Ольга Киршина
Сарюна Баторовагай гэрэл зураг
Сентябриин 9-дэ Буряад Уласта ганса Арадай Хуралда һунгалта болоо бэшэ, мүн зарим аймагуудай засаг дарганар, аймагай зүблэлэй һунгамалнууд, сомоной дарганар һунгагдаа. Тэрэ сагһаа хойшо үнгэрһэн һарын туршада танилсалгын болон эмхидхэлэй ажалнууд үргэнөөр ябуулагдаа.
Тиигэжэ Ярууна аймагай һунгамалнуудай зүблэлэй зургаадахи зарлал ажалаа эхилбэ. Сентябриин 9-дэ 15 депутат шэнээр һунгагдаа. Бултанда мандат барюулагдаа. Мүн тиихэдэ Шиирингэ һууринай сомоной даргаар һунгагдаһан Санжидма Хабаева үнэмшэлгэ абаба. Ярууна аймагай һунгалтын комиссиин хүтэлбэрилэгшэ Александр Тышкенов энэ баяртай үйлэ хэрэг бүтээбэ.
Эмхидхэлэй түрүүшын сессидэ Арадай Хуралда адли түрүүшын үгэ эгээл үндэр наһатай һунгамалда үгтөө гэжэ Ярууна аймагай захиргаан мэдээсэнэ. Энэ хадаа Дулма Доржиевна Турунхаева болоно гээшэ.
Ольга Киршина аймагай зүблэлэй түрүүлэгшын һуури эзэлээ. Энэ һуурида тэрэ гансаараа дэбжүүлэгдээ. Урдахи зарлалда Ольга Георгиевна социальна хэрэгүүдэй талаар комиссида ажалаа ябуулдаг байгаа.
Бүхы сугларагшадые аймагай засаг дарга Цыденжап Шагдаров амаршалжа, дүтын харилсаа холбоотойгоор хүдэлхэ бэзэбди гэжэ найдан тэмдэглээ.
Баһал сентябриин 9-дэ Ивалга аймагта зургаадахи зарлалай һунгамалнуудай нэрэнүүд тодороо. Эндэхи һунгамалнуудай зүблэлэй бүридэлдэ 15 хүн юм.
Ивалга һууринда болоһон түрүүшын эмхидхэлэй сессидэ Буряад Уласай Арадай Хуралай һунгамал Александр Цыденов хабаадалсаһан байна.
Аяар табан хүн һунгамалнуудай зүблэл хүтэлбэрилхөө һанаһанаа мэдүүлээ. Залуу һунгамал Виктор Пастухов энэ харюусалгата һуури эзэлбэ.
Виктор Пастухов
Иван Подберёзкиной гэрэл зураг
Түнхэн аймагта эгээл орёо һунгалта болохо гэжэ хараалагдаа. Юуб гэхэдэ, урдахи зарлалай һунгамалнууд өөһэдөө сагһаа урид болзороо хаһаһан байна. Буряадай Толгойлогшо Алексей Цыденов Түнхэн ошожо, аймагай захиргаанай болон һунгамалнуудай зүрилдөө иигэжэ тогтоогоо бэлэй гээд һануулая. Тэдэнэй дунда элдэб аашата ябуулганууд һунгалтын үедэ дахинаа тохёолдохо гэжэ олон хүн хүлеэгээ. Тиимэһээ эндэ һунгалта шаг шууяагүй үнгэрһэниинь һайшаалтай.
Түнхэн аймагай һунгамалнуудай зүблэл 18 хүнһөө бүридэнэ гээшэ. Тэдэнэй 9 һунгамалые арад зон һунгадаг. Мүн нүгөө 9-иинь намай бүридэлөөр зүблэлдэ оруулагдадаг юм.
Түрүүшын сессидэ шэнэ хүтэлбэрилэгшэ томилогдоо. Энэ һуури Баир Байминов эзэлһэн байна. 2016 онһоо хойшо тэрэ аймагай засаг даргын орлогшоор хүдэлдэг һэн. Түрүүлэгшын орлогшоор КПРФ намай гэшүүн Дамба Тышкеев һунгагдаа.
Баир Байминов
Борис Балдановай гэрэл зураг
Иигэжэ аймагуудай шэнэ һунгамалнууд хүнгэн бэшэ ажалаа эхилбэ.
Борис БАЛДАНОВ