Намарай эхин һарын тэн багаар Монгол Уласай Гадаада харилсаанай яаманда Монголой соёлой харилсаануудай талаар элшэнэрэй анха түрүүшын уулзалга боложо үнгэрбэ. Ородой Холбоото Уласай зүгһөө Монгол Уласта соёлой талаар харилсаануудай элшэнэр Д-Н.С. Сультимов С.В.Калмыков хоёр хабаадалсаа. Энэ уулзалгын удха шанар тухай Д-Н. С Сультимовтай хөөрэлдэһэн байнабди.
- Доржо Норбосампилович, нэн түрүүн соёлой талаар харилсаануудай элшэнэр ямар үүргэ дүүргэдэг бэ гэжэ тодорхойлон хэлэжэ үгыт.
- Ород гүрэндэхи Монголой соёлой элшэнэрэй үүргэ иимэ: соёл урлагай талаар харилсаануудые үргэдхэхэ, үндэр хэмжээндэ гаргахые оролдохо; хоёр ороной ниитэ хүн зоной дунда һонирхол түрүүлхэ; энэ харилсаанай үндэһөөр ухаан бодолыень, оюун сэдьхэлыень улам баяжуулха. Хүн зоной амидаралай хүгжэлтэдэ соёл урлагай хүсөөр нүлөө үзүүлхэ гэһэн гол бодолынь лэ даа. Монгол Уласай Гадаада харилсаанай яаманай дид-сайд Б.Батцэцэгэй хүтэлбэри доро үндэр хэмжээндэ энэ уулзалга үнгэргэгдөө гэжэ тэмдэглэхэ байнаб.
- Энэ уулзалгада Ород гүрэнһөө гадна үшөө ямар улас түрэнүүдэй түлөөлэгшэд хабаадаа гээшэб?
- Хори һайса гаран элшэнэр ерэһэн байнад. Үнэндөө, хамта дээрээ 39 элшэнэр тоологдодог. Ямар гүрэнүүдһээ ерээб гэхэдэ, Америкэ, Англи, Германи, Япон, Индонези, Ирланди, Казахстан болон бусадшье гүрэнүүдһээ ерэжэ хабаадаа. Эдэ зомнай ехэнхидээ хари гүрэндэ гэр бүлэтэй боложо, тэндээ түбхинэһэн монгол үндэһэтэн болоно.
- Ямар гол асуудалнууд харагдажа үзэгдөө гээшэб энэ хуралдаанда?
- Монгол Уласай Засагай газарта соёл урлаг, аяншалга хүтэлбэрилдэг дарганар хабаадалсажа, мүнөө үе сагта ямар хэмжээндэ ажалаа ябуулжа байһан тухайгаа дэлгэрэнгыгээр хөөрэжэ үгэһэн, танилсуулһан байна. Тодорхойлжо хэлэбэл, Монголой соёл урлагай бодолгын газарай дарга Б.Сэргэлэн болон соёл урлагай газарай дарга Г.Эрдэнэбат хабаадажа, мүнөө үе сагта Монгол орондо соёлой талаар ажал ямар хэмжээндэ гээшэб, ямар шэнэ бүтээлнүүдые театр болон кино бэелүүлжэ, музей болон дуу, хатарай ансамбльнууд арад зоноо хангажа байнаб гэжэ болон ерээдүйнгөө түсэбүүд, эдэбхи, үүргэ тухайгаа дэлгэрэнгыгээр хөөрэжэ үгөө. Энэ уулзалгада хабаадаһан Улаанбаатар хотын соёл урлагай газарай дарга Ж.Дамдинцэрэн мүнөө үе сагта хотын соёлой байдал тухай дэлгэрэнгыгээр тогтожо хөөрэхэ зуураа, саашадаа та бүгэдэнтэй хамтаржа, хүсэеэ ниилүүлжэ, Монгол Уласайнгаа соёл дэлхэй дүүрэн дэлгэрүүлбэл, тон ехэ ашагтай байха һэн гэжэ тэмдэглээ. Олон орон нютагуудай зон ехэтэ һонирходог бшуу, хүршэ ороноймнай соёл урлагаар.
