Буряад Уласай Арадай Хуралай зургаадахи зарлалай бүридэлдэ Мухар-Шэбэр аймагһаа Пётр Лукич Носков ороһон байна. Түрүүшын сессиин шиидхэбэреэр Газарай асуудалнуудай, аграрна бодолгын болон эд хэрэглэлгын дэлгүүрэй талаар хороониие тэрэ ударидажа эхилээ. Тиимэһээ шэнэ һунгамалай хараса хүдөө һууринууд руу шэглүүлэгдэнхэй гээд, хөөрөөнһөөнь ойлгобобди.
Бэрхэшээл
“Гансашье Буряадай бэшэ, мүн бүхы гүрэн доторхи хамагай ехэ бэрхэшээл хүдөө һууринуудтай хабаатай. Залуу халаан һайн байдал бэдэржэ, хото руу ябашана. Үлгэ һалга болоһон үбгэд, хүгшэд лэ нютагтаа үлэнхэй гээд адаглааб. Иимэ байдал мэтэр хубилгахын аргагүй. Эгээл тиимэһээ намай һунгабалтнай, “диваажинай” орон гансата байгуулхаб гэжэ хэнииешье найдуулаагүйб. 90 гаран уулзалгануудые хэжэ, Мухар-Шэбэрэй ажаһуугшадай байдал бодотоор мэдэхэ болооб, - гэжэ Пётр Лукич һанаһанаа хэлэжэ оробо. -Үхибүүдэй тооһоо салингай хэмжээ дулдыдадаг болгоһомнай - тон буруу. Мүнөө болоходо, үсөөн үхибүүдтэй хүдөөгэй һургуулинуудта залуу багшанар тогтоногүй. Элүүрые хамгаалгадашье баһал тиимэ. Хэрбэеэ хотодо һургуулинууд болон сэсэрлигүүд дуталдана һаа, хүдөө һууринуудта 400 үхибүү һургахаар арга боломжотой һургуулида 100 үхибүүн ябана. Иимэ томо байшан түлиһэнэй хэрэг бии гү? Хүдөө һууринууднай хооһоржол байна. Ажал хэхээр түлэг наһандаа ябагшад Улаан-Үдын дэргэдэ түбхинэнхэй. Харамтайнь гэхэдэ, саг зуурын ажалаар бэеэ тэжээгээд ябана. Ажалай байгаал һаа, тэдэн нютагаа бусахаар бэлэн”.
Шиидхэбэри
“Мүнөө оньһон техникын арга боломжо урданайхиһаа холо урда гаранхай. Эгээл тиимэһээ газар элдүүрилгэдэ олон гар хэрэгтэй бэшэ. Гэбэшье газарнай хуу хубаарилагданхай гээд мэдэнэбди. Тиимэһээ түлбэритөөр ашаглахынь тулада МТС байгуулха хэрэгтэй болоод байна. Хэжэнгэ аймагай ажаһуугшад иимэ хэрэг бусадһаа урда үүсхээд байна. Тэрэ жэшээень халан абаха ёһотойбди, - гэжэ Пётр Носков хөөрөөгөө үргэлжэлүүлбэ. - Буряадаймнай уларил шэрүүн. Таарахаар лэ газартань таряа ургуулха хэрэгтэй. Гэбэшье мал ажахыгаал хүгжөөхэмнай шухала. Тиихэдээ һү үйлэдбэрилгээр урда гарахагүйбди. Баруун можо нютагуудта нэгэ үнеэнһээ жэлэй туршада 15-17 мянган литр һү һаадаг һаань, бидэ тиигэжэ шадахагүйбди. Гэбэшье уласайнгаа һургуули болон сэсэрлигүүдые һүмбэйгөөр хангахын тулада хэдыхэн лэ комплекс байлгаха хэрэгтэй. Мяханай үүлтэртэ мал манай тала дайдада үсхэбэрилхэ шухала. Дүнгүүдһээ уламжалан, гүрэнэй туһаламжа ябуулха байгаабди. Туйлалта ехэтэй шэглэл хүгжөөхэ болонобди. Хүдөө ажахы руу федеральна болон уласай һанһаа 900 сая түхэриг һомологдоно. Тэрэнээ зүбөөр хубаахал байгаабди”.
\