Буряадай тамиршад юһэн медальтай Ага тосхонһоо бусаба. 15-дахияа боксоор бүхэроссиин мүрысөөн тэндэ үнгэрөө.
Мүнөө жэлэй мүрысөөн СССР-эй арадай артист Иосиф Давыдович Кобзоной мүнхэ дурасхаалда зорюулагдаа. Үшөө 2003 ондо арадай артист иимэ хэмжээ ябуулга Агинское һууринда үнгэргэхэ гэжэ шиидхэбэри абаа бэлэй. Тэрэ гэһээр Иосиф Кобзон жэл бүри мүрысөөндэ ерэжэ, шалгарһан тамиршадта шан барюулдаг һэн. Хари мүнөө жэл тус хэмжээн арадай артистгүй түрүүшынхиеэ болобо гээшэ.
Дүрбэн үдэрэй туршада шанга тулалдаануудые агынхид хараа. Тэрээндэ Эрхүү можын, Үбэр Байгалай хизаарай, Монгол ороной, Буряад болон Хакас Уласуудай түлөөлэгшэд хабаадаһан байна.
75 килограмм хүрэтэр шэгнүүртэ Улаан-Үдэ хотын Максим Парфёнов алтан медальда хүртөө. Үшөө тиихэдэ Максимда тусхай шан барюулагдаа.
Финальна уулзалгануудта хабаадаһан Наталья Коростелева, Алексей Уфимцев, Борис Зориктуев болон Олег Елизаров гэгшэд шангай хоёрдохи һууринуудые эзэлээ.
Сергей Горда, Вираб Маргарян, Кирилл Баландин болон Виталий Ананин гэгшэд гурбадахи һууринуудта гараа.
“Эрхим шүүгшэ” гэһэн тусхай шанда Буряадай Степан Батиров хүртөө.
Иосиф Кобзоной нэрэмжэтэ жасын захиралай орлогшо Александр Бородулин Агинское тосхондо үнгэргэгдэһэн мүрысөөндэ зорюулжа ерэһэн байна.
«Иосиф Давыдович наһа бараа гээд мүрысөө тогтоохогүйбди. Үшөө бүри үндэр шатада гаргахаа оролдохобди», - гэжэ Александр Бородулин шан барюулжа байгаад тэмдэглээ.
www.aginskoe.ru сайтһаа гэрэл зураг абтаба