Буряадай Толгойлогшо Алексей Цыденов үгэ хэлэнэ
Үнгэрһэн долоон хоногто Буряад Уласай Арадай Хуралай зургаадахи зарлалай һунгамалнууд түрүүшынхиеэ сугларба. Түүхэдэ ороһон эмхидхэлгын энэ сессидэ бүхы хүтэлбэрилэгшэдэй нэрэнүүд элирүүлэгдээ.
Сентябриин 9-дэ болоһон һунгалтын дүнгүүд дары түргөөр согсологдожо, Арадай Хуралай 66 һунгамал ажалаа эхилһэн байна. Тэдэнэй 33-ниинь нэгэ мандадтай тойрогуудаар һунгагдаа. Мүн нүгөө хахадынь улас түрын намуудай гэшүүдһээ бүридөө. Бүхы дээрээ Арадай Хуралда дүрбэн намай түлөөлэгшэд хүдэлхэ болобо. Урдахи зарлалай оройдоол 36 хүн дахинаа арад зоной дэмжэлгэдэ хүртэжэ, һунгамал боложо шадаа. Һонирхолтойнь гэхэдэ, мүнөөнэй зарлалда 8 эхэнэр ороо, тэдэнэй 7-ниинь нэгэ мандадтай тойрогуудаар һунгагдаа.
Эмхидхэлэй асуудалнуудта зорюулагдаһан түрүүшын сесси олоной анхарал татаа: Арадай Хуралай ехэ танхим соо бултанда һууха һууришье хүртөөгүй. Энэ үдэр һунгамалнууд булта суглараа. Мүн уригдаһан айлшад хоёрдохи дабхарта түлхисэлдэн, хэн ямар тушаал эзэлхэб гэжэ хөөрэлдэжэ байгаад һэн. Буряад үндэһэнэй хубсаһаар ерэһэн хоёр һунгамал сугларагшадай анхарал татаа. Эдэ хэд бэ гэбэл, Намсарай Намсараев болон Аркадий Цыбиков болоно. Урдахи зарлалай сессинүүдэй үедэ Виталий Лыгденов буряад маягтай костюм үмдөөд ябагша һэн.
Эгээл үндэр наһатай һунгамалда - Матвей Матвеевич Гершевичтэ нэгэдэхи сесси хүтэлбэрилхэ үүргэ дурадхагдаа. Тэрэ энэ ажалтай һайн танил ааб даа. Юуб гэхэдэ, 2007 оной декабрьһаа 2015 оной апрель болотор Арадай Хуралай Түрүүлэгшэ байһан намтартай.
Үнгэрһэн үбэлэй эсэстэ 70 наһа хүрэһэн Матвей Матвеевич эмхидхэлэй асуудалнуудые сугларагшадай урда шадамар бэрхээр табяа. Эгээл түрүүн тоололгын оньһотой танилсалга эмхидхэгдээ. Энэ хэрэг дуугаа үгэлгын ажалда ехэ нүлөөтэй гээшэ. Удаань тоололгын эмхиин гэшүүдэй элирүүлэгдэхэдэ, одоошье ажал эхилээ.
Буряад Уласай Толгойлогшо Алексей Цыденов амаршалан хандахадаа, ажаһуугшад үнэн сэхэ, ажалдаа бэрхэ хүнүүдтэ дуугаа үгэжэ, һунгамал болгоо гэжэ тэмдэглээ. Буряадай Толгойлогшо һунгалтада ерэһэн зондо дахинаа баяр хүргөө.
- Суг хамта нягта харилсаа холбоотойгоор хүдэлхэбди гэжэ найданаб. Буряад Уласаа хүгжөөхын тула аргагүй ехэ ажал хэхэ байнабди. Манай ашаар ажаһуугша бүхэн байдал һайжарна гэжэ ойлгохо ёһотой. Мүн тиихэдэ ажалыемнай сэгнэхэ болоно, - гэжэ Алексей Цыденов хэлээ.
