Үбэр Байгалай хизаарай Амбан захирагша (Губернатор) Наталья Жданова эзэлжэ байһан тушаалһаа бууха шиидхэбэри тухайгаа соносхоһон байгаа.
Интернет сүлжээндэхи албан ёһоной сайт дээрэнь тусхай видеобуулгабари губернаторай хэблэл мэдээсэлэй албан тунхаглажа, олониитын анхарал татаа. Амбан захирагшатаяа саашаа ан бунхан ажаллахабди сугтаа гэжэ найдаһан ноёд һайдай түсэбүүдые хүршэ хизаарай дарга гансата эбдэбэ гэхэдэ, алдуу болохогүй.
“Хоб жэбтэй холбоотой бэшэ шиидхэбэрим”
“Һүүлэй хэдэн үдэрнүүдтэ нам тухай тараагдаһан хоб жэб, худал һураг, добтолхы һэдэлгэнүүдтэй минии шиидхэбэри огто холбоогүй. Сэдьхэлэймни байдалтай, хубиин ажабайдалдамни сэхэ хабаатай арсашагүй шалтагаануудһаа уламжалан, иимэ шиидхэбэри абаха баатай болооб. Минии ажабайдалда шэнэ, һонирхолтой, бүри харюусалгатай хаһа эхилхэнь. Хүндэтэ нютагаархид, бултандатнай һайниие хүргэнэб!
Энэ хугасаада намайе дүмэжэ, дэмжэжэ байһан зондо нэн түрүүн баярые хүргэнэб. Нүгөөшье талада байжа, ухаа зааһан, эрэлхэг зоригой, шэн габьяагай хэшээлнүүдые намда үгэһэн зондо мүн лэ һайниие хүргэнэб. Энэ хадаа ерээдүй сагта намда заабол хэрэгтэй байха сэгнэшэгүй ехэ дүй дүршэл болоно”, - гэжэ Наталья Жданова онсолоо.
Хүлисэл гуйгаад, һайниие хүсөө
- Амиды ябаһан ямаршье хүндэл, зарим ушарнуудта буруу байжа болооб. Тэрэнэйнгээ түлөө хүлисэл гуйхаяа һананаб. Түрэл нютаг можымнай хүгжэлтэдэ түлхисэ болохо хамтынгаа ажалай түлөө намтай суг хүдэлһэн нүхэдтөө баяр хүргэнэб. Бүхы энэ хугасаа соо - үдэр бүри - би үнэн сэхээр, өөрыгөө дууһан үгэжэ хүдэлөөб. Түүхэтэ хүшэр иимэ оршон байдалай Үбэр Байгалдамнай тогтоод байһан сагта аһан шадалаараа ажаллааб. Иимэл харюусалгатайгаар, шадамараар саашадаашье хүдэлэгты! Хүндэтэ нютагаархиндаа эгээл һаруул һайханиие, элүүр мэндые, гэр бүлэнүүдтэтнай амгалан тайбаниие, эхилһэн бүхы хэрэгүүдтнай урагшатай байхыень хүсэнэб, - гэжэ Амбан захирагша хэлээ.
Хэн бэлэйт, “хатан абгай”?
Ага тойрогоймнай ажаһуугшад хизаарайнгаа Амбан захирагша даргын түлөө эдэбхи гаргажа, 2016 оной намар болоһон һунгалтын үедэ хамагһаа ехээр дэмжэһэн гээд мэдээжэ. Тиигээд ехэ дулааханаар “хатан абгаймнай” гэжэ нэрлэдэг.
Наталья Ждановашье буряад тойрогойнгоо зондо эльгэ нимгэтэйгээр хандадаг, тэдэнэйнгээ ажабайдал һайжаруулха талаар томо-томо түсэбүүдые яаха аргагүй дэмжэдэг байһан гээд мэдээжэ. Агын дасанай Согшон дуганай барилгада туһалалсаа гээд мэдээжэ. Рамнайдань ерэжэ, бэлэг сэлэг барижа байхыень бүхэдэлхэйн утаһан болохо интернет сүлжээндэшье, нютаг можын олондо мэдээсэл тараадаг хэрэгсэлнүүдтэшье хараха, уншаха аргатай байгаабди.
Хүршэ хизаарайнгаа ажаһууг- шадтай түүхэтэ ёһоор, үндэһөөрөө холбоотой хадаа, тэндэ боложо байһан һонинуудые мэдэхэ, дуулахаяа һанаашамнай гайхалгүй. Тиигээд лэ “хэн бэлэй “хатан абгай?” гэһэн асуудалда харюу дурадханабди.
Наталья Николаевна Жданова 1964 оной февралиин 16-да Шэтэ хотодо түрэһэн намтартай. 1986 ондо Шэтын багшанарай Чернышевскиин нэрэмжэтэ дээдэ һургуули дүүргэжэ, хитад болон англи хэлэнүүдэй багшын мэргэжэлтэй болоһон. 2002 ондо “Гүрэнэй болон нютагай засагай хүтэлбэри” гэһэн мэргэжэлээр Алас Дурна зүгэй гүрэнэй албанай дээдэ һургуулиин Шэтэдэхи таһаг дүүргэһэн юм.
