Ой модоной кодексдо 2019 оной январиин 1-һээ оройдоол нэгэ нэмэлтэ оруулагдаа. Тиигэжэ валежник - модон бэшэ гэгдэжэ, бүхы ажаһуугшадта тэрээниие суглуулха эрхэ олгуулагдаа. Гүрэнэй Дүүмэдэ иимэ шиидхэбэри 2018 оной апрелиин 18-да абтаһанайнь удаа Ородой Холбоото Уласай Юрэнхылэгшэ Владимир Путин шэнэ хуули баталан, гараа табяа һэн. Харин Буряадта энээн тухай һаяхана хэлсэжэ эхилбэ. Арадай Хуралай ээлжээтэ сессиин үедэ энэ асуудалаар һонирхолтой хөөрэлдөөн болоһон байна. Хэдэн һунгамалнууд энээниие буруушаана, харин олонхинь - хүн зондо ехэ туһатай хуули гэнэ.
Ородой хуулида нэмэлтэ хубилалтанууд оруулагдаһанайнь удаа можо нютагуудай хуулиин дансануудтай зохилдуулан тааруулдаг. Иимэ ажал тухай ээлжээтэ сессиин үедэ хэлсэгдээ. Эгээл энэ үедэ Буряадай ажаһуугшад, тэрэ тоодо олон һунгамалнууд тус нэмэлтэ тухай мэдэнгүй ябаһаниинь элирүүлэгдэбэ. Буряад Уласай Арадай Хуралай Эдэй засагай бодолгын, байгаали ашаглалгын ба байгаали хамгаалгын хорооной түрүүлэгшэ Анатолий Кушнарёв энээн тухай ехэ суглаа зарлаха түсэбтэй байһанаа абаһаар лэ мэдүүлбэ.
- Январиин 1 удангүй болохонь. Тиимэһээ бүхы арад зомнай энээн тухай мэдэхэ ёһотой. Ехэ суглаанай үедэ Уласай ой модоной ажахын агентствын болон Буряад Уласай Байгаалиин нөөсэнүүдэй яаман дэлгэрэнгыгээр бүхы хубилалтанууд тухай хөөрэжэ үгэхыень урихабди, - гэжэ Анатолий Кушнарёв хэлэнэ.
Валежник гү, али унаһан модо эрхэтэд хубиингаа хэрэглэмжэдэ бэлдэхэ болохонь. Буряад Уласай Байгаалиин нөөсэнүүдэй яаманай сайдай орлогшо Марина Капустинагай хэлэһээр, эндэ ямаршье саарһа данса хэрэггүй болохо юм. Эгээл энэ мэдээн арсалдаа гаргаһан байна.
ВАЛЕЖНИК ГҮ, али унаһан модо мүшэр юун бэ гэжэ ой модоной кодекс соо мүнөө болотор хэлэгдэнэгүй. Хэды тиигэбэшье олон толи соо энэ тусхай ойлгосо үнинэй тэмдэглэгдэнхэй.
Валежник хадаа газар дээрэ унаад хэбтэһэн модоной һалаа болоно. Ехэ саһанай ороходо гү, али шанга һалхинай буухада, хухарна ха юм. Мүн тиихэдэ ургажа байбашье, үндэһэн дээрээ хатаһан, үмхи байһан модон энэ ойлгосодо оруулагдана. Хуули бусаар модо отологшодой гү, али бусад хүн зоной “туһаар” унаһан модон тоологдохогүй.
Хуули бусаар модо отологшодто хамһабари гү?
Арадай Хуралай һунгамал Вячеслав Покацкий энээние ехэ буруушаагаа.
- Яагад хүн зон эгтээ ой модо руу орожо, валежник бэлдэхэ юм. Тэндэ хэнэйшье ороод, түймэр хэжэрхёо һаа, яаха болоноб? Заал һаа, ой модоной ажахыда ошожо, унаһан модо суглуулхам гэжэ мэдүүлгэ оруулха хэрэгтэй. Тиимэһээ хэн хаагуур ой соо ябанаб гэжэ мэдээтэй байха, - гэжэ Вячеслав Покацкий хэлээ.
Үшөө нэгэ һунгамал Игорь Бобковой тэмдэглэһээр, ой модо хулгайшад тэрэниие хэрэглэжэ, ой тайгын бүрин эрхэтэ эзэн болохонь гээшэ.
- Хуули бусаар модо отологшод бүхы ой модыемнай һандаргааба. Бараг модон ой соо үлөөгүй бшуу. Тиимэһээ энэ хуули абабал, бэрхэшээлтэ асуудал хэзээшье шиидхэжэ шадахагүйбди, - гэжэ Игорь Бобков һанамжаараа хубаалдаа.