Зургаадахи зарлалда дүрбэн нам түлөөлэгшэдэйнгээ фракци эмхидхэхэ эрхэтэй болоо. Урдахи зарлалда Арадай Хурал гурбан фракциһаа бүридэдэг һэн гээд һануулая. Тиигэжэ эгээл олон һуури “Ниитэ нэгэн Росси” нам эзэлжэ, 41 һунгамал хүдэлхэ юм. Тус фракци Баир Жамбалов хүтэлбэрилхэ. КПРФ-эй 12 хүн Виктор Малышенкын ударидалга доро ажалаа ябуулха. “Үнэн шударга Росси” намай гэшүүд олошороо, Арадай Хуралда 6 хүн хүдэлхэ. Хүтэлбэрилэгшэнь Иринчей Матханов болоо. Сергей Дорош түрүүтэй ЛДПР намайхид дүрбэн һунгамалһаа бүридэхэ юм. Бүхы фракцинуудай гэшүүд нэгэ дуугаар дэмжэгдээ.
Нэн түрүүн Арадай Хуралай Түрүүлэгшэ, хоёр орлогшонорынь, зургаан хорооной хүтэлбэрилэгшэд тодорһон байна. Тэдэнэй түлөө дуугаа үгэлгэ нюуса байгаа. Тиимэһээ һунгамалнууд аяар 9 дахин шэнэ бюллетень абажа, өөрын хараа бодол мэдүүлбэ.
Буряад Уласай Арадай Хуралай Түрүүлэгшын харюусалгата ажалда “Ниитэ нэгэн Росси” нам Владимир Павловые дэбжүүлбэ. Тус тушаал эзэлхэ бусад дуратайшуул олдобогүй. Дуугаа үгэлгэдэ хабаадаһан һунгамалнуудай 45-ниинь Владимир Анатольевичые дэмжэһэн байна. Матвей Гершевич үнэн зүрхэнһөө шэнэ түрүүлэгшые амаршалаад, һуурияа эзэлхыень дурадхаа.
Буряад Уласай Арадай Хуралай Түрүүлэгшэ Владимир Павлов
- Урдамнай ехэ ажал. Булта хамтаран, арад зонойнгоо байдал һайжаруулая, - гэжэ Владимир Павлов һунгамалнуудта хандаба.
Орлогшонорой һуури Цырен-Даша Доржиев болон Баир Жамбалов гэгшэд эзэлээ. Цырен-Даша Эрдынеевич урдахи зарлалда Хуралай Түрүүлэгшэ байгаа һэн гээд хэлэхэ шухала.
Арадай Хурал зургаан хороонһоо бүридэнэ. Һунгамал бүхэн хаанань ажалаа ябуулхаб гэжэ уридшалан мэдүүлгэ үгэһэн байна.
Аяар 20 хүн Бюджедэй, налогуудай болон сан жасын талаар хороондо хүдэлхэнь гээшэ. Тус хороониие энэ удаашье Зоригто Цыбикмитов хүтэлбэрилхэ эрхэдэ хүртэбэ. Нюусаар дуугаа үгэлгын дүнгүүдээр 50 һунгамал тэрэниие дэмжээ. Мэдээжэ врач Галан Гунзынов орлогшо боложо тодороо.
Эдэй засагай бодолгын, байгаалиин нөөсэнүүдые ашаглалгын болон оршон тойронхиие хамгаалгын талаар хороон 14 хүнһөө бүридэхэ юм. Урдахи зарлалда хүтэлбэрилэгшөөр хүдэлһэн мэдээжэ Анатолий Кушнарёв 37 һунгамалай хүсөөр һуурияа дахин эзэлбэ. Орлогшонь - Егор Олзоев.
