Буряад Уласай Арадай Хуралай шэнэ зарлал оройдоол хоёрдохиёо уулзаба. Хэды тиигэбэшье тэдэ ажалдаа шунан орожо, октябриин 31-дэ болоһон ээлжээтэ сесси дээрээ аяар 56 асуудал хараалжа гараба.
Сессиин ажалай эхиндэ амаршалганууд хэлэгдээ. Ородой Холбоото Уласай Федерациин Зүблэлэй Хүндэлэлэй грамотада Эдэй засагай бодолгын, байгаали ашаглалгын болон байгаали хамгаалгын хорооной түрүүлэгшэ Анатолий Кушнарёв хүртөө. “Эсэгэ оронойнгоо үмэнэ габьяатай байһанай түлөө” гэһэн орденой медальда урдахи зарлалай һунгамал Леонид Селиверстов хүртэбэ. Мүнөө тэрэ Бабушкин хотын захиргаанай толгойлогшоор хүдэлнэ.
Сесси дээрэ харагдаһан 56 асуудал сооһоо “2019 оной болон 2020-2021 онуудай түсэбтэ хугасаагай бюджет тухай” Буряад Уласай хуули эгээл гол шухалань боложо үгөө гэхэдэ, алдуу болохогүй.
- 53 миллиард 552 сая түхэриг олзотой шэнэ бюджет боложо үгөө. Гаргашань хадаа 55 миллиард 774 сая түхэриг гээд тоологдоно, - гэжэ Буряад Уласай Финансын яаманай сайд Всеволод Мухин дуулгаа.
Ерэхэ жэлнүүдэй бюджет ехэ социальна удхатай гээд хэлэхээр. Юуб гэхэдэ, гаргашын 70 процент мүнгэн ниитын эмхинүүдтэ хабаатай юм. Эрдэм һуралсалда, элүүрые хамгаалгада, спорт хүгжөөлгэдэ ехэхэн анхарал хандуулагдаха байна. Мүн арад зоноо социальна талаар дэмжэлгэдэ яһала мүнгэн һомологдохоор хараалагдана.
Олзонуудаа дээшэлүүлжэ, гаргашаяа бага болгохо талаар ажал ябуулагдаха. Тиигэжэ 2020 ондо дуталдалгүй бюджет болохоор түсэблэгдэнхэй.
Мүнөө сесси дээрэ гол тоонууд хараалагдаа. Мүн декабриин 4 болотор һалбари бүхэнэй мүнгэн дэлгэрэнгыгээр зүбшэн хэлсэгдэхэ. Тиихэдэл ямар хэрэгтэ хэды мүнгэн дамжуулагдахаб гэжэ мэдэгдэхэ.
Ородой Хуулиин ёһоор, можо, хизаарнуудта жэл бүри пенсиин бага хэмжээн тогтоогдохо ёһотой. Буряадта үндэр наһатайшуулай ажамидарха эгээл бага мүнгэнэй хэмжээн 8846 түхэригтэ байха гэжэ һунгамалнууд шиидхэбэри абаа. Олоной һанамжаар, энэ тоо тон бага байна. Арадай Хуралай һунгамал Баир Цыреновэй хэлэһээр, иимэ тоо табихада эшэхээр.
- Бидэ, Арадай Хуралай һунгамалнууд, пенсиин бага хэмжээ ехэ болгохо тухай Гүрэнэй Дүүмэдэ хандаха ёһотойбди, - гэжэ Баир Цыренов үүсхэл гаргаба.
Үшөө нэгэ һонирхолтой асуудал гэхэдэ, территориальна медицинскэ жасын бюджет боложо үгөө. Буряад Уласай бюджедһээ тус федеральна гуламтада зургаа гаран миллиард түхэриг мүнгэн дамжуулагдаха. Манай Буряад ороной ажал хэдэггүй (тэрэ тоодо пенсионернүүд, үхибүүд, багашуул ороно гээшэ) арад зоной түлөө эльгээгдэнэ гэжэ хэлэлтэй. Удаань жасаһаа энэ мүнгэн элүүрые хамгаалгын һалбари хүгжөөлгэдэ гэдэргээ бусаагдадаг юм.
Удаадахи сесси декабриин 4-дэ болохоор хараалагдана.