Удаань Монгол Уласай аяншадай бодолгын газарай дарга Б.Баясгалан, Улаанбаатар хотын аяншадай газарай дарга Д.Гантүмэр гэгшэд элидхэл хэһэн байна.
“Хилын саана амидардаг монголшуудай байдал” гэһэн уулзалга хоёрдохи үдэрынь болоо. Эндэ хабаадаһан дарганар тэмдэглэхэдээ, 150 гаран мянган монголшууд хари гүрэнүүдтэ мүнөө амидарна гэбэ.
Эдэ зомнай бүхы дээрээ далан зургаан гүрэндэ ажаһуудаг, ажалладаг, һуралсажа байдаг юм. Диилэнхи олониинь Америкэ болон Урда Солонгосто түбхинэнхэй, наһыень абажа харахада, 19 наһанһаа 29 наһан хүрэтэр бүридхэлдэ оронхой залуушуул мүн. Нютагһаа гаража ошоһон шалтагаан гэхэдэ, дээдэ һургуули дүүргэһэншье һаа, ажалгүйдөөд, хилын саана амидарха, ажаллаха аргаяа бэдэрнэд. Эдэ зомнай холо байбашье, Монгол орондоо ехэ туһа нүлөөгөө үзүүлдэг заншалтай. Шэнэ технологи болоод бусадшье һонирхолтой, үрэ дүнтэй зүйлнүүдые орон нютагтаа оруулжа байдаг. Теэд тэдэнэрэй зариманай үбдэхэ, элдэб уршагта ябадалнуудта орохо сагуудай дайралдабалынь, Монгол Уласай Гадаада харилсаанай яаман али болохо туһаламжа арсалтагүй үзүүлжэ, консульствануудай зүгһөө дэмжэжэ, зүб мүртэнь оруулха гэжэ оролдожо байдаг гуримтай.
Түгэсхэлдэнь гадаада харилсаанай дид-сайд Б.Батцэцэг онсолон хэлэбэ: “Соёлой элшэнэрнай гадаада гүрэнүүдтэ амидаржа байбашье, соёлой түбүүдые байгуулаад, Монгол орондоо туһа үзүүлхэ, мүнгэ хүрэнгэ оруулха болон элдэб хэмжээнэй харилсаа үүдхэхэ, бэелүүлхэ талаар ехэ оролдолго гаргажа байдаг зон, ехэ баяраа мэдүүлнэбди, амжалта бултандань хүсэнэбди”.
Удаань Монгол Уласай соёл урлагай газар ошожо, Г.Эрдэнбат даргын хүтэлбэри доро хотын соёл урлагай һалбаринуудай дарганартай уулзалга дээрэ һанамжа бодомжоороо андалдаан болобо.
Энэл үдэртөө Монгол Уласай Засагай газарта ошожо, Монгол Уласай юрэнхылэгшэ Х.Баттулгатай уулзалга болоод, һанамжануудаараа андалдаһан байнабди. Хүн бүхэмнай хэжэ байһан ажал тухайгаа тобшохоноор танилсуулаад, юрэнхылэгшын асуудалнуудта харюусажа, саашадаа хэхэ зорилгонуудаа онсолообди. Уулзалгын удаа Агуу Чингис хаанай юһэн тугай дэргэдэ юрэнхылэгшэ Х.Баттулгатай хамта дурсалга болгон дүрэ зурагаа буулгуулаабди.
