Ивалгын дасанай дэргэдэ үнгэргэгдэдэг Бүгэдэ Буряадай һургуулинууд хоорондын “Эхэ хэлэн – манай баялиг” гэжэ заншалта наадамда үглөөгүүр эртэ ошожо ябаһаар, жолоо бариһан Зоригто ламаһаа иигэжэ асуубаб: “Хүн юунэй түлөө дэлхэй дээрэ ажаһуудаг бэ?”. Бодолгото болон, нюдөө забһарлаад, иимэ харюу намда үгэбэ: “ Хүн гээшэ элүүр мэндэ ябаха сагтаа хүн зондо болоод бүхы амитанда хододоо туһа хүргэхэ гэжэ оролдохо ёһотой.” Энэ үедэ гэдэргээ эрьелдэн харахадам, холын харгыһаа эсэһэн үхибүүд зөөлэн бүхэдэ диилдэн нойрсожо байба...
Зоригто лама Хори аймагай Баян-Гол нютагта 1981 оной апрелиин 23-да Баян, Марина Батуевтанай гэр бүлэдэ гурбан баатар хүбүүдэй ууганиинь боложо түрэһэн. Загарай аймагай суута түрүүлэгшэ Раднын Цыриторой зээ хүбүүн болодог. Эрдэм һуралсалай талаар ехэ нүлөө үзүүлһэн нагаса абаяа һанан хододоо ябадаг. Марина Цыреторовна эжынь гэр бүлэдөө арбан хүүгэдэй эгээ одхонь болодог, буряад хэлэнэй, түүхын багшаар ажаллаһан. Асагад һууринда нагаса абынь нэрэ мүнхэлжэ, Раднаевай гудамжа бии болоһон түүхэтэй. Абын талаһаа хүгшэн абань Ярууна аймагай Үльдэргэ тоонтотой. Баян Дашинимаевич абань бүхы наһаараа совхозой жолоошоноор ажаллаһан.
Һүзэг ехэтэй хүгшэн эжыһээ эхитэй
Бага балшар наһанһаа хойшо хүгшэн эжынгээ үглөө бүри бурхандаа тахил табижа, сэржэмээ үргэжэ байхые хараһан хүбүүнэй саашанхи наһанайнь зам эндэһээ эхитэй гэжэ тоолоходо болоно. Хурал, уншалгануудта дахуулжа ошодог һүзэг ехэтэй хүгшэн эжынь ашадаа буддын шажанай шанар шэнжэ шэнгүүлһэн. Үдын дунда һургуулиин юһэдэхи анги түгэсхэһэнэй һүүлээр, Анаа дасанай дэргэдэ гурба һарын дадалга тахилшанаар гараа. Зунай дүүрэхэдэ, Ивалгын дасанай Буддын шажанай ехэ һургуули орожо, табан жэл ном шудалһанай удаа, бэлиг талаантай Зоригто лама Энэдхэг ороной Дрепунг Гоман дасан ошожо, долоон жэлэй туршада гүн ухаа, түбэд хэлэ шудалаа. Шойро, сээжэ даабаринууд ехэнхи һуралсалай гол түлэб ажал болоно. Тэндэһээ Парчин Рабжан гэжэ нэрэ зэргэдэ хүртэжэ, 2007 ондо нютагаа бусаа. Энэ залитай, жаргалтай үе дурдан, Зоригто ламын гуурһан дороһоо иимэ мүрнүүд мүндэлһэн:
“Арбан юһэ наһандаа
Багшын адисай хүсэлөөр
Бурханай орон -
Энэдхэг хүрөөб.
Гоман алдарта дасанда
Гурбан эрдэниин хүсэлөөр
Долоон жэлэй туршада
Парчин шудалжа түгэсөөб...”
Ивалгын дасанда багшалаа. Буддын шажанай ехэ һургуулиин захиралай орлогшо ябаа. 2010 ондо Эрхүүгэй дасанда 5 жэлдэ зурхайша ламаар ажаллаа. 2015 ондо Бандида хамба лама Дамба Аюшеевэй захиралтаар Усть-Ордын дасанай шэрээтэ ламаар томилогдоо.
