Хэжэнгэ аймагай Могсохон һууринда октябриин 5-да хоёр ехэ баяртай ушар тудаба. Эндэхи арад зон багшанарай үдэр тэмдэглэхэһээ гадна, хүүгэдэй сэсэрлигэй шэнэ байшан нээлгын баяр ёһололдо хабаадаһан байна.
Энэ үдэр саһа бороотойшье һаа, Могсохоной бүхы ажаһуугшад “Наран” сэсэрлигэй шэнэ байшан харахаяа ерээ. Эндэхи үндэр наһатайшуул үхибүүдһээ дутуугүй баяртай байһанаа харуулба. Тэдэ бүхы шэнэ юумэ барижа үзэнэ, гайхан харана.
Мүн тиихэдэ хүндэтэ айлшад олоор буугаа. Хэжэнгын бүхы сэсэрлигүүдэй хүтэлбэрилэгшэд, хүдөө һууринуудай сомонуудай дарганар, арадай һунгамалнууд шэнэ сэсэрлигэй газаахи, зосоохи байдалые хараад, нюдөө баярлуулнад. Тэдэнэй дунда Буряад Уласай Арадай Хуралай түрүүлэгшын орлогшо Цырен-Даша Доржиев, Хэжэнгэ аймагай засаг дарга Геннадий Лхасаранов гэгшэдые тэмдэглэмээр.
Баян түүхэтэй
“Наран” гэһэн хүүгэдэй сэсэрлиг Могсохон һууринда үшөө 1959 ондо үүдэеэ сэлиһэн байна. Нютагай хэдэн хаһа үхибүүд түрэл сэсэрлигтээ үндыгөө бэлэй. 1990-ээд онуудай хёморооной үедэ совхозой хуушан конторын байшан сэсэрлигтэ дамжуулагдаа һэн. 1972 ондо бодхоогдоһон тэрэ байшан мүнөө үмхиржэ, унажа эхилээ.
- Манай сэсэрлигтэ гурбан бүлэгтэ үхибүүд хубаараад ябана. Энэмнай аяар 70-аад хүүгэд болоно бшуу. Байшангүйһөө боложо, бидэ тэндээ хүдэлжэ байгаабди. Үдэр бүри үхибүүдэйнгээ түлөө маани уншаад ябадаг һэмди. Зосоонь ороод ябахадашни, оёор хүдэлжэ байха, дээшээ харахадашни, үһээнь шабар унахаар шэнги үзэгдэхэ. Ехэл аймшагтай байгша һэн, - гэжэ “Наран” сэсэрлигэй хүтэлбэрилэгшэ Соёлма Цырендоржиевна Доржижапова хөөрэнэ.
Шэнээр гэрэлтээ
Сэсэрлигтэ шэнэ байшан бариха тухай зугаа хэдэн олон жэл соо ябаа. Энээн тухай аймагай засаг дарга Геннадий Зундуевич Лхасарановта болон Арадай Хуралай һунгамал Цырен-Даша Эрдынеевич Доржиевта могсохонойхид булта нэгэдэжэ, тусхай бэшэг хандалга дамжуулһан түүхэтэй. Эдэ хоёрнай хүндэ байдалые ойлгожо, шэнэ байшан бодхоохо тухай асуудал шангаар табяа.
- Геннадий Зундуевич болон Цырен-Даша Эрдынеевич хоёрнай Засагай газарта ехэ ябуулга хэжэ, тэндэхи хэдэн үүдэнүүдые нээжэ ороод, барилгада мүнгэ олоһон байна. Тиигэжэ уласай бюджедһээ 19 сая түхэриг мүнгэн барилгада дамжуулагдаа. Мүн аймагай болон хүдөө захиргаанай 4 сая гаран түхэриг мүнгэн гаргашалагдаа, - гэжэ Соёлма Цырендоржиевна хөөрөөгөө үргэлжэлүүлнэ.
Буряад Уласай Арадай Хуралай түрүүлэгшын орлогшо Цырен-Даша Доржиевай хэлэһээр, Могсохон хадаа Хэжэнгын томо нютагуудай нэгэн юм. Тиимэһээ тэрэ хуушан сэсэрлигыень орожо хараад, ехэ гайхаһан байна.
