Элитэ буряад эрдэмтэн, гүрэнэй, ниитын ажал ябуулагша ба уран зохёолшо Базар Барадинай 140 жэлэйнь ойн баярта зорюулагдаһан “Буряад хэлэн: түүхэ ба хүгжэлтэ” гэһэн можонууд хоорондын эрдэм шэнжэлгын хуралдаан Ага тойрогто үнгэрөө.
Эндэ Ага тойрогой, Буряад Уласай болон Эрхүү можын эрдэмтэд, багшанар, буряад хэлэндэ хабаатай мэргэжэлтэд хабаадаа. Үдын урда тээ пленарна зүблөөн үнгэрбэ.
Нэн түрүүн Ага тойрогой захиргаанай ниигэмэй хүтэлбэриин таһагай дарга Билигма Будаева сугларһан айлшадаа хани халуунаар амаршалжа, Агын Буряадай тойрогой буряад хэлэнэй хүгжэлтэ, байгуулга тухай элидхэл хэбэ.
Ага тойрогто жэлэй хоёр дахин буряад хэлэнэй габшагай һара үнгэрдэг юм. Сентябриин тэнһээ эхилээд, элдэб хэмжээ ябуулганууд үнгэргэгдэжэ, иимэ эрдэм дүршэлгын хуралдаагаар дүн согсологдодог. Харин Сагаан һарын нааданда зорюулагдажа, үшөө буряад хэлэндэ хабаатай хэдэн хэмжээнүүд эмхидхэгдэдэг. Жэл бүри түрэлхи хэлэеэ хүгжөөлгын шэнэ хэмжээнүүд нэмэгдэжэ, габшагай һара үргэдхэгдэдэг.
- 2014 онһоо эхилээд, буряад хэлэ хүгжөөлгэдэ 200 мянган түхэригһөө эхилээд, мүнөө 680 мянган түхэриг засаг түрын талаһаа гаргашалагдажа, олон хэмжээ ябуулганууд бүтээгдэнэ. Эхин шатын ангинуудай болон 7-8-10-дахи ангинуудта шудалха шэнэ технологиин аргаар бүтээгдэһэн номууд абтагдаа, - гэжэ Билигма Батордоржиевна мэдээсэбэ.
Урда жэлнүүдтэ үнгэргэгдэһэн энэ хуралдаанда оруулагдаһан һанамжа дурадхалнууд хараада абтагдажа, шэнэ һалбариин секцинүүд энэ үдэр ажаллана. Тиигэжэ “Базар Барадинай эрдэм гэгээрэлэй ба ниитэ хүгжэлтэ”, “Хэшээлһээ гадуур һуралсалда үхибүүдэй сэдьхэл ба оюун ухаа хүгжөөхэ онол арга тухай”, “Базар Барадинай Ага нютагай соёлой ба түүхын хүгжэлтэдэ оруулһан нүлөө” гэһэн заншалта сэдэбүүдһээ гадуур “Үндэһэн тамирай хүгжэлтэ”, “Үхибүүдые хүмүүжүүлхын гэр бүлын заншалнууд” гэһэн шэнэ һалбаринууд байгуулагдаа.
Буряад хадаа түрэл хэлэеэ шудалха
Энэ хуралдаанда буряад хэлэнэй саашанхи хүгжэлтэдэ шиидхэгдэхэ шухала олон асуудалнууд тодоруулагдажа, буряад хэлэнэй байдал һайжаруулгын гол асуудалнууд, үхибүүдтэ буряад хэлэ зааха элдэб шэнэ арга зүй (методико), оршон сагай эрилтын шэнэ онол аргануудые хэрэглэжэ, саашанхи хүгжэлтэдэнь нүлөө оруулха тухай хэлсэгдээ.
Хэрбэеэ анхан сагта буряад хэлэнэй хүгжэлтэ гол түлэб эрдэм һуралсалай хараада табигдадаг һаа, мүнөө үедэ гэр бүлын харюусалга хандасаһаа тон ехээр дулдыдана гэжэ мэдэрдэг болоо.