Эрхүүгэй зон этигэнэ
Эрхүү можын Усть-Ордын дасан Эхирэд-Булагадай аймагай түб Усть-Орда тосхоной урда зүгтэ оршодог. Тус дасан 1919 онһоо Эрхүү губерниин Алужино һууринай Муринай дуганһаа эхилһэн түүхэтэй. Энээнһээ урид 1912 ондо Кырмын дасан байһан гэжэ дурдалганууд дансаглагданхай. Аргагүй һайхан гурбан дабхар дасан байһан гэжэ наһажаал зон хэлсэдэг. Олон тоото эмшэ ламанар хүн зондо туһа хүргэдэг байһаниинь мэдээжэ. 1932 ондо мэдээжэ ушарнуудһаа боложо хаагдаһан, хүрэл бурханай дүрсэнүүд хайлуулагдаа, сэнтэй үнэтэй хэрэгсэлнүүд буляагдаа...
2005 ондо Усть-Орда тосхондо дасан бодхоохын тула газар үгтөө. “Түбдэн Даржелин” – “Буддын шажанай дэлгэрхэ орон” гэһэн нэрэтэй дасан нэн түрүүн Сахюусан дуганһаа, ламанарай хоёр гэрһээ шэнэ түүхэеэ эхилһэн. Энэ хадаа Владимир, Алексей Дмитриевүүдэй аргагүй ехэ туһаламжа доро эрхилэгдээ. 2010 ондо гурбан дабхар Согшон дуган, дарханай гэр, дүрбэн томо хүрдэ, “Жанчуб Сэмбэ” субарга бодхоогдоо. 2011 онда Бандида хамба лама Дамба Аюшеевэй хүтэлбэри доро рамнай бүтээгдээ.
Шэрээтэ ламаар томилогдоһоной һүүлээр олон хэрэгүүд бүтээгдээ, ажал урагшаа ябуулагдаа. Ехэ хуралнууд ёһоороо хурагдана, найман ламхайнар хүн зондо туһа хүргэжэ, табиһан асуудалнуудтань харюу үгэдэг, хэрэг ажалыень бүтээнэ. Гэрнүүдэй заһабари хэгдээ, дулаалагдаа, гороо тойродог харгы дэлгээгдээ, жаган баригдаа. Эрхүү хотодо дасанай таһаг үүдэеэ нээнхэй, хүн зониие угтан абадаг. Мүнөө Зоригто ламын урда дасанайнгаа хүгжөөлгын талаар олон зорилго түсэбүүд табигданхай - зулын гэр бариха, Согшон дуганай хушалта заһаха, буряад хэлэнэй хэшээл заалгын гэр эрхилхэ.
Дасанайнгаа ажал хэрэгһээ гадуур олониитын ажаябуулгануудта эдэбхитэйгээр хабаадалсажа, бүгэдэ зондо хүндэтэй болонхойень тэмдэглэмээр. Эрхүү можын Олониитын палатын гэшүүн болоһоной удаа хүн зоной харилсаа холбоо бэхижүүлгын ажал ябуулагдаа, дээдэ ба дунда һургуулинуудай оюутадаар уулзажа хөөрэлдөө, хэшээл эмхидхэдэг, гүрэнэй эмхи захиргаануудтай нягта холбожо, Шажантанай Соведэй гэшүүн болонхой. ОРКСЭ гэжэ хэшээлнүүдтэ туһаламжа болохо диск гаргагданхай. Энээн соо Буддын шажан, нүгэл буян, дэлхэй дээрэ шажанай нүлөө гэхэ мэтэ шухала мэдээсэлнүүд тухай тодорхойгоор хөөрэжэ үгэһэн юм.
Тойрог соо үнгэргэгдэдэг олон тоото үндэһэтэнэй заншалта хэмжээ ябуулгануудта эбээн тэдхэгшэ болодогыень мэдэдэгбди. Эрын гурбан наадан, һээр шаалган, Сагаалхын баярта болон бусадта бүхыгөөрөө оролсоно. Юундэб гэхэдэ, өөрынгөө хэлэ, соёл, түүхэ мэдэдэг, сахидаг зониие урмашуулха шухала. Олон залуушуул хэлэеэ алдажа байнхай, энэнь ехэ харамтай. Тоонто нютагтайгаа, уг изагууртаяа, элинсэг хулинсагтаяа нягта холбоотой байха ёһотойт гэжэ Зоригто лама хүн зондо ойлгуулхаяа оролдодог.
