​​Буряад Уласһаа Гүрэнэй Дүүмын һунгамал Алдар Дамдинов:«Гүрэнэй шэнэ бюджет зүбшэн хэлсэнэбди»

“Ниитэ нэгэн России” намай фракциин зүблөөн парламентын Гүрэнэй Дүүмын пленарна зүблөөнэй удаа үнгэргэгдэжэ, 2019-2021 онуудай бюджет тушаа гол шухала асуудал зүбшэн хэлсэгдээ. Энээн тухай Фейсбук бүлгэм соохи өөрынгөө хуудаһанда манай уласһаа һунгагдаһан депутат Алдар Дамдинов үсэгэлдэр мэдээсэбэ.

- Ородой Холбоото Уласай Засагай газарай Түрүүлэгшын орлогшо, мүнгэн сангай сайд Антон Германович Силуанов гол элидхэл хээ. Дүрбэн жэлэй туршада профицидтэй бюджет абтаагүй байһанаа, дахинаа тиимэ бюджет баталан абаха гэжэ байнабди. 2 триллион түхэригэй профицит хараалагдана, - гэжэ Алдар Дамдинов бэшээ.

Иимэ шанартай бюджет гадаадын оршон байдалһаа хамгаалха зэргэтэй гэжэ мүнгэн сангай сайд тэмдэглээ. Гүрэнэй Юрэнхылэгшын май һарада гаргаһан зарлигуудые бэелүүлхын тула зургаан жэлэй туршада 8 триллион түхэриг гаргашалагдаха. Үшөө нэгэ триллион түхэриг нютаг можонуудай бюджедүүдээр гаража, хамта дээрэ 9 триллион түхэриг мүнгэн байһан бүхы гаргашанууд дээрэ нэмэгдэжэ, гаргашалагдаха болоно. Тиихэдээ гол анхарал хангамжын һалбарида хандуулагдаха юм. Харгы бариха, заһаха ажал 430 миллиард түхэригтэ хэгдэхэ, шэнэ оньһотой эдэй засагай хүгжэлтэдэ 1 триллион түхэриг һомологдохо. Экономикын һалбарида үгтэхөөр хараалагдаһан хүнгэлэлтэтэй урьһаламжануудай гол зорилго хадаа ажал хүдэлмэриин үрэ дүн дээшэлүүлхэ, бага болон дунда зэргын олзын хэрэг эрхилэлгэ дэмжэжэ, 25 сая зониие ажалтай болгохо.

Ниигэмэй һалбариин талаар баһал олон зорилгонууд бии. Элүүрые хамгаалгын һалбарида: зүрхэн, һудаһанай болон бусад үбшэнүүдые аргалдаг, орон дотор хүдэлжэ байгаа түбүүдые шэнэдхэн һайжаруулга, эмшэдэй эрдэм мэргэжэл дээшэлүүлгэ. Хүдөө нютагуудта бага эмнэлгын 1500 байшан барюулагдаха.

Нютаг можонуудые дэмжэхэ талаар гаргашанууд мүн лэ хараалагдана гээд Алдар Дамдинов онсолоо. Гүрэнэй хэмжээндэ бэелүүлэгдэжэ байгаа проектнүүдтэ ганса 2019 ондо 450 миллиард түхэриг һомологдохо. Тиихэдээ нацпроектнүүдэй бэелүүлгые - гүрэнэй захилай хэгдэжэ эхилхэһээ эсэстэнь хүрэтэр, барилгануудай дүүргэгдэтэр - хатуу гэгшээр хинаха системэ байгуулагдаха юм.

Болбосоролой һалбарида 11 миллиард түхэриг нэмэжэ гаргашалагдаха. Һургуулинуудта 3-дахи халааниие усадхаха хэрэг оройдоол 4 нютаг можодо бүтээгдэхэ, тэрэ тоодо манай Буряад Улас оролсоно бшуу.

Юрэнхы эрдэмэй һалбариие шэнэдхэн һайжаруулха хэрэгтэ 14 миллиард түхэриг хараалагданхай. Арадай һунгамал Алдар Дамдиновай бэшэһээр, эрдэм ухаанай һалбариин урда мүн лэ ехэ зорилгонууд табигдана. Тиихэдээ мүнгөөр хангалгын дүрим һэлгэгдэжэ, гурбанай хоёр хуби гүрэнэй бюджедһээ, үлөөшэ нэгэниинь – хубиин мүнгэн байха ёһотой. “6 жэлэй туршада пирамида урбуулха гэһэн зорилго табигдана. Гэхэтэй хамта, гүнзэгы ехэ (фундаментальна) эрдэм шэнжэлгын бюджедһээ мүнгөөр хангагдаха байһаниинь арсашагүй”, - гэжэ депутат бэшээ.

Нэгэдэхи уншалгын удаа хоёрдохи уншалга хүрэтэр ябуулха ехэ ажал байна. Хубаарилагдаагүй мүнгэн үшөө үлэнхэй. Тэрэниие Засагай газарай заһабаринуудаар болон Гүрэнэй Дүүмын һунгамалнуудай дурадхалаар хубааха юм гэжэ Алдар Дамдинов мэдээсээ.