Ородой Холбоото Уласай Федеральна Суглаанай Федерациин Зүблэлдэ Буряад Уласай гүйсэдхэхы засагай дээдын зургааниие түлөөлжэ байдаг Вячеслав Наговицын Федерациин Зүблэлһөө гүрэнэй Засагай газартахи Бүрин эрхэтэ түлөөлэгшөөр томилогдобо. Тусхай тогтоол сенаторнууд үсэгэлдэр баталаа гээд Федеральна Суглаанай дээдэ танхимай хэблэлэй албан мэдээсэһэн байна.
Шэнэ эрхэ түлөөлэлгэтэй болобо
Гүрэнэй парламентын дээдэ танхимай оборонын болон аюулгүйн талаар хорооной түрүүлэгшын орлогшо, Засагай газарта Федерациин Зүблэлэй түлөөлэгшэ байһан Мухарбек Дидиговэй түлөөлэлгын болюулагдаһан ушарһаа тэрэнэй орондо манай сенатор томилогдоо. Федерациин Зүблэлэй холбоото уласай байгуулалтын, нютаг можонуудай бодолгын, нютагай өөһэдын хүтэлбэриин болон Холын хойто зүгэй хэрэгүүдэй талаар хорооной гэшүүнээр Вячеслав Наговицын ажалладаг юм гээд һануулая.
Сенаторай туһалагша Александр Мальцевай мэдээсэһээр, Ородой Холбоото Уласай Федеральна Суглаанай Федерациин Зүблэлэй Бүрин эрхэтэ түлөөлэгшэд тухай дүримэй ёһоор, энэ тушаалнуудта орохо хүнүүдые Федерациин Зүблэлэй Түрүүлэгшэ дурадхадаг юм. Бүрин эрхэтэ түлөөлэгшэнэр тус тустаа Засагай газартай, Гүрэнэй Дүүмэтэй, Үндэһэн хуулиин Сүүдтэй болон засагай бусад зургануудтай Федерациин Зүблэлэй харилсаа холбоо хангаха гол зорилготой юм.
Онсолбол, Засагай газарта үнгэргэгдэдэг элдэб хэмжээ ябуулгануудта, зүбшэн хэлсэлгэнүүдэй үедэ, гол түлэб – үдэр бүри Федерациин Зүблэлэй шугам бодолые, эрхэ ашаг аршалан хамгаалха ажалтай. Мүн тиихэдэ хэрэгтэй болоо һаань, гүрэнэй засагай зургаануудай, парламентнууд хоорондын эмхинүүдэй ажаябуулга тухай, мүн баһа тэдэнтэй харилсаха тухай мэдээсэл, дурадхалнуудые парламентын дээдэ танхимда дуулгаха эрхэтэй. Тобшолон хэлэхэ болоо һаа, дээдын засагай хоёр һалаануудай хоорондохи хамтын ажал, харилсаа холбооень тогтоон байгуулха уялгатай болоно бшуу.
Федерациин Зүблэлэй Тогтоол доро гар табигдаһан үдэрһөө хойшо Вячеслав Наговицынай эрхэ түлөөлэлгэ эхилбэ.
Баярые хүргэбэ
Бүхэдэлхэйн интернет сүлжээнэй уудамда Вячеслав Наговицын хамта хүдэлдэг нүхэдтөө баярай үгэнүүдые зорюулжа бэшэһэн байха юм. “Федерациин Зүблэлэй Россиин Засагай газартахи Бүрин эрхэтэ түлөөлэгшын тушаалда дэбжүүлэгдэхэдэмни, мүнөөдэр намайе бүримүһэн, нэгэн дуугаар дэмжэһэн нүхэдтөө баяраа мэдүүлнэб. Энэ шиидхэбэриин түлөө Федерациин Зүблэлэй 169 гэшүүн дуугаа үгөө. Федерациин Зүблэлэй Түрүүлэгшэ Валентина Ивановна Матвиенкын амаршалга болон “Россиин Засагай газарта нютаг можынгоо болон Федерациин Зүблэлэй эрхэ ашагыень үндэр хэмжээндэ хамгаалха” тухай хэлэһэн захяаень даабари гэжэ хүлеэн абанаб”, - гээд Вячеслав Наговицын онсолһон байна.
Буряад Уластаа туһалха аргань бүри ехэ болобо гү?
Үнэхөөрөөшье, гүрэн түрын засагай дээдын зургаануудай нэгэндэ, нютаг можонуудай танхим гээд хуулиин ёһоор тоологдодог Федерациин Зүблэлэй ажаябуулгада эдэбхитэйгээр хабаадажа, арбаад жэлэй туршада толгойлжо байһан Буряад Уласайнгаа ашаг эрхыень, асуудалнуудыень гүйсэдхэхы засагай дээдын зургаанда хамгаалха, шиидхэхэдэнь, арга боломжонуудынь бүри ехэ болобо гэжэ ойлгохоор. Валентина Матвиенко энээхэн бодолые онсолжо, урид хэлэһэн байна гээшэ.
Вячеслав Наговицын Буряад орон руугаа һара бүхэндэ ерэжэ, гансашье засаг барижа байгаа уласай дарга, сайдуудтай уулзадаг, харилсадаг бэшэ, мүн баһа аймаг нютагуудаар ябадаг, ажабайдалтайнь танилсадаг, дээдын зургаануудай дэмжэлгэдэ хүртэхөөр хараа түсэбүүдтэй, түсэл проектнүүдтэй танилсадаг юм. Уласайнгаа ажаһуугшадые хубиинь асуудалнуудаар хүлеэн абадаг, тэдэнэй орёонуудайнь гүрэнэй ниислэлдэ шиидхэгдэхээр байгаа һаань, ормынь олохоёо оролдодог. Энэ хадаа – сенаторай сэхэ уялгань гээшэ ааб даа.
Теэд парламентын дээдэ танхимые Засагай газарта түлөөлжэ байха үедөө, тэрээгүүр али олон асуудалаар ябахадаа, Засагай газарай Түрүүлэгшын олон тоото орлогшонортой, яаман бүхэнэй ямба ехэтэй алба хаагшадтай, гүрэнэй сайд дарганартай сэхэ харилсажа байха аргатай болобо ха юм. Энэ хадаа ехэл хэрэг гэжэ ойлгогдоно. Иимэ арга боломжоёо манай уласые гүрэнэй ниислэлдэ түлөөлжэ байгаа сенатор дууһан хэрэглэжэ, дүүрэн дүнгүүдтэй байха бэзэ гэжэ найдая.