​​Түгнын таряашад – түрүү зэргэдэ

Хоёр удаа зузаан саһан унажа, ургуулһан таряа унагаабашье, хуряаха гэһэн зорилгоёо урдаа баряад, Мухар-Шэбэрэй таряашад поли дээрээ хонон үнжэн ябана.

Урда жэлнүүдтэ орходоо, үнгэрһэн зун хура бороотой байба. Тиимэһээ арбай таряан тала бүрхөөн байхадань, ажалша малша зон ехэ урмашаа һааб даа. Гэбэшье таря­анай эдеэшэхэ багаар бороон зогсонгүй орожо, удаань саһан унажа, таряашадые нилээн зобообо.

Эгээ тиимэһээ Мухар-Шэбэрэй гурбан томо ажахыда хүлгөөтэй хаһа тохёолдоод байна. Хэрбэеэ “Түгнэ” ажа­хыда 600 гектар талмай хуряахань үлэнхэй һаа, “Һутайн” ажахыда 400 гектар таряан - газар дээрээ.

“Унашаһан таряа хуряахада нилээн орёо. Комбайн урагшаа ябаха юм бэшэ. Эбдэрээд һалахагүй. Хоёрынь бүри байшоо. Заһабарилхань - ехэ гаргашатай. Тиимэһээ үлөөшэ 7 лэ комбайн таряагаа хадажа мэдэнэл даа, - гэжэ “Искра” ажахын захирал Василий Коршунов утаһаар зал­гахадамнай, уруу дуруухан дуулгана һэн.

Бэрхэшээлнүүдһээ сухаридаггүй бүхэ голтой шэмээ- шэгүүд бүдүүн хоолгүй яагаад үлэшэхэб даа. 5 мянгаһаа үлүүтэй гектар талмайда ургуулһан алтан таряагаа аба­жал байнхай. Мүнөө дээрээ 9 500 тонно орооһо хадаад байна. Тэрээнэй 1 850 тонныень ажахын түрүү комбай­нер Евгений Антонов хуряагаа. Энэ таряашаниие хүсэхэ хүн Буряадта байхагүй хэбэртэй.

Ургасын хэмжээн урданайхиһаа үлүү дээшээ – 1 гектарһаа 20 центнер таряан абтана. Тиимэһээ ерэхэ жэл­дэ “Искра” ажахынхид таряалангай хэмжээ үргэдхэхэ түсэбтэй. Һү үйлэдбэри үлүү олзогүй байһан тула, һаамхай үнеэдээ үсөөлөө. Үлөөшэ мяханай үүлтэрэй эбэртэ бодо малдаа хүрэмэ үбһэ хулһа бэлдээ. Малай тэжээлшье ургу­улаа. 10 мянгаһаа үлүүтэй силос хуряагаа.

Таряа хуряалгын үедэ уйдхартай ехэ гээлтэ болобо. “Искра” ажахын таряалан дээрэ эрдэмэй элдэб туршалга­нуудые эмхидхэдэг ажахын ахамад агроном, хүдөө ажахын эрдэмэй кандидат, Буряад Уласай хүдөө ажахын габьяата хүдэлмэрилэгшэ Николай Мальцев түлэг наһандаа түби дэлхэйһээ хахасан ошобо.

Намжил МАРДВАЕВ, Сарюуна ЭРДЫНЕЕВА