Игорь Шпак
Буряад Уласай Толгойлогшо Алексей Цыденов Н.А. Семашкын нэрэмжэтэ клиническэ больницын үндэр технологиин эмнэлгэ олгуулдаг таһагуудай ажал хэрэгтэй танилсаба.
Уласай эмнэлгын гол больницада зүрхэ-һудаһанай, нейрохирургиин, травматологиин, ортопедиин, офтальмологиин, урологиин, гинекологиин, отоларингологой, эндокринологой гээд шэглэлээр үндэр технологи хэрэглэгдэдэг юм. Тиигэжэ жэл бүри иимэ түхэлөөр хэһэн операцинуудай тоо олошорно. Жэшээнь, 2016 ондо 1776 операци хэһэн һаа, 2017 ондо 1857 операци хэһэн байха юм.
Алексей Цыденовэй иимэ арга эрхилдэг таһагуудаар ябажа хараһанайнь удаа клиническэ больницын ахамад врачай уялга дүүргэгшэ, эмнэлгын талаар орлогшо Игорь Шпак үндэр технологиин арга хүгжөөлгын алхамууд тухай мэдээсэбэ.
- Жэлһээ жэлдэ түб хотонуудаар аргада орохо үбшэнтэнэй тоо үсөөрнэ. Ехэнхидээ манай эмнэлгын газарта үндэр технологииин туһаламжа абахаяа һанадаг болонхой. Юундэб гэхэдэ, һүүлэй жэлнүүдтэ операциин удаа үбшэнтэн һайнаар эдэгэдэг болонхой. Ямаршье түб клиникэнүүдһээ дутуугүй арга бүтээхэ шадабаритай болонхойбди, - гэжэ Игорь Шпак хэлэбэ.
Зүрхэ-һудаһанай хирургиин шэглэлэй бүхы операцинуудай 73 хубинь, травматологи, ортопедиин шэглэлээр 55 хубинь, нейрохирургиин 19 хубинь Улаан-Үдэдэ хэгдэдэг. Нейрохирургиин шэглэлээр элдэб үндэр технологиин арга хэгдэдэг боложо, ажалаа үргэдхэхэ түсэб табигданхай. Тиимэ хадань уласай гол клиникын эмшэд гүрэнэй түб эмнэлгын газарнуудта мэргэжэлээ дээшэлүүлнэ.
Семашкын нэрэмжэтэ больницын захирал Буряад Уласай Толгойлогшо Алексей Цыденовтэ хандажа, зүрхэнэй операци хэхын тулада шуһа хэмэл аргаар гүйлгэдэг тусхай түхеэрэлгэ худалдажа абахын түлөө мүнгэнэй хэрэгтэй байһыень мэдүүлбэ. Гэхэ зуура, улас дотор эмнэлгын һалбарида анхарал хандуулагдадагшье һаань, энэ эмнэлгын газарта шэнэ байшануудые барилга ээлжээгээ хүлеэжэ байһыень һануулба.
Тиихэдэ олохон үбшэнтэн операциин аргада орохо ээлжээгээ хүлеэнэ. Байгша оной январиин 1-һээ һүүжэдээ операци хүүлэхэ 45 хүн, үе мүсэдөө – 95 хүн гээд ээлжээндэ табяатай байгаа. 150 хүниие аргалхадань, үшөө 50 хүн ээлжээндэ бэшэгдэнхэй байна. Иимэ үбшэнтэн хоёр жэл шахуу ээлжээгээ хүлеэхэ баатай болоно. Тиимэһээ тэдхэмжэ тон шухала болонхой гэжэ эмшэд мэдүүлээ.
Алексей Цыденовэй хэлэһээр, саашаа хүгжэхэ арга боломжо бии:
- Жэл бүри манай уласта 3500 үбшэнтэн үндэр технологиин ашаар эмнэлгэ гарана, тэдэнэй 1800-иинь энэ больницада аргалуулна. Эмнэлгын арга боломжонууд хүгжэһөөр. Эмнэлгын шанар һайжаруулха, арад зондо түргэнөөр арга олгуулха – манай гол зорилго мүн. Арад зомнай хари газараар аргада орохо бэшэ, эндээл туһаламжа абаха ёһотой бшуу, - гэжэ Алексей Цыденов онсолбо.
Буряад Уласай бүхы эмнэлгын газарнууд шэнэлэгдэхэ, байра байдалаа үргэдхэхэ, һайжаруулха түсэбүүдтэй. Гэхэ зуура, мүнгэн хүрэхэгүй гэжэ байдаг. Мүнөө дээрээ Уласай хабдарта үбшэнэй түб барилгын асуудал шухала болонхой. Гэхэ зуура, Н.А. Семашкын нэрэмжэтэ түб клиникэ баһал өөрын хүгжэлтын хараа бодолнуудтай. Жэшээнь, һудаһанай – зүрхэнэй таһаг нэгэдүүлэнхэй. Эдэ хоёр шэглэлые хоёр тээшэнь таһалжа, аминдань болгобол, баһал зүйтэй байха. 2003 ондо Алас Дурна болон Үбэр Байгалай экономикын ба социальна хүгжэлтын тусхай программада манай Буряад Улас оруулагдажа, уласай клиникын мүнөө амжалтатай ажаллажа байһан 2-дохи, 3-дахи, 4-дэхи хирургиин байшанууд баригдажа, ашаглалда тушаагдаһан юм. Мүн хажуугаархи байшанууд баһал энэ үедэ бодхоогдоод, Буряад Уласаймнай эгээл түб эмнэлгын газар хүгжэжэ, Ородой Холбоото Уласай эмнэлгын эрхимүүдэй тоодо оронхой бшуу. Гэбэшье хирургиин таһагай үбшэнтэнэй хэбтэхэ 300-гаад һууритай байшан саашадаа баригдахал ёһотой.
Гэхэ зуура, үндэр технологиин арга хүгжөөхын хэрэгтэ гээд, мүнгэн эмнэлгын газарнуудаар хубаарилагдажа, бага багаар үгтэхын орондо һайн шанартай арга олгуулха боломжотой нэгэ эмнэлгын газар руу шэглүүлбэл, үрэ дүн ехэтэй байха гэжэ һанагдана. Жэшээнь, Н.А. Семашкын клиническэ больница хадаа ажаллаха һайн бэхи үндэһэтэй, саг үргэлжэ үндэр хэрэгсэлнүүд дээрэ арга бүтээхэ эмшэдэй мэргэжэл дээшэлүүлэгдэжэл, дүй дүршэлтэй эмшэд олошоржол байна ха юм.