Һургуулиин үхибүүдэй Ивалгын дасанда үнгэргэгдэдэг буряад хэлэнэй наадамда ошоходонь туһа хүргэлсэдэг, ошохо ерэхэ унаа, поездын түлбэри, хонохо байра, хооллохо газар гэхэ мэтэһээ эхилээд, олон хэрэгүүдыемнай даажа абадаг. Бүхы юумэндэ тон харюусалгатайгаар, нягтаар хандадагынь эли.
Энээн тухай буряадай мэдээжэ сурбалжалагша, Алайр нютагһаа гарбалтай Александр Виссарионович Махачкеев иигэжэ хөөрөө: “Хэдэн жэлэй саана, Энэдхэг ороноор нүхэдөөрөө аяншалха сагтамнай манай бүлгэм ударидажа, Зоригто лама олон һайхан газараар ябуулһан, дэлгэрэнгыгээр, һонирхолтойгоор хөөрэжэ үгөө. Бусаха тээшээ поездын түлөө түлбэри абаха аргагүй байшообди, тэндэхи ноён арсажа, буруу зангаа оруулаа. Энэ ушарта Зоригто лама хүн зонтой харилсаха, хандаха, шиидэхэ зорилго, бүхы абьяас бэлигээ гаргаа. Ямаршье ушарта, ямаршье хүндэ хүндэтэйгөөр хандажа, өөрынгөө урдаа табиһан зорилгоһоо хадуурангүй ябажа шадаһаниинь юунһээшье сэнтэй. Энэ сагһаа хойшо саашанхи ажабайдалдань тохёолдохо элдэб зүйлнүүдые иимэл зүб аргаар шиидхэжэ, өөрынгөө урда табиһан хүсэлөө хододоо бэелүүлжэ шадаха гэжэ үнэншөөб”.
Хүн боложо түрэһэнһөө хойшо эжы, абын хүмүүжэл бүхы наһандаа хадуужа абанхай.
- Хүн зондо хододоо туһатай ябаха, алибаа асуудалаар хандахадань шиидхэлсэхэ, ойлгуулжа үгэхэ, тиихэдэш өөрын харгы арюун, сэбэр, уужам байха гэжэ гол шухала үгэнүүдые дурсан ябадагби, - гэжэ Зоригто лама хөөрэнэ. - Дүтын зон мэндэ элүүр, арад зомнай эбтэй эетэй, элинсэг хулинсагаа мартангүй, арадайнгаа баялиг гамнажа, саашанхи үенүүдтээ дамжуулжа, буряад-монгол арад зомнай дэлгэрэг лэ даа гэжэ хүсэнэб!”
Манай Оһын аймагай Үбэсын дунда һургуулиин үхибүүд жаргалтайнууд. Юундэб гэхэдэ, Зоригто ламын дали доро олон удаа Ивалгын дасан ошожо, буряад хэлэнэй наадамда хабаадахаһаа гадна, Буряад ороноймнай олон тоото һайхан газарнуудаар аяншалһан, элдэб һонирхолтой ушарнуудые шагнаһан.
...Ивалгын дасан руу тэгүүл-һэн харгыгаар ябаһаар байтараа, һурагшаднай һэрижэ, шагнаархахадамнай иимэ хөөрэлдөө эмхидхэжэ байбад:
- Хүн юунэй түлөө дэлхэй дээрэ ажамидардаг бэ?
- Хүн гээшэ амиды ябаха сагтаа хүн зондо болоод бусад амитанда хододоо туһа хүргэхэ гэжэ оролдохо ёһотой...
Энэл даа, манай уялга, ургажа ябаа улаан бургааһадта алтан дэлхэйн удха ёһо ойлгуулха. Саашадаа ажабайдалай үргэн харгы замынь хододоо уужам, арюун байг лэ гэжэ зальбарая.
Серафима БАЛДАНОВА
Эрхүү можо