920
Комсомолой байгуулагдаһаар 100 жэлэй ойн баяр Буряад Уласта тэмдэглэбэ. Улаан-Үдын Комсомолой талмайда ерээдүйн, 2043 оной, залуушуулда мүнөө үеын залуу үетэнэй хандаһан бэшэг хадагалагдаба.
Эсэгээ ороноо хамгаалгын Агууехэ дайнда наһа бараһан нютагайнгаа сэрэгшэдтэ зорюулһан дурасхаалай хүшөөдэ 1968 оной комсомолшууд бэшэг хадагалһан юм гэжэ һануулнабди. Тэрэ 2018 оной октябриин 29-дэ гаргажа уншагдаха байгаа Энэ болзорһоо урид бэшэг гаргаха гэхэдэнь, олон тоото заһабарилгын ажалнуудһаа боложо, тэрэнь олдоогүй. Тиигэбэшье Железнодорожно хороогой захиргаанай архивта тэрэ бэшэгэй буулгабари хадагалаатай байба.
«Эхэ ороноо хамгаалһан, ажалдаа түрүүлһэн гэжэ комсомолшууд габьяатай. Бүхы гүрэн түрэеэ байгуулһан, Эсэгын дайнай һүүлээр гүрэнөө бодхооһон ВЛКСМ-эй аша габьяа һанаха ёһотойбди», - гэжэ Буряад Уласай Арадай Хуралай Гүрэнэй байгуулалтын, нютагай өөһэдын хүтэлбэрии, хуули ёһоной болон гүрэнэй албанай асуудалнуудай талаар хорооной түрүүлэгшэ Виктор Малышенко хэлэбэ.
Буряад Уласай Толгойлогшын болон Засагай газарай захиргаанай хүтэлбэрилэгшэ гүрэнэй түүхэдэ комсомолой удха тухай тэмдэглэбэ.
«ВЛКСМ-эй байгуулагдаһаар алтан ой бидэндэ удха шанартай. Хэдышье ондоо оршондо мүнөө ажаһуугаа һаа, комсомолой эмхиин эрхим жэшээ ойлгожо, хэрэглэхэ болонобди. Илангаяа ургажа ябаа улаан бургааһадые Эхэ орондо дуратайгаар хүмүүжүүлгэ. Энээн тухай Владимир Путин тэмдэглэһэн байна», - гэжэ Баир Цыренов хэлэбэ.
Эхэ орондоо дурлал бидэниие нэгэдүүлнэ
«XX зуун жэлэй залуушуулай онсо шухаг эмхиин - ВЛКСМ-эй 100 жэлэй ойн үдэр бидэнэр, 2018 оной залуушуул, 2043 оной сасуу үетэндөө мэндэ хүргэнэбди. 25 жэлэй туршада дэлхэй яажа хубилааб, танай үеын хүнүүд юундэ һанаата болоноб – эдэ бүгэдэ бидэндэ ехэ һонирхолтой.
Үзэсхэлэн һайхан байгаалитай, олон арадуудай ёһо заншалаар баян, ажалша, бэлиг талаантай хүнүүдтэй уласта ажаһуунабди. Эдэ бүгэдэеэ нангинаар сахижа, саашанхи үеын зондо дамжуулжа шадаха гүбди гэжэ һанаата болонобди.
25 жэлэй үнгэрхэдэ, Байгал далай арюун сэбэр, СПИД болон хабдарта үбшэнһөө арга олдонхой, үншэн үхибүүд гэжэ үгы байха гэжэ найданабди. Аяар 1968 ондо эхилһэн заншалаар, бидэ ерээдүйн залуушуулда бэшэг бэшэхэдээ, Эхэ орондоо дурлал, нютагаа улам хүгжөөхэ эрмэлзэл бидэниие нэгэдүүлнэ гэжэ бата этигэнэбди!»
Энэ хадаа 2018 оной залуушуулай ерээдүйн сасуутандаа хандаһан бэшэгһээ хэһэг. Магад, 25 жэлэй үнгэрхэдэ ерээдүйн залуушуул энэ талмайда сугларжа, мүнөө үеын залуу хүнүүдэй һанал бодол юун зобооноб, тэмдэглэһэн асуудалнууд шиидхэгдээ гү гэжэ уншаха байгаа аалам. Мүнөө үеын залуушуул тиигэжэ этигэнэ.
Анна Огороднигой гэрэл зурагууд
