Буряад Уласай Арадай Хуралай зургаадахи зарлалай һунгамалнууд үглөөдэр, октябриин 31-дэ, хоёрдохи сессиеэ үнгэргэхэ. Тэдэнэр 56 асуудалаар хэлсэхэ юм. Тэрэ тоодо, «Буряад Уласай «2018 оной болон түсэблэлгын 2019- 2020 онуудта уласай бюджет тухай» гэһэн хуулида хубилалта оруулха тухай» (нэгэдэхи, хоёрдохи уншалганууд) болон «2019 оной болон түсэблэлгын 2020-2021 онуудай уласай бюджет тухай» (нэгэдэхи уншалга) гэһэн хуулиин түсэлнүүдээр ажал ябуулагдаха. Һунгамалнууд 2019 оной бюджедэй олзо, гаргаша, дутагдал гэһэн шухала хэмжээнүүдые баталха юм.
Тиихэдэ Буряад Уласта наһанайнгаа амаралтада гараһан хүнүүдэй ажамидаралгын доодо хэмжээн тухай һунгамалнууд хэлсэхэ. «Ажаһуугшадай өөртөө хэрэглэхэ модо бэлдэхэ гурим, хуули тухай», «Буряад Уласай болбосорол тухай», «Эмнэлгын заатагүй даадхалай жасын 2019 болон түсэблэлгын 2020-2021 онуудай бюджет тухай» гэһэн хуулинуудта хубилалта оруулагдаха.
Буряад Уласай Арадай Хуралай ээлжээтэ сессидэ Арадай Хуралай Зүблэлэй, Арадай Хуралай нютагай засагай байгууламжануудай түлөөлгын эмхиин зүблэлэй, Арадай Хуралай 4 комиссиин бүридэл байгуулагдаха. Тиихэдэ «Арадай һунгамал» гэһэн һунгамалнуудай бүлэг бүридхэлдэ оруулха тухай сессидэ хэлсэхэ юм.
Анна Огороднигой гэрэл зураг