Үнгэрһэн долоон хоногто уласхоорондын мүрысөөнүүд эхэнэрнүүдэй дунда Польшо болон Турци гүрэнүүдтэ болоһон байна. Тиихэдэ Ород гүрэнэй эрэшүүлэй суглуулагдамал команда дэлхэй дээрэ суурхаһан Кубын тамиршадтай нүхэсэлэлгын уулзалгануудые үнгэргөө.
Волгоград. Эдэ уулзалгануудта Кубын һоригшод эгээл шанга, урдаа хараха түрүү тамиршадаа асарһан байна. Мүн тиихэдэ Ородойшье талаһаа шамбай хүбүүд гараа. Тэрэ тоодо Буряадаймнай Батор Сагалуев болон Георгий Кушиташвили гэгшэдэй оролсоһониинь һайшаалтай.
Сентябриин 13-да ринг дээрэ Георгий Кушиташвили гаража, 2016 оной Олимпиин наадануудай чемпион Хулио Ла Круста шүүгдэбэ. Хэды тиигэбэшье Ородой суглуулагдамал команда 6:4 гэһэн тоотойгоор илалта туйлаа.
Хоёрдохи үдэртэнь талмайн эзэдэй түлөө ондоо тамиршад шаалдаһан байна. Эгээл түрүүшын уулзалгада Батор Сагалуев амжалта туйлаа. Гурбадахи раундын үедэ Дамиана Арси Дуарте шуһа гаража, уулзалга үргэлжэлүүлхэ аргагүй байшоо. Хоёрдохи уулзалга 5:5 гэһэн тоотойгоор дүүрээ.
- Тус уулзалгада абаһаар лэ добтолхоор рингдэ гарааб. Нэгэдэхи раундын үедэ иимэ буруугаар эхилжэ, шүүгдэшэн алдааб. Харин хоёрдохи шатада мэхэтэйгээр шаалдаха гэһэн һанаамни зүб байшоо. Кубын тамиршаниие энэ саг соо илажа эхилээб. Теэд хэдыдэнь нюдэн дээрэһээнь шуһан гараһыень ойлгоошьегүйб, - гэжэ Батор Сагалуев уулзалгын һүүлдэ олон тоото журналистнуудта мэдүүлбэ.
Ородой түрүү тамиршад мүнөө үедэ Ород гүрэнэй чемпионадта бэлдэжэ байнхай. Тус мүрысөөн Якутск хотодо октябрь соо болохоор хараалагдана.
Гливиц (Польшо). Ноябрь һарада Инди гүрэндэ дэлхэйн чемпионат болохоор хараалагдана. Тус хэмжээ ябуулгада хабаадахаяа бэлдэжэ байһан Ородой тамиршад хоёр уласхоорондын мүрысөөндэ хабаадаба.
Польшодо Буряадай гурбан тамиршан һайн дүн харуулһан байна. 81 килограммһаа үлүү шэгнүүртэй эхэнэрнүүдэй дунда Кристина Ткачева хоёрдохи һуури эзэлээ. Финальна уулзалгада тэрэ Казахстанай түлөөлэгшэдэ шүүгдэбэ.
75 килограмм хүрэтэр шэгнүүртэ Дарима Сандакова гурбан тамиршаниие шүүгээд, түрүү һуурида гараа.
57 килограмм хүрэтэр шэгнүүртэ манай Людмила Воронцова дүрбэ дахин илалта туйлаа. Иигэжэ Буряад нютагаймнай басаган мүрысөөнэй эрхим тамиршан боложо тодороо.
Энэ мүрысөөндэ 21 гүрэнэй түлөөлэгшэд хабаадаа гээд хэлэхэ шухала.
Стамбул (Турци). Ородой суглуулагдамал командын бүлэг тамиршад “Ахмет Джомерт” гэһэн уласхоорондын мүрысөөндэ хабаадаһан байна. Тэрэ тоодо Буряадай Наталья Шадрина оролсоо.
Дүрбэн шанга тулалдаанда илалта туйлаһан Наталья Шадрина 32-дохиёо болоһон мүрысөөнэй чемпионой нэрэ зэргэдэ хүртөө. Буряадай боксёр 60 килограмм хүрэтэр шэгнүүртэ ринг дээрэ гараа.
Бүхы дээрээ Ородой эхэнэрнүүд 8 медаль абаа. Тэрээн соохи оройдоол нэгэ алтан медальда “Номто” гэһэн спортын клубай түлөөлэгшэ хүртэжэ шадаа.
Буряад Уласай Боксын эблэлэй гэрэл зурагууд