- Юундэб гэхэдэ, гэртэхин тон түрүүшын багшанар гээшэ. Түрэл хэлэеэ мэдэхэгүй, хэлэдэггүй гэртэхин нүгэл хэжэ байһандал адли гэжэ тоологдодог. Эртэ урда сагһаа аба эжынэр үри хүүгэдээ ерээдүй байдалда дадхаажа, һургаха, мэдэсэ шадабари ойлгуулха ёһотой байгаа. Оршон тойронхи байгаалиин байдал, ёһо гурим, арадай һургаал - түрэлхи хэлэн соо ха юм даа. Теэд түрэлхи хэлэеэ үхибүүдтээ заагаагүй гэртэхин үхибүүгээ дутуу хүмүүжүүлһэндэл адли болоно бшуу, - гэжэ Ага тойрогой захиргаанай ниигэмэй хүтэлбэриин таһагай дарга Билигма Будаева онсолбо.
Эдэ болон үшөө олон мүнөө сагта бүхы буряад зоной һанаа зобооһон асуудал тухай энэ хуралдаан дээрэ хабаадагшад мэдээсэһэн байна.
Үнэхөөрөөшье үндэһэн хэлэеэ мэдэнгүй, шудалангүй үндыһэн залуу түрэлхид саашадаа ямар заншалаар өөһэдынгөө үхибүүдые хүмүүжүүлхэ болоноб даа? Дутуу хүмүүжүүлэгдэһэн үхибүүд дутуу эрдэм мэдэсэ абажа, үндэһэн яһанайнгаа, угайнгаа захяа һүлдэ уһа руу хаяхал...
Хуули зүб мүрөөр тайлбарилха
Мүнөө зунай хаһада Федеральна Гүрэнэй стандартын ёһоор, 273 дугаар хуулида шэнэ нэмэлтэ хубилалтанууд оруулагдаа. Тэрэниие арад зон буруугаар тайлбарилжа магад. Тиимэһээ багшанар, засаг түрэ, эрдэм һуралсалай мэргэжэлтэд, олондо мэдээсэл тараадаг эмхинүүд гээд арад зондоо, илангаяа залуу гэртэхиндэ зүб мүрөөр ойлгуулха тухай тойрогой захиргаанай социальна хүтэлбэриин таһагай дарга Билигма Будаева онсолон тэмдэглээ.
- Манай тойрогто буряад хэлэнэй багшанартай хамта сугларжа хөөрэлдөөбди. Энэ хуулиин нэмэлтэ буруугаар ойлгогдожо байна. Залуу гэртэхин үхибүүмнай буряад хэлэ үзэхэ, үзэхэгүй гэһэн асуудалда һэлгэлтэ болоо гэжэ буруу ойлгоно. Хүн бүхэн түрэл хэлэеэ шэлээд үзэхэ гээд табигдаһан хубилалта болоно. Энээниие бүхы зондо ойлгуулжа, мэдүүлхэ шухала, - гэжэ Билигма Батордоржиевна мэдээсэбэ.
Зүб лэ даа, ши ямар яһанайбши, тэрэл яһанай үндэһэн хэлэеэ түрэл хэлэмни гэжэ мэдэрхэ, үгы гэбэл, уг гарбалдаа урбаһан мэтэ болоно ха юм. Тиимэһээ хара багаһаань яһатанай гүн үндэһэн мэдэрэл хүмүүжүүлхэ хэрэгтэй. Һурагшадай дунда түрэлхи хэлэеэ шэлэн шудалалга гэртэхинэй, олониитын, засаг түрын буряад хэлэнэй байдалда, түрэлхи хэлэеэ мэдэхэ, шудалха, үзэхэ мэдэрэл байгуулха хандасаһаа эндэ дулдыдана ха юм. Түрэлхи һайхан хэлэеэ үзэхэ, шудалха, хүгжөөхэ асуудал манайл өөһэдын мэдэлэй.
