727
Буряад Уласай барилгын болон гэр байрын ажахы шэнэдхэлгын сайд Николай Рузавин, барилгын яаманай, ехэ барилгын хүтэлбэриин болон барилга хэгшэдэй эмхинүүдэй түлөөлэгшэд Улаан-Үдэдэ баригдажа байһан хабдарта үбшэнэй диспансертэ нүүдэл суглаанда хабаадаба.
Улаан-Үдэдэ хабдарта үбшэнтэнэй диспансер 2011 оной август һарада «Элүүрые хамгаалга» гэһэн федеральна болон уласай программын хэмжээндэ баригдажа эхиһэн гэжэ һануулнабди. Тэрэнэй барилга хоёр шатада ябуулагдаха гэжэ хэлсээтэй. 2013 оной май һарада лучевой терапиин байшанай барилга дүүрэһэн байна. Барилгын хоёрдохи шатада үдэрэй туршада 250 үбшэнтэндэ эмнэлгын туһа хүргэхэ аргатай поликлиникэ болон эмнэлгын-лабораторно корпус баригдаха юм. Удаань 230 һууритай эдеэ хоолой газар баригдаха.
Нүүдэл суглаанай үедэ эмнэлгын хэрэгсэлнүүдые тодхохл, дулаагаар хангаха талаар шухала асуудалнуудаар хэлсээ. Буряад уласай хабдарта үбшэнэй диспансертэ барилгын ажалнууд үргэлжэлһөөр. Сонхонууд табигдаа, таһалганууд хэгдээ, зайн галай һужаа татагдаа; линолеум дэлгээхэ, таһагуудые бэлдэхэ, сэбэрлэхэ талаар ажал хэгдэнэ.
Буряад Уласай барилгын болон гэр байрын ажахы шэнэдхэлгын сайд Николай Рузавин ехэ барилгын хүтэлбэриин даргада ноябриин 30 болотор энэ объект дулаагаар хангаха һужаада хабсаргаха тухай даалгаба. Тиихэдэ барилгын хэгдэхэ болзор баримталан, федеральна болон уласай бюджедүүдһээ һомологдоһон мүнгэ дүүрэн ашаглаха тухай сайд хэлэбэ. Улаан-Үдэдэ баригдажа байһан хабдарта үбшэнэй диспансертэ 600 сая түхэригэй эмнэлгын хэрэгсэлнүүдые худалдан абаха тухай гүрэнэй хэлсээнүүд баталагданхай. Нояборь һарада хэрэгсэлнүүд тодхогдожо эхилхэ. 2018 ондо диспансерэй барилгада 781 сая түхэриг һомологдоо, тэрэнэй 734 саянь – федеральна бюджетһээ. 2019 оной апрель һарада хабдарта үбшэнэй диспансер ашаглалгада тушаагдаха гэжэ багсаамжалагдана.
Буряад Уласай барилгын болон гэр байрын ажахы шэнэдхэлгын яаманай хэблэлэй албанай гэрэл зураг
