комплект, Петроф P194 Storm рояль, «Юпитер» – Люкс» баян Bugari аккордеон болон бусад.
- Гансашье колледждо бэшэ, харин бүхы уласта удха шанартай үйлэ хэрэг болоһон байна. Хүгжэмэй ударна зэбсэгүүд анхан бидэндэ байгаагүй. Манай оюутад болбосоролой стандартын эрилтэнүүдтэ таараһан мэргэжэлтэй болохо. Һургуули дүүргэгшэд саашадаа бусад можо нютагуудай оюутадтай хамта гүрэнэй консерваторинуудта орожо, һураха аргатай болобо. Тиихэдэ хүүгэдэй соёл урлагай һургуулинуудые дүүргэһэн үхибүүдые һонирхуулжа шадахабди, - гэжэ П.И.Чайковскиин нэрэмжэтэ соёл, урлагай колледжын захирал Баир Турбянов хэлэбэ.
2017 ондо соёл урлагай эдэ һургуулинуудта Ородой Холбоото Уласай Юрэнхылэгшын нөөсын жасаһаа хүгжэмэй зэбсэгүүдые худалдан абаха хэрэгтэ мүнгэн һомологдоһон байна. П.И.Чайковскиин нэрэмжэтэ соёл, урлагай колледждо – 7 сая түхэриг, Л.П. Сахьяновагай болон П.Т. Абашеевэй нэрэмжэтэ колледждо 3 сая түхэриг дамжуулагдаа. Хатарай колледждо һүүлшынхиеэ хүгжэмэй зэбсэгүүд 2003-2004 онуудта шэнэлэгдээ. Энэ хэрэгтэ 1,4 сая түхэриг һомологдоһон байна. Соёл, урлагай колледждо хүгжэмэй зэбсэгүүдые 2013 болон 2015 онуудта шэнэлэгдээ. Тиихэдэ 2013 ондо – 900 мянган түхэриг, 2015 ондо – 680 мянган түхэриг һомологдоһон байна.
Байгша ондо П.И.Чайковскиин нэрэмжэтэ соёл, урлагай колледждо гүрэнэй аккредитацида бэлэдхэл хэхэ гэжэ уласай бюджетһээ 9 сая 279 мянган түхэриг һомологдоо. Энэ мүнгөөр колледждо заһабари хэгдээ.