1986 онһоо 2001 он болотор дунда һургуулида хитад хэлэнэй багшаар, директорэй орлогшоор, захиралааршье ажаллаа. Мүн тиихэдэ богонихон болзорто олзын хэрэг эрхилдэг эмхидэ оршуулагшаар, гадаадын харилсаануудай талаар мэргэжэлтээр хүдэлһэн байха юм.
Засагай жолоо гартаа барижа
Хоёр мянгаад оной эхиндэ засагай зургаануудта хүдэлжэ захалаа. Долоон жэл шахуу шэтэ хотын захиргаанай болбосоролой хороониие толгойлоо. 2008 онһоо 2013 он болотор Үбэр Байгалай хизаарай Засагай газарай Түрүүлэгшын ниигэмэй асуудалнуудай талаар орлогшоор, 2013 ондо хизаарай болбосоролой, эрдэм ухаанай болон залуушуулай бодолгын сайдай уялга дүүргэгшээр хүдэлһэн намтартай.
2013 оной сентябрь һараһаа Үбэр Байгалай хизаарай Хуули зохёодог суглаанай Түрүүлэгшээр һунгагдаһан.
Ородой Холбоото Уласай Юрэнхылэгшэ Владимир Путин 2016 оной февралиин 17-до Наталья Ждановае Үбэр Байгалай хизаарай Амбан захирагшын (Губернаторай) уялга гүйсэдхэгшөөр томилһон юм. Тэрэл жэлэй сентябрь һарада “Ниитэ нэгэн Росси” намай түлөөлэгшэ Наталья Жданова хизаарайнгаа Амбан захирагшын тушаалда һунгагдаһан байгаа. Гүрэнэй, хизаарайнгаа олон тоото шагналнуудта хүртэһэн.
“Өөрын шиидхэбэри” хэн шэбэнээб?
Һүүлэй хэдэн жэлдэ намар болоходо, нютаг можонуудай хүтэлбэрилэгшэдэй тушаалаа орхихо ушарнууд олон болоо. Хорон хэлэтэйшүүл губернаторнуудай ажалһаа шарлаһан набшаһанай унахатай сасуулна. Засагаа тушаажа, үндэр зиндаатаяа хахасаһан хүтэлбэрилэгшэдэй – гүрэнэймнай бүридэлдэ ородог уласуудай толгойлогшонорой, нютаг можо, хизаарнуудай амбан захирагшадай – ехэнхи хубинь “өөрынгөө һайн дураар” ажалһаа болидог байна гэжэ адаглахаар. Үсөөхэн лэ ноёдые “найдалыемнай харюулаагүй” гээд тушаалһань буулгаа.
Наталья Ждановае губернаторайнгаа тушаалтай хахасахаяа байна гэһэн һураг хирэ-хирэ болоод лэ, бии бологшо һэн. Илангаяа сентябрь һарада үнгэрэгшэ һунгалтын дүнгүүдэй эли болоходо, тиимэ ябаган зугаанууд бүришье һүжэрөө һэн.
Һүүлэй һүүлдэ Амбан захирагша амаралтаһаа бусахадаа, ошонгоо ошохом гэжэ соносхобо ха юм. Магад, энэ шиидхэбэрииень шэхэндэнь хэншьеб шэбэнэжэ үгэһэн байгаа?
Эхэнэр дарганар эрид үсөөрбэ гү?
Ородой Холбоото Уласай 85 нютаг можонуудай хүтэлбэри- лэгшэдэй дунда һая болотор оройдоол дүрбэн эхэнэр байһан юм. Тушаалаа орхиһон Наталья Жданова Үбэр Байгалай хизаарые хоёр жэлэй туршада хүтэлөө. Үнгэрһэн һунгалтада шууяа ехэтэйгээр шүүгдэһэн Светлана Орлова Владимирска можые табан жэлэй туршада толгойлһон байна.
Харин хатуу зоригтой хоёр эхэнэр – Наталья Комарова Марина Ковтун гэгшэд – хойто зүгэй эгээл орёо, хүйтэн регионуудые, тус тустаа Ханты-Мансиин бэеэ дааһан тойрог болон Мурманскын можые хоёрдохи болзороо урагшатайгаар ударидажа ябанад.
Бүһэгүй дүрбэн даргын хоёрынь тушаалһаа буужа, эхэнэр губернаторнууд эрид үсөөрбэ. Теэд эрэшье хүндэ бэлэн бэшэ энэ ажал эхэнэрэй ээм дээрэ тохогдоходоо, хэсүүхэн байһаниинь гайхалгүй.
Теэд эрэлхэг зоригтой, эрдэм мэдэсэ ехэтэй эхэнэрнүүд олдоод лэ байха байна. Олег Кожемяко гэгшын Примориин хизаар руу томилогдоходо, Сахалинай можын амбан захирагшын уялгануудые гүйсэдхэгшөөр Вера Щербина үлөөд хүдэлжэ байна. Сентябрь һарада Якутск хотын мэрэй тушаалда Сардана Авксентьева засаг бариһан намай түлөөлэгшые уридлажа гараа һэн...
kremlin.ru сайтһаа гэрэл зураг абтаба