670
Буряад Уласта газар үйлэдбэриин даадхал аша үрэтэй байһан ушарһаа энэ түсэл үшөө табан жэлдэ бэелүүлэгдэхэ. Энээн тухай Буряад Уласай Засагай газарай Түрүүлэгшын хүдөө ажахы хүгжөөлгын талаар орлогшо – Буряад Уласай хүдөө ажахын болон эдеэ хоолой сайд Даба-Жалсан Чирипов болон газар үйлэдбэриин даадхал хэгшэдэй үндэһэтэнэй эблэлэй юрэнхылэгшэ Корней Биждов гэгшэд «Алтан намар» гэһэн Ородой Холбоото Уласай газар үйлэдбэриин ХХ үзэсхэлэндэ уридшалан хэлсэбэ. Тус хэмжээ ябуулга Москва хотодо үнгэргэгдөө. Тиихэдэ Буряад Уласай хүдөө ажахын болон эдеэ хоолой сайдай орлогшо Юлия Дагданова хэмжээ ябуулгада хэбаадалсаһан байна.
Буряад Уласта газар үйлэдбэриин даадхал хүгжөөхэ талаар түсэл хүдөө ажахын яаман үйлэдбэриин даадхал хэгшэдэй үндэһэтэнэй эблэлтэй хамта 2016 оной һүүл багһаа бэелүүлнэ. Энээнһээ урид хэдэн жэлэй туршада талха таряаланда даадхал хэгдээгүй. Даадхалай түлөө түлбэринь үнэтэй байжа, даадхал хэдэг компанинууд улас дотор ажалаа ябуулха гэжэ һонирходоггүй байгаа. 2015, 2016 онуудта Буряад Уласта ган гасуур жэлнүүд тохёолдоо гээд һануулая.
2016 ондо Ородой Холбоото Улас дотор газар үйлэдбэриин даадхалай гүрэнэй дэмжэлгэтэй ниитэ нэгэ системэ ажаллажа эхилээ. Тиигэжэ Буряадай хүдөө ажахын яаман даадхалай үндэһэтэнэй эблэлтэй хэлсээ баталжа, энэ талаар байдал хубилаа.
2017 ондо талха таряаландаа даадхал хэһэн гурбан ажахыда ган гасуурһаа хохидолдо ороһон ушараар 6 сая түхэриг түлэгдөө. Байгша ондо 12,4 мянган гектар таряаланай талмай 99 сая түхэригэй даадхагдаа.
«Буряад Уласта хүдөө ажахын даадхал аша үрэтэй. Юундэб гэхэдэ, сентябрь һарада улас дотор саһан орожо, хохидолдо ороһон ажахынуудай дүрбэнэй нэгэниинь даадхал хэһэн байгаа», – гэжэ газар үйлэдбэриин даадхал хэгшэдэй үндэһэтэнэй эблэлэй юрэнхылэгшэ тэмдэглэбэ.
Буряад Уласта уларилай хубилалтаһаа хүдөө ажахынуудта хохидол үзүүлэгдэээ гэһэн долоон мэдүүлгэ хараалагдана гэжэ Корней Биждов хэлэбэ.
Байгша оной сентябриин 19-20-до улас дотор нойтон саһан орожо, 27 ажахын таряаланайнь зарим хубинь хюдагдаа. Буряад Уласай Бэшүүр, Хяагта аймагуудта тон ехээр саһан орожо, эндэ онсо байдалай гурим соносхогдоо. Тиихэдэ Тарбагатай, Мухар-Шэбэрэй аймагуудай ажахынууд баһал хохидолдо ороһон байна. Энэ талаар байдал октябриин 1-дэ Буряад Уласай Толгойлогшо Алексей Цыденовэй хүтэлбэри доро үнгэргэгдэһэн суглаанда хэлсэгдээ. Хүдөө ажахы үйлэдбэринүүдэй даадхал хадаа гүрэнэй тэдхэмжэдэ хүртэхэ талаар шухала эрилтэнүүдэй нэгэн байха ёһотой гэжэ уласай хүтэлбэрилэгшэ тэмдэглэһэн байна.