- Үнэхөөрөө хуушан байшан соо аймшагтай байгаа. Түрүүшээр ороод, хүл доромни газар ябашаһандал адли оёорой хүдэлжэрхихэдэнь, залд гээд абааб. Мүн тиихэдэ үһээ мэнэ унахаа байгаа. Тиихэдэ хананьшье үжөө. Дары түргөөр шэнэ байшан барижархиха арга байгаагүй. Аймагай засаг дарга Геннадий Зундуевичтай интернат-һургуулиин орхигдоһон байшаниие хэды дахин тойрожо ябаад, тэрээниие заһабарилха тухай хөөрэлдөөбди, - гэжэ Цырен-Даша Эрдынеевич һанамжалан хэлэнэ.
Теэд шэнээр байшан бодхоохо гээшэ мүнөө сагта хүндэхэн даа. Тиигэжэ эндэхи интернат-һургуулиин орхигдоһон шулуун байшан нютагай шарай шэнжые муудхаажа байгаа. Эгээл энээниие һэльбэн заһабарилжа, шэнэ ами оруулха тухай хэлсэгдээ.
- “Фортуна” эмхи барилгын болон заһабарилгын бүхы ажал үндэр хэмжээндэ бүтээжэ шадаа. Александр Батуевич болон Александр Доржиевич хоёр алтан гартай байжа, гоё гэгшын сэсэрлигтэй хүүгэднай болоо, - гэжэ Соёлма Доржижапова хөөрөөгөө үргэлжэлүүлнэ.
Бүхы бараа шэнэлэгдээ
Сэнхир һаруул сэсэрлигтэ 50 үхибүүн ябаха аргатай. Теэд мүнөөнэй байдалаар, тэндэ 68 үхибүүн гурбан бүлэгтэ хүмүүжүүлэгдэхэ. Сэсэрлиг соо 15 ажалшад, тэрэ тоодо 1 хүгжэмэй багша болон 4 хүмүүжүүлэгшэ хүдэлдэг юм.
- Хуушан эд бараагаа наашань зөөжэ асарха гэхэдэмнай манай һунгамал буруушаагаа. Иимэ һайхан байра соо юундэ хуушан бараа байба гээшэб гэжэ хэлээ. Тиигэжэ үшөө 1,5 сая түхэриг бараа абахыемнай һомологдоо. Үхибүүдэй унтаха газарта, эдеэлхэ таһалгада, наадаха танхимда хуу шэнэ юумэн абтаа, - гэжэ Соёлма Цырендоржиевна баярлана.
Сэсэрлигэй газаахи оршон байдал баһа һайжаруулагдаха. Наадаха газар зохёон байгуулхын түлөө аймагай захиргаанһаа 100 мянган түхэриг баярай оршон байдалда Геннадий Лхасаранов хүтэлбэрилэгшэдэ барюулаа.
Урдань үшөө ехэ ажал
- Могсохон һуурин һүүлэй үедэ хүгжэлтын замда гараад байна. Эндэ арад зон гэдэргээ бусажа, гэр табин түбхинэнэ. Тиимэһээ могсохоноорхин бүри олон боложо, шэнэ сэсэрлигтэ үшөөл олон багашуул ябаг лэ, - гэжэ нээлгын баяр ёһололдо Цырен-Даша Доржиев үреэгээ. - Харин манай үүргэ - хүн зоной ажабайдал һайжаруулга болоно. Танай нютагта хүүргэ бариха тухай асуудал үнинэй гаранхай. Һаяын жэлнүүдтэ энээниие шиидхэхэбди.
Суг хамта хэхэ ажалнай ехэхэн гэжэ аймагай засаг дарга хэлээ. Ушхайта һууринда - сэсэрлиг, Хэжэнгэ һууринда - лицей барилга болоно. Декабрь һарада томо спортын ордон Хэжэнгэдэ үүдэеэ сэлихэнь. 2019 ондо аймагай түбтэ стадион һэльбэн заһабарилга - түсэбүүдэй нэгэн боложо үгэнэ. 2020 ондо Хэжэнгэ аймагта уласай хүдөөгэй спортын нааданууд үнгэргэгдэхөөр хараалагданхай.
Борис БАЛДАНОВАЙ гэрэл зураг