Эдэ үдэрнүүдтэ нооһо ашаглалгын хэшээлнүүд Улаан-Үдэдэ үнгэржэ байна. Хожомынь иимэл хэшээлнүүд Буряадай аймагуудаар үргэлжэлхэ. Тус хэшээлнүүдэй дүнгүүдээр нооһоор хэгдэһэн бүтээлнүүдэй үзэсхэлэн дэлгэгдэхээр хараалагдана.
“Тэнгэриин бэшэг” гэһэн ниитэ эмхиинхид 2015 ондо нооһоной хэшээлнүүдые эмхидхэжэ, өөһэдөө һуража эхилһэн юм. Тэрэ эмхиин хүтэлбэрилэгшэ Маргарита Дамбаева нооһоор юумэ бүтээхэ гээшэ тиимэшье хүшэр бэшэ, харин ехэ һонирхолтой, ябууд хэхээр ажал гэжэ ойлгоһон байгаа. Монголдо ажаһуудаг уран зурагай багша Оросой Долгормаагай ажал хэрэгүүдтэйнь танилсаһаар “Нооһоной наада” эмхидхэхэ гэжэ үүсхэл гаргаһан. Энэ намар Улаан-Үдэдэ нооһоной нюусатай танилсуулагша багша Оросой Долгормаагай ажалнуудай үзэсхэлэн дэлгэгдээ һэн.
- Энэ хэмжээ ябуулга би өөрынгөө мүнгөөр үүсхээ һэм. Хүдөө ажахын болон эдеэ хоолой яаманда хандахадам, олондо мэдээсэлгын талаар туһалһан байна. Тэндэһээл эхилжэ, халуун дээрэнь нооһоной наадаяа үргэлжэлүүлхэ гэжэ шиидээбди, - гэжэ Маргарита Жаргаловна хөөрэнэ.
Маргарита Дамбаева
Һурагшад урматай
Хэшээл үнгэргэжэ байһан Оросой Долгормаа болон Бальжиням Базарваани хоёр Үбэр Монголдо 1000-аад хүнүүдтэ нооһоной нюуса ойлгуулжа үгэһэн байна. Харин һаяхана Буряадта үнгэргэһэн хэмжээндэнь 20 гаран зон хабаадана. Уласаймнай хаа-хаанаһаа нооһоор юумэ бүтээжэ һураха дуратайшуул суглараа. Үбэр Байгалай хизаарай Обоорой Адагһаа Бимбасуу Перфилова, Хэжэнгэ аймагһаа Ешигма Аюрова гэгшэд “Буряад үнэн” сониндо соносхол уншаад, зорижо ерээд, шэнэ эрдэм мэдэсэ абажа байһандаа угаа урматайнууд. - Хэшээл аяар 10 үдэрэй туршада үнгэрхэ. Оройдоол 4 мянган түхэриг түлөөд, эдыхэн хугасаада ехэ юумэндэ һураха аргатай байһандаа олзуурханаб даа, - гэжэ Ешигма Гармаевна тэмдэглэбэ.
Нооһон бүтээлнүүдые хэжэ һурана
Энэ һуралсал гарагшад нооһоор хэгдэһэн шаахай, бээлэй, малгай болон бусад хубсаһа бүтээжэ һураха юм. Эдэ бүгэдые худалдажа абахынгаа орондо, газаагаа хаяатай байһан нооһоор ябууд бүтээхэ онол аргануудта һурана. Хэншье бууза шанажа шадаха ха юм. Тэрээндэл адляар хүн бүхэн хониной нооһоор, арһаар юумэ бүтээжэ һураха ёһотой.
Бүдүүн нооһон хаягдана
Нооһоной үйлэдбэри эрхилдэг Буряад Уласай ори гансахан “Наран” ажахы энэ хэмжээндэ 100 килограмм сэбэр нооһо үгэһэн байна. Тиимэһээ энэ түсэл бэелүүлэгшэд Хүдөө ажахын болон эдеэ хоолой яамантай, “Наран” ажахытай суг ажаллаха тухай хэлсээ баталжа байна.
Буряад Улас дотор үсхэбэрилэгдэдэг хониной диилэнхи хубинь шэрүүн нооһотой хонид юм. Нарин нооһоор “Наран” ажахы үйлэдбэри эрхилдэг. Харин бүдүүн нооһо Хитад болон бусад хари гүрэнүүдһээ олзын хэрэг эрхилэгшэд тон бага сэнгээр худалдажа абана. Харин үсөөхэн малтай зон нооһоёо хогой газар руу хаяха баатай болоно. Жэшээнь, арбан хонитой айл нооһоёо тушааха гэжэ һэдэлгэ хэбэшье, тэрэнь ямаршье үрэгүй, гарзатай хэрэг болошоно. Зүгөөр иигээд гэртээ бэлэн аргаар тэрэ арбан хонинойнгоо нооһо сэбэрлээд, зөөри болгоходо зүйтэй. Иигэжэ хүдөө мал баридаг зондо хурдан, хүнгэн онол арга заажа үгэхэ гэһэн зорилго “Нооһоной наада” эмхидхэгшэд табижа, саашадаа энэ һуралсалаа үргэлжэлүүлхэ түсэбтэй.
