712
Мүнөөдэр Буряад Уласай Арадай Хуралай ээлжээтэ сессидэ «Буряад Уласта наһанайнгаа амаралтада гараһан хүнүүдэй ажамидаралай 2019 оной доодо хэмжээн тухай» гэһэн хуулиин түсэл һунгамалнууд хоёр уншалгада абаба. Энэ хэмжээн Ородой Холбоото Улас доторхи дунда хэмжээнтэй зэргэтэй гэжэ ниигэмэй бодолгын талаар хорооной түрүүлэгшэ Игорь Марковец хэлэбэ. Хуулиин энэ түсэл Арадай Хуралай хороонуудта болон эрхын талаар албанда зүбшэгдэһэн байна гэжэ тэрэ һануулба.
Наһанайнгаа амаралтада гараһан хүнүүдэй ажамидаралай доодо хэмжээн 2018 оной түрүүшын хахадта 8300 түхэриг байгаа. Абтагдаһан хуулиин түсэлөөр тэрэ 8846 түхэриг хүрэтэр дээшэлхэ юм.
«Мүнөө сагта 8800 түхэригтэ ажамидарха гээшэ үнэн бэшэ, энээниие ойлгохын тула экономистыншье мэргэжэл хэрэггүй. Мүнгэн нэгэ бага нэмэгдээшье һаа, «хайрын үгэлгэ» мэтэ үзэгдэнэ», - гэжэ Леонтий Красовский хэлэбэ.
Энэ байдал ойлгоод дүүрэшэхэ бэшэ гэжэ тэрэ һанамжална. Буряад Уласта ажамидаралай доодо хэмжээн дээшэлүүлэгдэбэл, урид болон мүнөө абтаһан хэмжээнэй илгаа уласай бюджет даажа абаха ёһотой. Мүнөө энэ илгаань федеральна бюджетһээ түлэгдэнэ.
«Мүнгэ олохо, оршон үе хараалан хуули хубилгаха гэһэн хоёр зорилго засаг зургаан шиидхэхэ болоно. Нэн түрүүн энэ эдеэ хоолой бага хэмжээндэ хабаатай. Мүнөө абтаһан зарим хэмжээн Эсэгын дайнай үеынхиһөө бага», - гэжэ Леонтий Красовский тэмдэглэбэ.
Федеральна хуулиин эрилтээр эдеэ хоолой бага хэмжээн хубилаагүй. Тиимэһээ энэ асуудал федеральна хэжээндэ шиидхэхэ тухай Баир Цыренов дурадхаба.
