914
2018 оной түрүүшын хахад жэлэй туршада уласай бюджедтэ 321,3 сая түхэриг ороһон байна. Тэрэнэй 227,4 сая түхэриг - эдеэ хоолой үйлэдбэринүүдэй олзо, 86,9 сая түхэриг - фермернүүдэй түлэһэн татабари, үшөө 7 сая түхэриг загаһа үйлэдбэрилэгшэд түлэһэн байна.
- 2018 ондо Буряад Уласай хүдөө ажахын болон эдеэ хоолой яаман уласай томо, аша үрэтэйгээр ажалаа эрхилдэг хүдөө ажахы үйлэдбэрилэгшэдтэй 36 хэлсээ баталһан байна. Хүдөө ажахын эмхинүүдтэ 224,7 сая түхэригэй гүрэнэй тэдхэмжэ үзүүлэгдээ. Байгша оной түрүүшын хахадта гүрэнэй тэдхэмжэдэ хүртэһэн эмхинүүд 1,7 миллиард түхэригэй эдеэ хоол, тэжээл үйлэдбэрилөө. Энэнь түсэблэгдэһэнһөө 4,5% ехэ. 10 тонноһоо дээшэ мяхан, 3,5 мянган тонно һүн, 33 сая үндэгэн үйлэдбэрилэгдөө, - гэжэ Буряад Уласай хүдөө ажахын болон эдеэ хоолой сайдай орлогшо Пётр Брыков хэлэбэ.
Бурятстадай мэдээсэлээр, хүдөө ажахын эмхинүүдтэ ажалай салин 20 361 түхэриг болоно. «Восточно-Сибирский» свинокомплексын» хүдэлмэрилэгшэд - 30 799 түхэриг, «Улаан-Үдын птицефабрикын» хүдэлмэрилэгшэд - 30 309 түхэриг, «Николаевский» племзаводой хүдэлмэрилэгшэд - 24 252 түхэригэй салин абадаг. Буряад Уласай хүдөө ажахын һалбарида 32 мянганһаа дээшэ гү, али хүдөө нютагта ажаһуугшадай 8 хубинь хүдэлмэрилнэ.
Буряад уласай налог татабариин албанай мэдээсэһэнэй ёһоор, байгша оной түрүүшын хахадта хүдөө ажахын 8 эмхи гарзада ороо. Буряад Уласай Засагай газарай Түрүүлэгшын орлогшо Игорь Зураевай тэмдэглэһэнэй ёһоор, хүндэ байдалда ороһон, тэдхэмжэ үзүүлэгдэхээр эмхинүүдые эртээнһээ элирүүлхэ шухала.
- Гарзада ороһон эмхинүүдые эртээнһээ элирүүлхэ талаар ажал ябуулха шухала. Эмхинүүдэй хүтэлбэрилэгшэдтэй хамта ямар туһаламжа үзүүлхэ хэрэгтэйб гэжэ хэлсэхэбди, - гэжэ Игорь Зураев тодорхойлбо.
