871
2019 ондо Буряад уласта «Болбосон түхэлтэй хотын оршон байгуулга» гэһэн түсэл бэелүүлгэдэ федеральна бюджетһээ 319 түхэригһөө дээшэ һомологдохо, байгша ондо орходоо, энэнь 50 хубяар дэшэлээ. Буряад Уласай барилгын болон гэр байрын ажахы шэнэдхэлгын сайдай нэгэдэхи орлогшо Евгений Коркин түсэлэй түсэбүүд болон дүнгүүд тухай хэлэбэ.
«Болбосон түхэлтэй хотын оршон байгуулга» гэһэн түсэлөөр мүнгэ һомололго дээшэлүүлэгдээ, тиимэһээ хэгдэхэ ажал хубилгагдаха. Ажаһуугшадтай хамта ехэ ажал ябуулхабди. Буряад Уласай ажаһуугшадые энэ түсэлдэ эдэбхитэй хабаадахынь талаар ажал ябуулхабди. Өөрын гараар хэгдэһэн юумэндэ хүн гамтайгаар хандана ха юм», - гэжэ Евгений Коркин тэмдэглэбэ.
2018 ондо Буряад уласта «Болбосон түхэлтэй хотын оршон байгуулга» гэһэн түсэл бэелүүлгэ түгэсэхэ болонхой. Олон байратай гэрнүүдэй шадархи 120 хоройдо, олониитын 76 дэбисхэртэ болон хотын 4 паркда заһабарилгын ажалнууд хэгдээ. Мүнөө эдэ газарнуудые ашаглалгада тушааха талаар шалгалта үнгэргэгдэнэ.
Байгша ондо Хори аймагта «Геройнуудай аллей» нээгдээ. Захаамин хотодо фонтан табигдаа, шатар наадаха ябаган хүнүүдэй талмай нээгдээ.
«Кабанск аймагта 2, Сэлэнгэ, Тарбагатай, Түнхэн аймагуудта нэгэ-нэгэ гэр шадархи хорой шалгаха үлөө. Тиихэдэ олониитын 23 газар болбосон түхэлтэй болгохо талаар ажалнууд хэгдэнэ. Ехэнхи хубинь ашаглалгада тушаагдана», - гэжэ Евгений Коркин дүн согсолбо.
Ородой Холбоото Уласай Юрэнхылэгшын майн тогтоолнуудые бэелүүлгын хэмжээндэ «Болбосон түхэлтэй хотын оршон байгуулга» программа 2019 онһоо 2024 он болотор «Гэр байра болон хотын оршон» гэһэн үндэһэтэнэй түсэлөөр бэелүүлэгдэхэ. Буряад Уласай барилгын болон гэр байрын ажахы шэнэдхэлгын яаман Ородой Холбоото Уласай барилгын яамантай хамта энэ болзорто хэгдэхэ ажалай болон мүнгэ һомололгын хэмжээ байгуулаа. Мүнөө Буряадай барилгын яаманда 2019 ондо уласай аймагуудта мүнгэ хубааха, Буряад Уласай гүрэнэй программада хубилалтануудые оруулха талаар ажал ябуулагдана.
«Гэр байра болон хотын оршон» гэһэн үндэһэтэнэй түсэлэй паспортдо бага хотонууд болон түүхэтэ һууринуудай бүхэроссиин мүрысөөндэ жэл бүри мүнгэ һомологдохо гэжэ хараалагданхай. Бүхэроссиин мүрысөөндэ хабаадаха тухай ажаһуугшадһаа мэдүүлгэнүүдые нютагай засагай байгууламжанууд 2018 оной декабриин 1 болотор оруулха ёһотой. 2019 оной июниин 1-дэ илагшад соносхогдохо.
Байгша ондо Закаменск, Гусиноозёрск, Бабушкин, Северобайкальск, Хяагта хотонууд бүхэроссиин мүрысөөндэ хабаадаа һэн гэжэ һануулнабди. Хяагта хотодо мүрысөөндэ илахын түлөө хэдыхэн лэ балл дуталдаһан байна.
«2019 ондо эдэ хотонууд дутуу дундануудаа усадхажа, мүрысөөндэ баһал хабаадаха», - гэжэ Евгений Коркин хэлэбэ.
