Буряад Уласта «Эхэ хэлэн - манай баялиг» гэһэн можо хоорондын XXV наадам үнгэргэгдэбэ

Байгша оно октябриин 20-до Ивалгын дасанда «Эхэ хэлэн - манай баялиг» гэһэн можо хоорондын XXV наадам үнгэргэгдөө. Ородой Холбоото Уласай заншалта Сангхын үүсхэлээр эмхидхэгдэдэг наадамые Буряад Уласай Толгойлогшын болон Засагай газар дэмжэһэн байна. Хэмжээ ябуулгын эбээн тэдхэгшэ - «Буряад Үнэн» хэблэлэй байшан.

Буряад хэлэ сахин хүгжөөхэ зорилготой эмхидхэгдэдэг мүрысөөндэ Буряад уласай 15 аймагуудай, Эрхүү можын, Үбэр Байгалай хизаарай һурагшадай 55 бүлгэм хабаадаа.

«Эхэ хэлэн - манай баялиг» гэһэн мүрысөөнэй нээлгын баяр ёһолол Дамба Даржа Заяевай «Даши Чойнхорлин» гэһэн ехэ һургуулида үнгэргэгдөө. Ородой Холбоото Уласай заншалта Сангхын Пандида Хамба лама Дамба Аюшеев, Буряад Уласай Засагай газарай Түрүүлэгшын орлогшо Баир Цыренов, соёлой сайд Соёлма Дагаева мүрысөөнэй эхиндэ баярай үгэнүүдые хэлэбэ. Хэмжээ ябуулгада хүндэтэ айлшаар Буряадай сумоист Анатолий Михаханов буугаа.

Буряад Уласай Засагай газарай зүгһөө баярай Баир Цыренов Хамба лама Дамба Аюшеевтэ баярай үгэнүүдые хэлэжэ, ехэ хэмжээнэй удха шанартай мүрысөө эмхидхэнэт гэжэ тэмдэглэбэ.

«Энэ мүрысөө саашадаа дэмжэхэбди. Үхибүүд дуратайгаар эндэ хабаадана», - гэжэ Баир Цыренов хэлэбэ.

Мэдээжэ ород дуунуудые буряад хэлэн дээрэ оршуулжа дуулаха гэһэн даабари мүрысөөнэй шэнэ шатада оруулагдаа.

«Мэдээжэ дуунуудые буряад хэлэн дээрэ дуулахат. Хэгдэһэн оршуулга, гүсэдхэлгыетнай сэгнэхэбди. Удаадахи мүрысөөндэ ерэхэдээ, түрэһэн нютаг, мэдээжэ хүнүүд тухайгаа рассказуудые асархат. Эрхим ажалнуудтнай «Буряад Үнэн» сониндо хэблэгдэхэ, «Буряад ФМ» радиодо дамжуулагдаха. Танай ажалнуудые суглуулжа, саашадаа ном болгожо хэблэхэбди», - гэжэ Дамба Аюшеев хэлэбэ.

Үхибүүд мүрысөөнэй шатануудта хубааржа, эрдэм мэдэсэеэ, бэлиг шадабарияа харуулаа. Тэдэнэр «Уран гартан», «Уран дархан», «Уран баримал», «Хамба ламын шан абалгын тэмсээн», буряад хэлэ хүгжөөхэ тэмсээнүүд: хонин талын «Блиц-урилдаан», «Бэлигүүн толи», үхэр талын «5 хушуун мал тухай үгүүлэл», «Уран бэлигтэй, ульгам хэлэтэй» гэһэн шатануудта хабаадаа.

Мүрысөөнэй дүнгүүдээр Бэшүүр аймагай Харланай үхибүүдэй бүлэг түрүүшын һуури эзэлээ. Хэжэнгэ аймагай Хэжэнгын дунда һургуулиин «Жэмбүүр» бүлгэм хоёрдохи һуурида хүртөө. Хэжэнгэ аймагай Хэжэнгын дунда һургуулиин «Үетэн» бүлгэм гурбадахи һуури эзэлээ.