Монголой Гадаада харилсаанай яаманда эмхидхэгдэһэн энэ уулзалга ехэ удха шанартай, алишье гүрэнэймнай арад түмэндэ соёл урлагай талаар ашатай гэжэ тобшолмоор. Үндэр үрэ дүн үгэхэл байха. Жэшээ болгожо хэлэхэдэ, “Бумбардай” монгол мультфильм дээрэ эдэбхитэй ажаллажа байһан Н.Эрдэнэбаяртай дүтэ танилсажа, япон уластай хамта хэжэ байһан ажалтайнь танилсаха арга олдоод, энэ мультфильм буряад хэлэн дээрэ оршуулха тухай хэлсээбди. Буряад хэлэнэймнай орёохон байдалда ороод байхада, эдир үетэндэмнай түрэлхи хэлэеэ шудалха хэрэгтэнь угаа туһатайнь эли бшуу.
- Ород гүрэндэ Монгол Уласай соёлой элшын уялга 2015 онһоо эрхилһэн байнат. Энэ хугасаада ямар хэмжээнүүд бэелүүлэгдээ гээшэб?
- Хоца Намсараевай нэрэмжэтэ Буряад драмын академическэ театрта директорэй тушаалда байха үедөө Монгол оронтой харилсаагаа улам үргэдхэхэ гэһэн зорилготой ажалаа эрхилдэг һэм. Энээнһээ уламжалан, соёл урлагай талаар Монгол орондо ажал эрхилжэ байһан зонтой харилсаа тогтооходоо, нэгэл һанал бодолтой байһанаа мэдэрээ бэлэйб. Илангаяа Монгол Уласай драмын театрай болон Монголой Урлагын ажалай холбооной хүтэлбэрилэгшэдтэй хамта олон удаа Монгол туургата арадуудай театрнуудай фестивальнуудые үнгэргөөбди, жэл бүри шахуу соёл урлагай талаар хэмжээ ябуулгануудта хабаадалсадаг, уулзадаг, өөрынгөө талаһаа али болохо дурадхал, туһаламжа үзүүлдэг һэмди.
Эдэ бүгэдэ Монгол оронтой ехэ дүтэ харилсаатай болохо арга боломжо намда олгоһон юм. Тэрээнһээ гадуур, монгол зохёолшодой - С.Эрдэнэ, Б.Нимаа, Ж.Пурэв, О.Цэндсүрэн, С. Намсарайн, Маам болон бусадай бэшэһэн зохёолнууд анхаралыем аргагүй ехээр татаһан байдаг. Илангаяа Сэнгын Эрдэнын зохёолнууд: “Хойто наһандаа уулзахабди”, “Занабазар”, “Амидаралай тойрог” романуудынь, “Хүхэ хулгана жэл”, “Сэрүүн дуганай мүхэл” туужануудынь болон олон тоото рассказуудынь угаа һонин ха юм. Энэ мэтээр Монголой түүхэ, соёл урлаг дээрэһээ уламжалан, монгол хүнэй амидаралтай дүтэ танилсаха арга боломжотой болоо һэм. Дээрэ нэрлэгдэһэн зарим зохёолшодой бүтээлнүүдые буряад хэлэндэ оршуулжа, тайзанай хэлэндэ оруулһан байнаб. Мүнөөшье оршуулгын ажал орхигдоогүйл даа.
