862
Буряадай соёлой түүхэдэ алтан үзэгүүдээр нэрэеэ бэшүүлһэн, СССР-эй арадай артистка Лариса Сахьянова болон РСФСР-эй арадай артист Пётр Абашеевэй дурасхаалдаа зорюулагдаһан IV фестиваль ноябриин 14-һөө 18 болотор оперо болон баледэй театрта эмхидхэгдэхэ. Байгша ондо энэ хэмжээ ябуулга Лариса Сахьяновагай 90 наһанай ойдо зорюулагдана.
Буряадай оперо болон баледэй тайзан дээрэ Лариса Сахьянова дүшөөд жэлдэ хатаржа, олон рольнуудые гүйсэдхэһэн юм. Буряад Улас, Ород гүрэнһөө гадуур дэлхэйдэ суутай баледэй хатаршанай зүжэг бүхэн харагшадай зүрхэ сэдьхэлдэ мартагдашагүй мүр сараа үлээнхэй.
«Лариса Сахьянова болон Пётр Абашеевэй нэрэмжэтэ фестиваль онсо шухаг. Энэ хэмжээ ябуулгада Буряад Уласай ажаһуугшад дэлхэйн баледэй амжалтануудтай танилсаха, манай театрай, Буряадай баледэй һургуулиин зохёохы талаан бэлиг дүүрэн харуулха арга олгогдоно», - гэжэ фестивалиин уран һайханай хүтэлбэрилэгшэ Морихиро Ивата хэлэбэ.
Лариса Сахьянова болон Пётр Абашеевэй нэрэмжэтэ фестиваль Буряад уласта анха түрүүшынхиеэ 1993 оной октябрь һарада эмхидхэгдээ. 2005 оной октябрь һарада фестиваль уласхоорондын хэмжээндэ үнгэргэгдөө. 2013 ондо энэ хэмжээ ябуулга театрһаашье гадуур эмхидхэгдэжэ, Буряадай оперо болон балед, Үндэһэтэнэй музей, Үндэһэтэнэй номой сан суг хамта үзэсхэлэн дэлгэһэн юм. Байгша ондо фестивальда уригдаһан баледэй мэдээжэ хатаршадай мастер-классуд эмхидхэгдээ. Тэрэ тоодо Ородой Холбоото Уласай артистка, Большой театрай түрүү балерина Анна Антоничева ерэһэн байна.
Фестивалиин үедэ дэлхэйдэ мэдээжэ баледүүд табигдаха: ноябриин 14-дэ, үдэшын 18:30 сагта Л. Книппер болон Б. Ямпиловай «Красавица Ангара»; ноябриин 15-да, үдэшын 18:30 сагта П. Чайковскиин «Лебединое озеро»; ноябриин 16-да, үдэшын 18:30 сагта А. Аданай «Жизель»; ноябриин 17-до, үдэшын 18:30 сагта Л. Минкусай «Дон Кихот».
Ноябриин 18-да Лариса Сахьянова болон Пётр Абашеевэй нэрэмжэтэ фестивалиин түгэсхэлдэ үдэшын 17 сагта Ородой Холбоото Уласай Большой, Михайловска, Челябинскын, Новосибирскын, Буряадай оперо болон баледэй театрнуудай түрүү хатаршадай хабаадалгатай гала-концерт үнгэргэгдэхэ юм.
Тиихэдэ Ородой Холбоото Уласай габьяата артист Иван Васильев хэмжээ ябуулга шэмэглэхэ юм. Тэрэ хадаа Михайловска театрай түрүү хатаршан, Бенуа де ла Дансын «Баледэй Оскар» гэһэн хүндэтэй шанда хүртэһэн хүн. Ноябриин 17-до Иван Васильев «Дон Кихот» баледтэ, ноябриин 18-да гала-концертын түгэсхэлдэ хабаадаха.
Буряад уласай соёлой яаманай хэблэлэй албанай гэрэл зураг
