872
Сентябриин 21-дэ Ородой Холбоото Уласай спортын сайд Павел Колобков «2016-2020 онуудта Ородой Холбоото Улас дотор спорт хүгжөөлгэ» гэһэн федеральна программа бэелүүлхэ талаар зүблөө Улаан-Үдэдэ үнгэргөө. Буряад Уласта Мүльһэн ордоной барилгахадаа зүблөөнэй шухала асуудалнуудай нэгэн болоһон байна. Тэрэнэй барилга Ородой Холбоото Уласай Юрэнхылэгшэ Владимир Путинай даалгабаряар ябуулагдана.
Улаан-Үдэдэ тамирай-спортын байшанай дэбисхэртэ хушалтатай мүльһэн ордон бариха гэжэ түсэблэгдэнэ. Тиихэдэ тэрэнэй барилгада федеральна, уласай бюджедүүдһээ болон хубиин талаһаа мүнгэ һомолжо, барилга ябуулхаар хараалагдана. Мүльһэн ордоной барилгада 1,4 миллиард түхэриг гаргашалагдаха, федеральна бюджетһээ – 1,2 миллиард түхэриг, хубиин мүнгэ һомологшоһоо 200 сая түхэриг һомологдохоор түсэблэгдэнэ.
- Мүльһэн ордоной барилга 2019 ондо эхилхэ, 2021 ондо ашаглалгада тушаагдаха гэжэ түсэблэгдэнэ. Мүнөө дээрэ газарай хубаарииин ажал хэгдэнэ, мүнгэ һомологшотой хэлсээ баталха талаар ажал ябуулагдана, - гэжэ Буряад Уласай спортын сайд Вячеслав Дамдинцурунов хэлэбэ.
Буряад Уласай Толгойлогшо Алексей Цыденовэй тэмдэглэһээр, энэ түсэлөөр түлбэригүй хэшээлнүүдые үнгэргэхэ, мүрысөөнүүдые үнгэргэхэ гэжэ түсэблэгдэнэ. Тиимэһээ мүльһэн дээрэ халтирха дуратайшуул эндэ һолжорхо аргатай.
«Хоккейн дээдэ лигын эрилтэнүүдые баримталан, Мүльһэн ордон бариха гэжэ дурадханабди. Тэрэ эрилтэнүүдээр хадаа харагшадай 2100 һуури, 61х30 метр гэһэн хэмжүүртэй мүльһэн хоёр талмай, 45х20 метр гэһэн хэмжүүртэй һорилгын талмай, бүхыдөө ордоной талмай 16 525 дүрбэлжэн метр болохо юм», - гэжэ Буряад уласта Мүльһэн ордоной барилгада мүнгэ һомолхо түсэбтэй олзын хэрэг эрхилэгшэдэй нэгэн, Барнаул хотын Михаил Дроздов хэлэбэ.
Ородой Холбоото Уласай спортын яаман энэ түсэл дэмжэнэ гэжэ Павел Колобков тэмдэглэбэ.
- Ородой Холбоото Уласай Засагай газарта, мүнгэн һангай яаманда мүльһэн ордоной барилгада мүнгэ һомолхо тухай дурадхал бэлдэнэбди. Буряад Уласта иимэ ордон хэрэгтэй. Тиихэдэ эндэ ганса һорилго хэгдэхэ бэшэ ха юм. Буряад Уласта мүльһэн ордон бариха гэжэ ажал ябуулхабди, - гэжэ Ородой Холбоото Уласай спортын сайд Павел Колобков хэлэбэ.