2015 ондо Улаан-Үдэ хотодомнай оршодог Монголой консулой газарай юрэнхы консулой урилга, дэмжэлгээр соёлой элшын ажал хэжэ эхилээ һэм. Энэ гурбан жэлэй хугасаада хэһэн ажалайнгаа гол тэдыень тоолохо болоо һаа, 2015 оной намар Монголой урлагай ажалай холбооной дарга Б.Тунгалаг, Ородой Урлагай ажалай холбооной (СТД) түрүүлэгшэ А.Калягин хоёрто хоорондоо аша үрэтэй харилсаатай байхынь тулада хэлсээ баталуулаа һэмди. Иигэжэ тон ехэ удха шанартай харилсаанай үүдэн нээгдээ. А.Вампиловай “Ууган хүбүүн” гэжэ зүжэг табиһан Баян-Хонгор аймагай “Тэмүүжэн” театрые Эрхүү хотодо үнгэргэгдэдэг олон улсын театрай фестивальда оруулааб. Брянск хотын театрай зүжэгшэд Монголдо үнгэргэгдэдэг “Гэгээн муза” гэжэ фестивальда хабаадаа, “Алтан баг” (Золотая маска) фестивалиин жюриин гэшүүн, театр шэнжэлэгшэ Т.Н.Тихоновецые “Гэгээн муза” фестивалиин жюриин бүридэлдэ оруулааб. Татьяна Николаевна монгол театрай зүжэгүүдые хаража, һанамжаараа хубаалдахадаа, ямар хэмжээндэ ажалаа зохёожо байһан тухайнь туһа ехэтэй, тодорхой элидхэл хэжэ, зүбшэл заабари үгэхэһөө гадна, мүнөө үе сагта дэлхэйн театрнууд ямар хараа шугам, шэглэл баримталжа ажалаа зохёоноб гэжэ дэлгэрэнгыгээр хөөрэжэ үгэһэн юм. Монгол Уласай зунай наадан үргэн хэмжээндэ үнгэргэгдэдэг гэжэ мэдэнэбди. Энэ нааданда Тувагай, Усть-Ордагай, Агын, “Байгал” театрай хатаршадые оруулһан байнаб. Үбэр Байгалай хизаарай Шэтэ хотын драмын театр энэ үнгэрэгшэ хабар Улаанбаатар хотодо гастроль үнгэргэбэ. Тус театр Монголой Дунда-Губиин, Түб аймагай театрнуудтай харилсажа байха удха шанартай хэлсээ баталһан байна. Гэхэ мэтээр томошолжо тоолохо болоо һаа, иимэ ажалнууд хэгдэһэн лэ даа.
- Оршуулганууд тухай онсолоо һаа, мүнөө ямар зохёол буряад хэлэндэ оруулнат гэһэн эсэсэй асуудал табия.
- Түрүүшын Богдо гэгээн тухай Сэнгын Эрдэнын “Занабазар” гэжэ түүхэтэ роман буряадшалжа байнаб. Бүри олон жэлэй саана энэ гайхамшагта бэлигтэй зохёолшоной үринэртэй уулзажа, оршуулга тухай зүбшөөлыень абаа бэлэйб. Монгол туургата зоной түрүүшын Богдо гэгээнэй хуби заяан тухай, тэрэнэй хүсэл, эрмэлзэл, хүн шанар тухай С.Эрдэнэ аргагүй һонирхолтойгоор бэшэһэн гэжэ уран зохёол шэнжэлэгшэд тэмдэглэһэн байдаг. Буряадаймнай уншагшад танилсажа, сэдьхэлээ баяжуулха бэзэ гэжэ найдаһан дээрэһээ энэ гайхамшагта зохёол оршуулха гэжэ шиидэгдээ. Сэдьхэлнай баян байбал, үндэһэн хэлэн тээшээ ухаан бодолнай эрьен, хамтын хүсөөр буряад хэлэеэ өөдэнь үргэхэ эршэмтэй һэдэлгэ гаргажа болохолди. Залиржа байһан гал тойрожо һууһан зоной гал дээрээ хуурай мүшэр нэмээд, дүлэ бадаргаажа, гэрэлынь ошотуулжа байһандал...
- Доржо Норбосампилович, хоёр орониие соёл урлагай талаар холбожо, ехэ ажал ябуулжа байнат гэжэ элирнэл даа, энэ хөөрөөнһөөтнай. Ажалдатнай үндэр амжалта хүсэжэ, уран зохёолой, оршуулгын талаар хэжэ байһан ажал хэрэгүүдтнай бүтэмжэтэй байг лэ гэжэ хүсэел даа.
Гэр бүлын альбомһоо гэрэл зурагууд абтагдаа