Хэлэ мэдэхэгүйшүүлэй гэм бэшэ, гай гээшэ
Буряадай гүрэнэй ехэ һургуулиин Буряад хэлэ хүгжөөхэ түбэй хүтэлбэрилэгшэ, түүхын эрдэмэй доктор Александр Елаев хабаадагшадые ноябрь һара соо Улаан-Үдэдэ үнгэргэгдэхэ Буряад хэлэнэй 2 дугаар хуралдаанда (форум) уриба. Эндэ зүбшэгдэхэ гол түлэб сэдэбүүдые тайлбарилан хэлэжэ үгөөд, хуралдаан ниитэ бодолгын ажал ябуулгада гүнзэгы удхатай байхыень онсолон тэмдэглээ.
- Мүнөө сагта буряад хэлээр үнгэржэ байһан хуралдаанда ород хэлээр дуугаржа байха ушар таатайшье бэшэ байна. Хэлэ мэдэхэгүй хүнэй гэм бэшэ, бултанай ехэ гай гээшэ. Ород хэлэндэ зүрилдөөтэ байдал диилэхэгүйбди. Тиимэһээ энэ манай мүнөөдэрэй байдал. Агуу эрдэмтэн Базар Барадинай жэшээгээр бидэ ямаршье хүшэр дабаануудые дабажа, буряад хэлэеэ хүгжөөхэл ёһотойбди. Өөрынгөө шүлэн соо бусалжал байнгүй, засаг түрын дэмжэлтын талаар ажал ябуулхал шухала, - гэжэ Александр Афанасьевич мэдээсэбэ.
Мүн лэ эрдэмтэн Буряадай элитэ эрдэмтэн, уран зохёолшо, ниитын ажал ябуулагша Базар Барадинай ажаябуулга Буряад орондол үнгэрһэн хадань, энэ хуралдаан Буряадта үнгэргэгдэхэл байгаа гэжэ хэлээд, Ага нютагайхидта нютаг хүбүүнэйнгөө нэрэ мүнхэлэн, ниитэ ажал ябуулжа байһандань баярые хүргэбэ.
Ердын нааданда уриба
Эрхүү можын Байгал шадархи арадуудай соёл хүгжөөлгын мэдээсэлэй болон инновациин таһагай хүтэлбэрилэгшэ Надежда Елтомоева эрдэмэй дүршэл- гын хуралдаанда хабаадагшадта хандажа, Эрхүү можодо үнгэргэгдэдэг заншалта Ердын нааданууд тухай мэдээсэбэ.
- Ердын нааданууд болбол эртын урда сагай манай арадай заншалта наадан гэжэ буряадай эрдэмтэд Матвей Хангалов болон Дашинима Дугаров хоёрой эрдэмтэ ажалнуудаар дамжуулагдаа. Эдэ бүгэдые үндэһэлэн, энэ наадаяа һэргээгээбди. Дашинима Санжиевич “Ердын наадан хадаа ганса буряад арадай бэшэ. Бүхы Евразиин арадуудай заншалта байдалай наадан” гэжэ тэмдэглэдэг байһан. Тиимэһээ бидэ бүхы дэлхэйн арадуудай хабаадалгатай хэмжээ ябуулга болгонхойбди. Тус наадан Ород гүрэнэй болон Евразиин арадуудай ассамблейн харзалгада абтагданхай. 2017 онһоо Ород гүрэнэй аяншалгын хэмжээ ябуулгануудай литэдэ оруулагданхай, - гэжэ мэдээсэбэ.
Шэнжэлэгдээгүй сэдэбүүд олон
Буряадай гүрэнэй ехэ һургуулиин багша, хэлэ бэшэгэй эрдэмэй кандидат Лариса Халхарова Дорно дахинай түүхэ, хэлэ шэнжэлһэн, олониитын, гүрэн түрын ажал ябуулагша, Буряад-Монгол Уласай гэгээрэлэй түрүүшын комиссар байһан Базар Барадинай түүхэтэ намтар тухай элидхэхэдээ, гол түлэб бэлигтэй уран зохёолой талаар “Базар Барадинай уран һайханай юртэмсэ” тухай һонирхолтойгоор мэдээсэбэ. Үнэхөөрөөшье, Базар Барадинай олониитын ажал ябуулгадань хабаатай эрдэмтэдэй олон шэнжэлгэнүүд бии, харин тэрэнэй уран зохёолнууд тухай шэнжэлгэнүүд тон үсөөн. Тиимэ һэн тула Лариса Цымжитовна эдиршүүлдэ энэ сэдэбээр шэнжэлгын ажал ябуулхыень дурадхаа. Тиигэжэ Базар Барадинай зохёохы зам манай буряад уран зохёолой түүхэдэ ямар өөрын хубита оруулһан гээшэб гэжэ тодорхойгоор мэдээсэбэ.
