Хори аймагай Майлада. Һургуулида түлеэ бэлдэхэ үедэ
Мармай Хамаевич Жамьянов тухай Аха ба Ярууна нютагуудаар дуулаагүй хүн үсөөн байһан байха. Байгша оной ноябриин 7-ой үдэр Мармай Хамаевич 90 наһа хүрэхэнь.
Мармай Хамаевич Ярууна аймагай Улхаса нютагта түрэһэн намтартай. Абань – Жамьян-Дагба Цындымуевич, эжынь - Хандажап Цыремпиловна хоёр табан үри хүүгэдые түрэжэ хүмүүжүүлһэн юм. Тэдэнэй нэгэн Мармай аха болоно.
Хэнэйшье мэдэһээр, энэ намар комсомолой бии болоһоор 100 жэл гүйсэхэнь. Мармай Хамаевич энэ тооһоо оройдоол арбан жэлээр дүү байна. Энэ комсомол эмхиин байгуулагдаһанһаа хойшо бүхы арадай ажахы һэргэжэ, һэльбэн шэнэлэгдэжэ эхилээ бшуу. Тиигэжэ Буряад Уласай хүгжэлтэдэ комсомолшуудай оруулһан хубита ехэ. Жэшээ болгон, Мармай Хамаевич тухай газетэдээ бэшэжэ, уншагшадтаяа танилсуулая.
Һая дайнай үнгэрөөд байхада, Нарһатын дунда һургуулида һураха үедөө Мармай Жамьянов комсомолой гэшүүн болоһон юм. Доржо Банзаровай нэрэмжэтэ багшанарай Буряад-Монголой дээдэ һургуулиин түүхын факультет дүүргэжэ, хүдэлхэеэ Ахын аймаг тэрэ эльгээгдэһэн байна. Тиигэжэ 1952 оной сентябриин нэгэнһээ Өөрлигэй һургуулида түүхын багшаар хүдэлжэ эхилээ. Багшанарай дуталдаһанһаа боложо, хажуугаарнь географиин, зурагай, черчениин багшаар, интернадай хүмүүжүүлэгшээр, аймагай лекторскэ бүлгэмэй хүтэлбэрилэгшөөршье хүдэлхэ саг болоо. Һуралсалаа тиихэ үедэ Ленинград хотын аспирантурада үргэлжэлүүлжэ, өөрынгөө дуратай археологи үзэжэ, профессор Алексей Окладниковтай экспедицээр ябахаб даа гэжэ бодомжолжо байтарнь, һаяхана коммунис намай гэшүүн болоһон байхадань табингүй, Ахын аймагай болбосоролой таһагай хүтэлбэрилэгшөөр томилбо. Хэн тэрэ үедэ залуу бэрхэ мэргэжэлтэдые табиха дуратай байба гээшэб. Тиигэжэ археологи тухай наһаараа хүсэһэн һаналаа мартажа, хамсыгаа шаман, шэнэ хүтэлбэрилэгшын ажалда хүдэлжэ захалаа.