Һунгамалнуудай мэдээсэһээр, түлеэ худалдадаг газарнууд Улаан-Үдэдэ олошорһоор. Тэндэ нойтон, һайн шэнжэтэй модонһоо бэлдэгдэһэн түлеэн наймаанда гарана.
- Юрын модо отологшод энээниие асараад худалдана гэжэ һанана гүт? Үгы ааб даа, тэдэниие ганса хулгайшад худалдана. Валежник тухай хуули баталагдабал, эдэн бүри олошорхо. Мүн сэнгынь тон ехээр дээшэлхэ, - гэжэ Игорь Бобков бүри шангарна.
Арсалдаанай нэгэ үедэ Марина Капустина хуули буруушаагшадые нэгэ бага дэмжээд абана.
- Үнэхөөрөө, зарим ой модо бэлдэгшэд һайн модонуудые валежник гэжэ нэрлээд, ой соо хүдэлжэшье болохо. Теэд хуули эбдэхэ тэдэ ёһогүй. Үшөө тиихэдэ Ород гүрэнэй дэбисхэр дээрэ 2 мянга гаран ниитын ой хамгаалагшад тоологдоно. Тэрэ тоодо 700 гаран иимэ хүн Буряадта ажалаа ябуулна. Тэдэ бүхы юумэ шалгажа байха, - гэжэ сайдай орлогшо Марина Капустина тэмдэглэнэ.
Бүхы арад зон бэлдэхэ аргатай болохонь
Жэмэс болон һархяаг суглуулһандал адли унаһан модо бүхы хүн зондо бэлдэхэ арга январиин 1-һээ олгогдохонь. Өөһэдөө эрхэтэд, можо, хизаарнуудай һунгамалнууд, ноёд сайд федеральна Засагай газарта энээн тухай арба гаран жэлэй хугасаа соо хандалгануудые, дансануудые эльгээжэ байгаа.
Һунгамал Александр Савельевэй хэлэһээр, ажаһуугшад энэ асуудал шиидхэхын түлөө нэгэтэ бэшэ хандаа.
- Ойдо унаһан модон юундэ үмхиржэ хэбтэдэг юм? Яахадаа бидэ тэрээниие абажа шадахагүйбибди? Иимэ асуудалнууд гараад ерэдэг һэн. Мүнөө болотор юрын зон тэрэ унашаһан модо миин абаха эрхэгүй байгаа бшуу, - гэжэ Александр Савельев хэлэнэ.
Арадай Хуралай Түрүүлэгшын орлогшо Цырен-Даша Доржиевай мэдээсэһээр, хүдөөгэй өөһэдын хэрэг эрхилэгшэд, фермернүүд хорёо хашаануудаа заһабарилха гэхэдэнь, даб гээд барилгын хэрэгсэлнүүд олдодоггүй һэн. Шэнэ хубилалтануудай ашаар нэгэ багашье модо суглуулха аргатай.
- Хүдөөгэйхид модо абахын түлөө аймагай түб 5-6 дахин ошожо, одоошье зүбшөөлгын саарһа данса абагша һэн. Олонхи хандагшад энэ хэрэгые хүсэд бүтээнгүй хаяжархидаг байгаа. Шэнэ Хуули энэ бэрхэшээлые усадхаха бэзэ гээд найдагдана, - гэжэ һунгамал Валерий Цыремпилов нэмэнэ.
Ойе хог шоройһоо сэбэрлэхэ гэһэн эгээл түрүүшын зорилго табигдана гээшэ. Унаад үжэжэ хэбтэһэн, хатаһан модон хүн зондошье, ан амитандашье ехэ һаад үзүүлнэ. Энээниие носоһон хүн хуулиин ёһоор урид зэмэлэгдэхэ байгаа. Мүн тиихэдэ ойн түймэрнүүд үсөөрхэ бэзэ гээд найдагдана. Юуб гэхэдэ, унаһан модон, хатаһан һалаанууд түймэрые бүри түргэдүүлнэ, ехээр һүжэрүүлнэ.
Модо бэлдэгшэд өөрын хубаариин газар сэбэрлэхэ ёһотой. Тэдэ хойноо хог үлээбэл, харюусаха баатай болоно. Тэдэнэй һүүлээр ямаршье хүн арилгаха эрхэгүй юм. Валежник тухай шэнэ Хуулида иимэ газарнууд оруулагдаагүй гээшэ.
Сайдай орлогшо Марина Капустинагай хэлэһээр, модо болбосоруулдаг болон үйлэдбэрилдэг ажахынуудые, модо худалдажа абагшадые валежник нэгэшье һонирхуулхагүй. Һайн ургажа байһан модон унаһан ба үбшэндэ нэрбэгдэһэн модонуудһаа эли ондоо юм. Мүн тиихэдэ эрхэтэд унаһан модо бэлдэхэеэ 100 гаран километр ой руу ябашахагүйл даа, нютагтаа дүтэхэнэ бага зэргэ суглуулна бэзэ.