​​Шэнэ Уоян хүрэтэр харгы заһабарилгада Ородой Холбоото Уласай газарһаа Буряад Уласта 350 сая түхэриг һомологдохо

Улаан-Үдэ-Турунтаево-Хурамхаан-Шэнэ Уоян гэһэн уласай харгы заһабарилгада федеральна бюджетһээ нэмэлтэ мүнгэн һомологдохо гэжэ Буряад Уласай Толгойлогшо Алексей Цыденов хэлэбэ. Уласай хүтэлбэрилэгшын тэмдэглэһээр, Ородой Холбоото Уласай Засагай газарай суглаанда байгша ондо нөөсын жасаһаа 350 сая түхэриг һомолхо гэһэн дурадхал дэмжэгдэһэн байна.

Һомологдоһон мүнгөөр Улаан-Үдэ-Турунтаево-Хурамхаан-Шэнэ Уоян гэһэн уласай харгын 271-291 модоной зайда заһабарилга хэгдэхэ. Харгын энэ хэһэг заһабарилха тухай хуби ниилүүлһэн нээмэл «Труд» бүлгэмтэй гүрэнэй хэлсээн баталагдаа. 2019 оной болон 2020-2021 түсэблэлгын жэлнүүдтэ федеральна бюджедтэ Улаан-Үдэ-Турунтаево-Хурамхаан-Шэнэ Уоян гэһэн шэглэлэй харгы заһабарилгада 5,038 миллиард түхэриг һомолхо тухай дурадхал оруулагданхай гэжэ Ородой Холбоото Уласай мүнгэн һангай яаманда тэмдэглэбэ.

2017 ондо Ородой Холбоото Уласай Юрэнхылэгшэ гүрэнэй болон Буряад Уласай Засагай газарнуудта энэ шэглэлэй харгы һэльбэн шэнэдхэхэ тухай асуудал шиидхэхэ гэжэ даалгаһан байна. Улаан-Үдэ-Турунтаево-Хурамхаан-Шэнэ Уоян шэглэлэй харгын утань 726 модон болоно. Тэрэнэй заһабарилга 2003 онһоо хойшо ябуулагдана.

“Улаан-Үдэ-Турунтаево-Хурамхаан-Шэнэ Уоян шэглэлэй харгын 230 -251 модоной зайда харгы муу. 2017 ондо энэ объектдэ федеральна бюджетһээ - 350 сая түхэриг, 2018 ондо үшөө 600 сая түхэриг һомологдоо. Харгы барилга дүүргэжэ, ашаглалгада тушаалгада 2019 ондо үшөө 750 сая түхэриг хэрэгтэй”, - гэжэ Буряад Уласай унаа тээбэриниин яаманда тэмдэглэнэ.

Буряад Уласай Засагай газарай хэблэлэй албанай гэрэл зураг