Сэсэрлиг, һургуули бариһан габьяатай
Нэн түрүүн аймагай түб Өөрлигтэ хүүгэдэй сэсэрлиг бариха гэжэ бодобо. Байһан хуушан сэсэрлигэй байшаниинь бутаржа унажа байба. Тиигэжэ шэнээр хүүгэдэй сэсэрлиг баригдаба. Хүтэлбэрилэгшын дүй дүршэл үгы дээрэһээнь, Мармай Хамаевичта барилга эмхидхэжэ, ажалшадай ой модо отолжо, үндэр түгсүүлнүүдые орхиһонойнь түлөө 5572 түхэриг мүнгэнэй яла ашагдаба, удаань медицинскэ саарһагүйгөөр тогоошониие ажалда абаһан байжа, үшөө 50 түхэриг нэмэгдэбэ. Үнэхөөрөөшье, залуу мэргэжэлтэнэй хүтэлбэрилэгшэ боложо хүдэлхэнь хэзээдэшье хэсүү байгаа ёһотой. Тиимэшье бэлэн юумэн хаанаһаа байхаб даа. Ажал хадаа ажал. Теэд залуу охин дундаа ябаһан наһандаа энэ ажалдаа шармайн хүдэлжэ эхилээ. Зүгөөр гансашье сэсэрлиг бэшэ, хажуугаарнь долоон жэлэй һургуулинь баһа хуушарһан байба бшуу. Эндэ аймагай бүхы хүүгэд гурбан ээлжээн боложо һурадаг, хажуугаарнь шала угаадаг, сэбэрлэдэг ажалшад бага салин дээрэ ехэхэн ажал хэжэ хүдэлдэг байгаа. Тиимэһээ аймагай соведэй зүблөөнүүд болон аймагай комитедэй намай пленумүүдтэ шэнэ һургуули бариха тухай асуудал Мармай Хамаевич табиһан байна. Тиихэ үедэ һая аймагай исполкомой түрүүлэгшээр томилогдоһон Я.Ш.Гулгонов, аймагай комитедэй намын нэгэдэхи секретарь П.Э.Ринчинов гэгшэд намай Обком ба уласай Министрнүүдэй Соведтэ хандахадань, тэдэнь Эрхүүгэй Гражданпроект руу хандагты гэһэн байба. Теэд тэдэнь 12-13 жэлэй туршада ээлжээ хүлеэхэ болохот гэһэн харюу үгөө. Тиихэдэнь Мармай Хамаевич һургуулиингаа захиралтай сугтаа һургуулида шэнэ залгалаа бариха тухай аймагай комитедэй, аймагай исполкомой намууд руу мэдүүлгэ бэшэбэд. Тиигэжэ энэ асуудал шиидхэгдэжэ, колхоз бүхэн (тэрэ үедэ 9 колхоз байгаа) хоёр-хоёр барилгашадые үгэхэ гэжэ хөөрэлдөөд байтарнь, колхозойнь түрүүлэгшэ Сыбык Дарбаков түсэлгүйгөөр барилга эхилхэгүйбди гээд таһа арсаба ха. Тиихэдэнь Мармай Хамаевич өөрөө найман ангиин багтахаар түсэл зохёожо, дахин дүтэлхэдэнь, Сыбык Сыденович баталалгагүйгөөр болохогүй гэбэ. Иихэдэнь яаха гээшэб? Теэд яаха аргагүй хамаг харюусалгыень бэе дээрээ абажа үйлэдэхэ гэжэ шиидээд, өөрынгөө тамга ба гар табижа, 1957-1958 онуудта һургуулида шэнэ залгалаа баригдаһан байна. Жараад жэлэй үнгэрөөшье һаа, мүнөө болотор тэрэ һургуулидань хүүгэд номоо үзэһөөр зандаа. Мармай Хамаевичай 2013 ондо Аха нютаг айлшаар ошоходонь, тэрэ һургуулинь зандаа байжа байхадань, хүхижэ гэртээ бусаһан бшуу.
Аха аймагай Болбосоролой таһагай дарга Мармай Хамаевич Жамьянов
Залуу мэргэжэлтэдые залан дэмжэгшэ
Тэрэ үедэ үшөө нэгэ шиидхэгдээгүй асуудалнуудай нэгэн гэхэдэ, хүдэлхэеэ ерэһэн ажалшад оройдоо тогтодоггүй байба.
“Холын Ахын аймаг руу олон лэ залхуу, архида дуратай багшанар сүлүүлэгдэдэг байгаа. Хоёр жэлэй туршада иимэ мэргэжэлтэдтэй тэмсэхэ саг болоо, тиигэжэ 11 хүн ажалһаа болюулаа. Өөрынгөө һанаанда заал һаа хүрэжэ, Горький, Москва хотонуудта багшанарай дээдэ һургуули дүүргэһэн залуу мэргэжэлтэдтэй болоо бэлэйбди. Һургуулиин захиралнууд баһа байд гээд лэ һэлгэгдэдэг байгаа. Зүгөөр һая Улаан-Үдын багшанарай дээдэ һургуули дүүргэһэн Дондок Дашиевич Лыгденовые урин абаашажа, захирал болгожо томилоо һэм”, - гэжэ наһатан хөөрэнэ.
