​Шэтэ руу шэнэ ноён томилогдоо

Үнгэрэгшэ долооной тэндэ Ородой Холбоото Уласай Юрэнхылэгшэ Владимир Путин Үбэр Байгалай хи­заарай Амбан захирагшын уялгануудые саг зуура гүйсэдхэгшөөр Александр Осиповые томилбо. Мүн баһа һая болотор хүтэлжэ байһан дарга Наталья Ждано­вагай октябриин 11-дэ һайн дураараа тушаалаа орхихо тухай бэшэһэн мэдүүлгыень Юрэнхылэгшэ зүбшөөгөө. Энэ шиидхэбэри тухайнь гүрэнэй толгойлогшын сайт дээ­рэ октябриин 26-да бэшэгдэжэ, олондо мэдээсэл тараадаг хэрэгсэлнүүдээр тараһан байха юм.

Туһалыт гэжэ гуйгаа

Гарагай дүрбэнэй үдэшэ орой гүрэнэй Юрэнхылэгшэ Осиповтой уулзажа, өөрынгөө шиидхэбэри тухай тэрээн­дэ дуулгаа гээд Кремлиин сайт дээрэ бэшэгдэбэ. Шэтэ руу хэзээ ерэхэеэ шэнэ дарга шиидээгүй юм ха гээд хэлэг­дэнэ.

Гэхэтэй хамта, Алек­сандр Осипов Үбэр Байга­лай хизаарай хүгжэлтын зарим тэды түсэлнүүдэй бэелүүлэгдэдэг газарнуудые социальна талаһаа хангаха тухай тусхай түсэб зохёо­хо хэрэгтэ туһа үзүүлхыень Юрэнхылэгшэдэ хандаһан байна. Алас Дурна зүгэй фе­деральна тойрогто тиимэ түсэбүүд бэелүүлэгдэдэг юм гээд тэрэ онсолоо. Томо-то­мо түсэлнүүдэй бүтээгдэжэ байгаа газарнуудта хангам­жын объектнүүдые барю­улха, уридшалан хүгжэлтын тусхай дэбисхэрнүүдые бии болгохо, ажаһуугшадта түлөөһэгүйгөөр 1 гектар га­зар хубааха мэтын дэмжэлгэ үзүүлбэл, ашаг үрэтэй байха гэжэ шэнэ дарга тоолоно.

Хизаарай социально-эко­номическа хүгжэлтын гол шэглэлнүүд дээрэ Александр Осипов тогтоходоо, томо түсэлнүүдые бэелүүлгэдэ онсо анхарал хандуулагдаха зэргэтэй гэбэ. Ураанай Эргэ­нын хэбтэшэ, мүн баһа по­лиметаллнуудай Быстрын болон бусад хэбтэшэнүүдые ашаглаха хэрэгтэй гэжэ тоо- лоно. Тэдэнэй ашаг үрэтэй байхын тулада зохисотой хангамжын һалбари хэрэгтэй бшуу.

Шэнэ захирагша тухай

Александр Осипов 1969 ондо түрэһэн. Ростов-на-Дону хотодо арадай ажахын дээдэ һургуули 1993 ондо, Ставро­полиин гүрэнэй ехэ һургуули 2000 ондо дүүргэһэн юм байна. Үйлэдбэриин, элшэ хүсэнэй болон мүнгэн һангай томо хамжаануудта гүрэнэй хэмжээндэ ажаллаһан нам­тартай. 2009 онһоо эхилжэ, дүрбэн жэлэй туршада “Сэг­нэлтэ болон шалгалтын түб” толгойлоо.

2013 онһоо хойшо Алас Дурна зүг хүгжөөлгын талаар Ородой Холбоото Уласай яаманда сайдай нэгэдэхи ор­логшоор үнгэрһэн зун боло­тор ажаллаад, өөрынгөө һайн дураар тэрэ тушаалһаань бууһан байгаа. Үйлэдбэриин болон элшэ хүсэнэй объектнүүдые байгуулха болон шэнэлэн һайжаруулха та­лаар инвестициин түсэлнүүдые бэелүүлгэдэ хабаадалсаһан юм.

Олондо мэдээсэл тараадаг хэрэгсэлнүүдэй бэшэһээр, Александр Осипов Россиин Юрэнхылэгшын кадрнуудай нөөсэ бүридхэхэ түсэлнүүдтэ хабаадалсаагүй ха. Алас Дур­ные хүгжөөлгын талаар сайд байһан Александр Галушка гэгшын хүсэндөө ороһые, өөрынгөө дүтын зониие дээшэнь гаргаха шадалтай болоһые гэршэлнэ гээд тэм­дэглэгдэнэ.

Үбэр Байгалай Амбан захи­рагшаар ажаллаад, болзорһоо урид болиһон Константин Ильковский шэнэ захирагша­да амжалта хүсөөд, хүршэ хи­заарые ехэ орёо нютаг можо юм гэжэ онсолоо. Осиповтой танилаа мэдүүлхэтэеэ хамта, Үбэр Байгалай хизаарта шэнэ дарга тон туһатай байха гэжэ тэмдэглэһэн байна.

Түргөөр һэлгэлдэдэг түрүүшүүл

Октябриин 11-дэ тушаалаа сүлөөлхэ тухай һайн дуранай мэдүүлгэ барижа, нютагайн­гаа арад зондо Амбан захираг­ша Наталья Жданова хандаа гээд урда дугаартаа дуулгаа бэлэйбди. Һүүлэй хэдыхэн жэлэй туршада хүршэ хиза­артамнай болзорһоо урид болиһон хоёрдохи губерна­тор мүн. 2016 оной сентябрь һарада һунгалтада ерэһэн хамаг һунгагшадай зуунай 54 хубиин дэмжэлгэдэ хүртэжэ, Үбэр Байгалай хизаарай Ам­бан захирагша болоо һэн.

Ждановагай урда тээ засаг барижа байһан Константин Ильковский баһал гурбан­шье жэлэй туршада хүдэлжэ үрдингүй, 2016 оной февраль һарада тушаалһаа бууһан бай­гаа. Тиихэ үедэ нютаг можын­гоо Хуули зохёон гаргадаг Суглаанай Түрүүлэгшэ байһан Наталья Жданова Амбан за­хирагшын уялга дүүргэгшээр томилогдоо бэлэй. Тэрэ ажа­лаа эрхимээр эрхилээд байгаа һаа, магад, мүнөөшье болотор ядамаггүй ябаха һэн гү?

кremlin.ru сайтһаа гэрэл зураг абтаба