675
Буряад Уласай аграрна үйлэдбэриин эдэй засагай һалбарида талха таряа ургуулга хадаа шухала үйлэдбэринүүдэй нэгэн болоно.
2018 оной октябриин 16-най мэдээсэлээр, 33 174 га талмайда 52 040 тонноорооһото таряан хуряагдаа. Август һарын һүүл багта хура бороон ороһон ушарһаа, талха таряа хуряалгын болзор хойнотоод байна гээд тэмдэглэлтэй. Үнгэрһэн жэлдэ орходоо, таряа хуряалган хоёр долоон хоногоор хойшологдоо. Тиигэбэшье Буряад Уласта 2017 ондо абтаһан ургасаһаа 70 тонноор ехэ ургаса абтаха гэжэ хүлеэгдэнэ. Орооһото ургамал эгээл һайнаар Ярууна аймагта (гектар газарһаа 29 центнер), Загарай аймагта (гектар газарһаа 23,1 центнер), Тарбагатай болон Байгал шадарай аймагуудта (гектар газарһаа 21 центнер) ургаһан байна.
Буряад Уласай Захаамин, Загарай, Баргажан, Түнхэн аймагуудта орооһото ургамал хуряагдаа.
Тиихэдэ огородой эдеэн болон хартаабха улас дотор хуряагдаһаар. 2017 ондо жэшэхэдэ, хартаабха 215,4 тонноор ехэ байха гэжэ багсаамжалагдана. Эгээл һайнаар хартаабха Мухар-Шэбэр аймагта (гектарһаа 276,9 центнер), Зэдэ аймагта (гектарһаа 205 центнер), Тарбагатай аймагта (гектарһаа 185 центнер) ургаһан байна. Огородой эдеэнэй эгээл һайн ургаса Байгал шадарай аймагта (гектарһаа 357,1 центнер), Мухар-Шэбэрэй аймагта (гектарһаа 288,8 центнер), Тарбагатай аймагта (гектарһаа 278,0 центнер) абтаа.
Буряад Уласай хүдөө ажахын эмхинүүд 52,3 тонно огородой эдеэ хуряажа абаһан байна. Үнгэрһэн жэлтэй жэшэхэдэ, энэнь 42% ехэ.