Зүблөөн дээрэшье, мүн эмхидхэгдэһэн элдэб шэглэлэй дүхэриг дээрэ Агын Буряадай тойрогто буряад хэлэ хүгжөөхэ ажалда багшанарай үүргэ тухай, хэшээлһээ гадуур һуралсалда үхибүүдэй сэдьхэл, оюун ухаа хүгжөөхэ онол арганууд тухай болон буряад хэлэ хүгжөөлгын талаар амин шухала асуудалнууд зүбшэгдөө. Базар Барадинай түүхэтэ намтар, буряад хэлэнэй хүгжэлтэдэ тэрэнэй оруулһан нүлөө тухай мэдээсэгдээ.
Жэшээтэ хэшээлнүүд дүршэл олгуулна
Хамтын суглаанай удаа зохёохы ажалай жэшээтэ хэшээлнүүд эмхидхэгдээ. Эндэ “Мориной тоног хэрэгсэлнүүдые һураар бүтээхэ дүримүүд” (багша - Жамбал Дашацыренов), “Заншалта буряад хубсаһанай ёһо” (багша – Юмжидма Дашинимаева), “Буряад маягтай хүүхэлдэйнүүдые бүтээхэ онол арганууд” (багша-Дулма Балданова) гээд дүршэлэй хэшээлнүүдтэ һурагшад, оюутад, юрыншье зон ерэжэ, олоороо хабаадаа. Энэл үедэ Агын социальна һалбариин ажалтадай мэргэжэл дээшэлүүлгын институдай байшангай 2-дохи дабхарта “Буряад хэлэ үзэлгэдэ сэсэрлиг – эхин шата – дунда шата холбоо ябуулга” гэһэн сэдэбээр дүхэриг шэрээ эмхидхэгдээ. Эндэ сэсэрлигүүдэй, эхин шатын болон дунда һургуулиин шатануудта буряад хэлэ шудалалгын жэшээнүүд харуулагдаа. Ага тосхоной “Үльгэр” сэсэрлигэй, Агын 1-дэхи, 2-дохи дунда һургуулинуудай болон Агын тойрогой интернат-гимназиин буряад хэлэ шудалалга тухай мэдээсэлнүүд табигдаа. Дүхэриг шэрээгэй дүн согсолходоо, буряад хэлэнэй сэгнэлтын онол аргын жаса байгуулгын ажал үргэлжэлүүлхэ, хэлэ шудалалгын хэдэн шатын системэ байгуулха, түрэлхи хэлэ шудалалгада оршон үеын шэнэ оньһото аргануудые хэрэглэлгэ улам гүнзэгырүүлхэ гэһэн асуудалнууд хэлсэгдээ. Буряад хэлэ шудалалгаар мүнөө ашаглагдажа байһан һуралсалай стандарт түрэлхи хэлэ шудалалгын хуулита шиидхэбэринүүдые тодорхойлолгодо туһа үгэхэ ёһотой гэжэ тэмдэглэгдээ. Хүүгэдэй “Үльгэр” сэсэрлигтэ ашаглагдаһан багашуулай буряад хэлэ мэдэсын лексикын даабаринууд хэблэлдэ бэлдэхэ тухай һанамжа оруулагдаа. Мүн Агын интернат-гимназиин түрэлхи хэлэнэй хэшээлнүүдэй түсэлнүүдэй ажал ябуулгын дүршэл дэлгэрүүлхэ, ГТО мэтээр элдэб квест наадануудые хэрэглэжэ, нютаг можын хэмжээнэй наадануудые эмхидхэхэ болон бусад һонирхолтой һанамжанууд оруулагдаа.