Гүрэнэй байгуулалтын, нютагай өөһэдын хүтэлбэриин, хуули ёһоной болон гүрэнэй албанай асуудалнуудай талаар хороониие коммунист Виктор Малышенко хүтэлбэрилхэ болоо. Тэрэ тус хорооной даргын орлогшоор урдахи зарлалда амжалтатайгаар хүдэлһэн намтартай. Энэ хороон 8 хүнһөө бүридэнэ гээд хэлэлтэй. Лариса Крутиян хорооной орлогшоор томилогдоо.
Буряад Уласта ушу анхан байгуулжа, дэлхэйн орьёл дээрэ гаргажа шадаһан габьяата һоригшо Игорь Марковец Ниигэмэй бодолгын талаар хорооной хүтэлбэрилэгшын тушаал эзэлбэ. Аяар 54 һунгамал Игорь Васильевичые ниигэмэй асуудалнуудые шиидхэжэ шадаха гэжэ найдаба. Мүн Светлана Будаева хоёрдохи зарлалда хүтэлбэрилэгшын орлогшын уялгануудые дүүргэхэнь.
Бүхы хүтэлбэрилэгшэд сооһоо эгээл олон дуу Валерий Доржиев абажа шадаа. 57 хүн тэрэниие дэмжэжэ, Можонууд хоорондын холбоонуудай, үндэһэ яһатанай асуудалнуудай, залуушуулай бодолгын, олониитын болон шажан мүргэлэй нэгэдэлнүүдэй талаар хорооной хүтэлбэрилэгшэ болгоо. Олониитын ажаябуулагша, спортын талаар мэдээжэ эбээн тэдхэгшын ударидалга доро оройдоол 7 хүн хүдэлхэ юм. Эндэ либерал-демократ Сергей Дорош орлогшоор томилогдоо.
Эгээл үсөөн хүн Газарай асуудалнуудай, аграрна бодолгын болон эд хэрэглэлгын дэлгүүрэй талаар хороондо ажал ябуулха тухай мэдүүлгэ үгөө. Зургаан һунгамалнуудые энэ хороондо Петр Носков хүтэлбэрилхэ юм. Тэрэнэй орлогшо Сергей Пашинский болоһон байна.
Олон жэлдэ һунгамал ябаһан Цыденжаб Батуев мүнөө жэлэй һунгалтада хабаадангүй, олониие гайхуулаа. Хэды тиигэбэшье, түрэл Арадайнгаа Хуралда ажалтай болобо. Зургаадахи зарлалда Цыденжаб Бимбаевич аппарадай хүтэлбэрилэгшөөр томилогдоо.
Түрүүшын сессиин үедэ һунгамалнууд ганса Хуралай болон хороонуудайнгаа хүтэлбэрилэгшэдые шэлэн абаа бэшэ, мүн ондоо үндэр тушаалнуудта дэбжүүлэгдэһэн нэрэнүүдые зүбшөөгөө. Тиигэжэ Ородой Холбоото Уласай Федерациин Зүблэлдэ үрэ дүнтэйгөөр хэдэн жэлдэ хүдэлжэ ябаһан Александр Варфоломеев Арадай Хуралай түлөөлэгшөөр дахинаа дэбжүүлэгдээ.
2017 оной һунгалтын һүүлээр һая Буряадай Толгойлогшо болоһон Алексей Цыденов Засагай газарай Түрүүлэгшын ниигэмэй талаар орлогшоор Вячеслав Цыбикжаповые томилжо, һунгамалнуудһаа дэмжэлгэ абаһан байна. Оройдоол жэл болоод лэ, Уласай Толгойлогшо шэнээр һунгамалнуудта хандаа. Ушар гэхэдэ, Вячеслав Цыбикжапов дүрбэн һара соо Түнхэн аймагай Засаг даргаар хүдэлөө һэн. Энэшье удаа Вячеслав Балданович тушаалдаа дэмжэгдээ.
Иигэжэ Буряад Уласай Арадай Хуралай зургаадахи зарлалай һунгамалнууд эмхидхэлэй асуудалнуудые шиидхээд, хамсыгаа шуун, ажалдаа орохоёо мэдүүлээ.
Анна Огороднигой гэрэл зурагууд