749
Октябриин 18-да Буряад Уласта үүлтэртэ малай «Baikal Agro Farm» үзэсхэлэн эмхидхэгдэхэ. Тус хэмжээ ябуулга Буряад Уласай Засагай газар, хүдөө ажахын болон эдеэ хоолой яаман болон «Буряад Уласай мэдээсэлэй- методологическо түб» эмхидхэнэ.
Түрүү ажахынуудай үүлтэртэ мал үсхэбэрилгын амжалтанууд тухай олондо мэдүүлхэ, дүй дүршэлөөрнь хубаалдаха, тэрэнииень нэбтэрүүлхэ зорилготой үзэсхэлэн үнгэргэгдэнэ. Хүдөө ажахынуудай хүтэлбэрилэгшэд, мэргэжэлтэд, үүлтэртэ малай ажахынууд, хүдөө ажахын һалбариин болбосоролой эмхинүүд үзэсхэлэндэ хабаадахаяа уригданхай.
«Baikal Agro Farm» үзэсхэлэндэ үүлтэртэ малай гушаад ажахынууд хабаадаха. Хальмаг, сагаан толгойто казах, герефорд, симментал үүлтэрэй мал, Үбэр Байгалай нарин нооһото, буряад шэрүүн нооһото, «Бүүбэй» үүлтэрэй хонид, буряад морид, ашаа шэрэхэ ород агта хүлэг үзэсхэлэндэ табигдаха. Тиихэдэ туулай болон шубуудые үсхэбэрилдэг ажахынууд үзэсхэлэндэ хабаадаха. Эрхим үүлтэрэй мал мэргэжэлтэ шүүбэришэдэй комисси элирүүлхэ юм. Комиссиин бүридэлдэ Буряад Уласай хүдөө ажахын болон эдеэ хоолой яаманай түлөөлэгшэд болон эрдэмтэд орохо.
Үзэсхэлэнэй үедэ амитадые аргалха химиин болон биологиин бодосуудай, зоотехникын хэрэгсэлнүүдэй, хүдөө ажыхын үйлэдбэринүүдтэ болон фермернүүдтэ үзүүлэгдэдэг туһалажмын талаар секцинууд хүдэлхэ.
Хэмжээ ябуулгын үедэ үүлтэртэ мал худалдан абаха аукционууд, тамирша моридой харалган эмхидхэгдэхэ. Фермернүүд болон хүдөө ажахынууд үзэсхэлэнэй үедэ мал, техникэ, хэрэгсэлнүүдые худалдан абаха аргатай байха.
Буряад Уласай агропромышленнэ комплексын хүдэлмэрилэгшэдэй үдэртэ үүлтэртэ малай үзэсхэлэн дашарамдуулан эмхидхэгдэнэ гээд тэмдэглэлтэй.
Борис Балдановай гэрэл зураг