Ахын аймагай ажаһуугшадай тоо үсөөншье һаа, тэдэ булта аймагаар тарашанхай байгаа. Тэрэ сагта хаанаһаа автоунаа байхаб, бүхы унаань морин лэ байгаа һааб даа. Тиигэжэ нэгэшье үхибүү һуралсалгүй үлөөхэгүй гэжэ шэнээршье ба һэльбэн заһагдажа байһан эхин шатын һургуулинуудые мори унажа эрьехэ саг һайса болодог байгаа ха.
“Тэрэ сагай байдал гээшэ хаанашье адлирхуу байгаа ха юм. Хамтын байрада байрладаг үхибүүд ганса зутараан сай уугаад, һарын нэгэ дахин, хаа-яа хоёр дахин талхатай шүлэеэ эдидэг байгаа. Үхибүүдэй гэдэһээ үлдэхэгүйн тула эдеэнэйнь түлбэри 30 солхообһоо 60 хүрэтэр нэмэхээ һанахадам, гэртэхин ба колхозой түрүүлэгшэнэр арсабад. Бага салинтай, олон үхибүүдтэй гэртэхин түлэжэ шадахагүйгөө мэдүүлээ һэн. Аха нютагай уларил ото һэлгэжэл байдаг дээрэһээ хамтын ажахы болохогүй - тэрээн тухай һанахашье юумэн үгы. Ажаһуугшадай ори ганса олзонь гэхэдэ, үбэлэй сагта Иркут ба Аха гэһэн мүрэнүүдэй хүрэхэдэ, райпогой ашаа шарга тэргээрээ шэрэдэг байгаа. Тиихэ үедэ аймаг соо ори ганса шарга тэргэ байгаа. Энэньшье баһа бэлэн хэрэг бэшэ, хүндэ хатуу, жэшээнь, нэгэ хүндэ ашаатай дүрбэн мори даалгагдаха, тэрэнь гэнтэ саһа, һалхи шуурганай болобол, урда ябаһан шаргаа харахагүй. Ехэнхидээ эдеэнэй зүйлнүүд шэрэгдэдэг: талхан, гутал, хубсаһан, архи. Эдээн сооһоо тон һайнаар наймаалагдадаг юумэниинь гэхэдэ, архинь. Һуралсалда хэрэгтэй номуудые шэрэжэ үгэхэгүй, юуб гэбэл, номуудые шэрэхэдэ, нэгэшье олзо ородоггүй тула, тэрээн дээрэһээ райпогой түрүүлэгшэтэй һайса тоосолдожо байжа, һанаһанаа бэелүүлдэг һэм”,- гэжэ ахатан тэмдэглэнэ.
Урдалхуу һанаан бодолтой
Олон лэ юумэ хөөрүүлжэ бэшэхээр байна, теэд сониноймнай хуудаһанда хүнэй бүхы намтар яагаад багтаажа бэшэхэбши даа. Тиибэ яабашье, хэдэн жэшээнүүд дээрэ тогтое. Мармай Хамаевич улас дотор тон түрүүшын Өөрлигэй һургуули “Украина” гэһэн кинопроектортэй болгоо, “Артек” лагерь ошохо хоёр путёвко Обком комсомолой шугамаар абажа шадаа бшуу. Теэд тэдэ хоёр үхибүүдэй гэртэхиндэ мүнгэн үгы дээрэһээнь райкомой ба райисполкомой намуудай һайгаар хоёр-хоёр мянган түхэриг мүнгэ Мармай Жамьянов нэхэжэ абажа шадаа. Зүгөөр эдэ хоёрые Улаан-Үдэ хүрэтэр асарха хүнэй олдохогүйдэ, өөрынгөө мүнгөөр абажа ерэһэн байна. Томо ахалагша ангинуудай хүүгэдые Өөрлиг-Байгал-Эрхүү-Улаан-Үдэ гэһэн харгыгаар түрүүшын аян замай поход эмхидхэһэн бшуу. 1957 ондо тон түрүүшын ГАЗ-66 гэһэн авто-унаатай болгоһон түүхэтэй.
Мармай Хамаевичай залуу һайхан хаһань долоон жэлэй туршада Аха һайхан нютагта үнгэрһэн байна. Ехээр үбдэжэ, наашаа Улаан-Үдэ ерэһэн юм. Тэрэнэй удаа гараа хабсараад һуугаагүй даа. Удаань Яруунын, Северо-Байкальскын, Баунтын аймагуудай һургуулинуудаар хүдэлхэдөө, баһа шэнээр һургуулинуудые барижа, тэдээндээ шэнэ түхеэрэлгэнүүдые абажа табиха сагууд болоо.
