714
2019 оной январиин 1-һээ Буряад Уласта бог шорой суглуулха, элдүүрилхэ уласай оператор ажалаа ябуулжа эхилхэ юм. Тиимэһээ гэрнүүдһээ бог шорой гаргахын түлөө түлбэри хубилгагдаха. Гэрнүүдэй талмайһаа бэшэ, харин ажаһуудаг хүнүүдэй тооһоо түлбэри дулдыдаха. Буряад Уласай Толгойлогшо энэ асуудалаар ажаһуугшадта ниигэмэй тэдхэмжэ үзүүлхэ гэжэ бог шорой гаргахын түлөө түлбэри хүнгэлэлтэтэй болгохо талаар ажал ябуулха гэһэн даалгабари Засагай газарай Түрүүлэгшэ ниигэмэй хүгжэлтын талаар орлогшо Вячеслав Цыбикжаповта үгэбэ.
- Хүдөө нютагуудта бог шорой гаргахын тула мүнгэн түлэдэггүй һаа, мүнөө оператор ажаһуугшадһаа түлбэри абаха. Энэ асуудалаар олон үхибүүтэй, үргэжэ абаһан хүүгэдтэй гэр бүлэнүүдтэ, ветерануудта хүнгэлэлтэ үгы. Тиимэһээ хүнүүд хэды шэнээн мүнгэ түлэхэб, ниигэмэй ямар тэдхэмжэ үзүүлхэ аргатайбди гэжэ шиидхэхэ хэрэгтэй, - гэжэ Алексей Цыденов тэмдэглэбэ.
Мүнөө уласай түлбэриин албанда энэ асуудал хаража үзэнэ. Бог шорой гаргахын түлөө түлбэридэ юун оруулагдааб гэхэдэ: бог шорой суглуулха, тэрэниие шэрэхэ, илгаха, бузаргүй болгохо, полигондо булаха, оршон тойронхи байгаали бузарлаһанай түлбэри, саг зуурада бог шорой суглуулха талмай бариха болон бусад хэмжээ ябуулганууд.
Ажаһуугшад бог шорой гаргахын түлөө түлбэри 2018 оной декабрь һарада мэдэгдэхэ.