1961 ондо Яруунын Тэлэмбын найман жэлэй һургуулиин захиралаар томилогдоо. Эндэхи һургуулиин байшан хуушан байһан дээрэһээ шэнээр найман жэлэй һургуули барюулаа, шэнэ ЗИС- 5 авто-унаатай болгоо. Орхисооной хоёр таһалгатай томо гэр заһабарилжа, һургуулиин мастерской болгоһон байна.
1964 ондо Нарһатын дунда һургуулиин захиралаар хүдэлхөөр эльгээгдэбэ. Энэ һургуули 1200 шабинартай байгаа. Һуралсалай жэлэй хугасаа соо гурбадахи захиралынь боложо, хүдэлжэ эхилээ. Эндэ нэн түрүүн нэгэ шабииень һургуулиһаань болюулаа, гурбандань шанга выговор үгэжэ, сэгнэлтэнүүдыень доошонь болгоходонь, һургуулинь журамтай боложо эхилһэн байна. Эндэшье баһа шэнэ һургуули барюулаа. Улаан-Үдэһөө шэнэ бараа ба түхеэрэлгэнүүдые абаашаһан бшуу.
Тэрэнэй удаа Улаан-Үдэ бусажа, индустриальна-багшанарай техникумэй захиралай орлогшоор, хүдөө ажахын дээдэ һургуулида һуралсалай таһагые даагшаар хүдэлөө. 1967 ондо дахинаа һургуули руу бусаха саг болоо. Тиигэжэ хоёр жэлэй туршада Романовка нютагта Витимэй дунда һургуулида багшалаа, 1968 ондо найман жэлэй Майлын һургуулиин, удаань Зунхурайн дунда һургуулиин захиралаар, Баунта аймагта хамтын байрын эрхилэгшээр, һүүлдэнь найман жэлэй Усть-Джилиндын һургуулиин захиралаар хүдэлөө. Эдэ нютагуудаар баһа шэнэ һургуулинууд баригдажа, тэндэнь шэнээр түхеэрэлтэнүүд абажа табигдаһан бшуу.
Эдэ олон жэлнүүдэй хугасаа соо 3,5 мянган үхибүүдтэ ном һудар заагаа. Эдэнь СССР үеын гушан яһатанай хүүгэд болоно. Үхибүүдтэ сэгнэлтэнүүдые табихадаа, ноёной гү, али юрын ажалшанай үхибүүн гэжэ илгангүй, ганса ухаагаарнь, мэдэсээрнь сэгнэдэг байгаа.
Өөрөө Мармай аха Раиса Афанасьевна нүхэртэеэ гурбан һайхан үхибүүдые түрэжэ, хүлыень дүрөөдэ, гарыень ганзагада хүргэжэ түбхинүүлээ, хүмүүжүүлээ. Булта аба эжынгээ харгыгаар багшанарай дээдэ һургуули дүүргэһэн, харин мүнөө наймаа эрхилдэг ажалтайнууд.
Ехэнхи шабинарынь бэрхэ мэргэжэлтэд боложо, олон шэглэлээр хүдэлнэ: эрдэмэй, экономикын, медицинын гэхэ мэтэ. Тэдэнэй тоодо профессорнүүд, багшанар, эмшэд, ажахын хүтэлбэрилэгшэд, дээдэ һургуулинуудай, барилгын эмхинүүдэй захиралнууд байна. Улас дотороо ба тэрээнһээ гадуур хүдэлдэг, уласай, СССР-эй, РСФСР-эй үндэр нэрэ зэргэнүүдтэ хүртэһэн шабинарынь олон.
Дайнай ветеран Мармай Хамаевич Жамьянов гүрэнэй нэрэ зэргэдэ хүртөөгүйшье һаа, бүхы наһаяа эрдэм һуралсалда зорюулжа, намай уряалаар, Социалис Ажалай Герой Валентина Гагановаһаа жэшээ абан хүдэлөө бшуу.
Гэрэл зурагууд гэр бүлын архивһаа абтаба