Хэб зохёоно
Хониндо – хүшөө
Буряад зон хонинойнгоо нооһо үдэр бүриин байдалдаа хэрэглэжэ, бэеэ жэгнүүлэн ябаха ёһотой. Буддын заншалта Сангхын Сандан ламын хэлэһээр, нооһоной үйлэдбэри тон хэрэгтэй.
- Хонин гээшэ буряад зоной эхэ мэтэ байгаа бшуу. Дулаа үгэхэ, аргалха, эдеэлүүлхэ. Тиимэл хадань хониндоо хүшөө барихал байгаабди. Кабанск аймагта бодон гахайда хүшөө бодхоогоо. Тэрэнь буруу. Кабанск хадаа хаб загаһанай нютаг ха юм. Хабын аймаг гэжэ нэрлэхэл аад, тад буруугаар бодон гахайда ямаршье хабаагүй аймагта үшөө хүшөө барижа байгдана, - гэжэ Сандан лама мэдээсэбэ.
Эжыһээ басаганда дамжуулха эрдэм
Хониной нооһо хайшан гэжэ хэрэглэхэ тухай эрдэм хэр угһаа хойшо эжыһээ басагандаа дамжуулагдадаг байгаа. Монголдошье, Буряадташье хониной нооһо хэрэглэхэ заншал хододоо байгаа.
- Эжын дамжуулдаг эрдэм таанартаа дамжуулжа байгаа хадаа би таанарай эжы болоно гээшэб. Бидэндэ хэр угһаа нооһоной наада хэжэ, нооһоёо һэеылхэ, хэрэглэхэдээ, хонин тухай үреэлэй үгэнүүдые хэлэдэг һэн. Энэ нааданда ламанар ерэжэ, хүндэлэлөө мэдүүлдэг байгаа. Мүнөө үеын зон хониной нооһон онсо үнэртэй байдаг гэдэг, теэд тэрэ яаха юм, - гэжэ Долгормаа багша мэдүүлбэ.
Аргалай уняараар анхилһан малшанай бүлэдэ түрэһэн буряад монголшууд зунгаагай үнэртэ ядалдаха бэшэ ха юм даа. Зунгаагыень ехээр үгы хэһэн нооһоншье һэеылэгдэхэдэ болохогүй, хари гүрэнүүдэй заншалда орожо байнгүй, анхан үндэр сагай ёһоор, эдихэ, үмдэхэ аргаяа хаянгүй ябахал шухала хаш.
Буряадта заншал мартагдаагүй
Энэ үнгэржэ байһан “Нооһоной нааданда” Буряадтаа мэдээжэ болоһон зон, олзын хэрэг эрхилэгшэд, артистнар уригдаа. Тэдэнэртэ иигэжэ нооһоной шэдитэ арга саашадаа ажаябуулгадаа хэрэглэжэ байхыень энэ хэмжээ үүсхэгшэд һануулба бшуу.
Хяагта аймагай эрдэм һуралсалай таһагые даагша Светлана Лузанова 25 жэлэй туршада нооһоной үйлэдбэри дэлгэрүүлгын, нэбтэрүүлгын ажал ябуулаа. Үшөө дунда мэргэжэлэй һуралсалай эмхиин захиралаар ажаллаха үедөө, үнгэрһэн зуун жэлэй 80-яад онуудай үедэ залуу үетэниие нооһоор хубсаһа болон бусад зүйлнүүдые хэжэ һургуулдаг байгаа. Тэрэ сагта жэл бүри 60-аад эхэнэрые һургадаг байгаа. Мүн 120-ёод бүһэтэйшүүл болон бүхы һурагшадынь нооһоной ажалда амжалтатай дүршэн һураһан байха юм. Энээн тухай Светлана Очировна Нооһоной нааданда хабаадагшадта хөөрэбэ.
Залуушуул ехэ һонирхоно
Тиигэжэ 10 үдэрэй һуралсалай үедэ бүтээгдэһэн зүйлнүүдэй үзэсхэлэн дэлгэгдэхэ юм. Мүн июнь һара соо манай Буряад Улас дотор үнгэрхэ хони, ямаанай үзэсхэлэнэй үедэ энэ “Нооһоной наадан” гэжэ түсэл үргэнөөр харуулагдаха. Гэхэ зуура, мүнөө дээрээ энэ түсэл гүрэнэй талаһаа мүнгэн дэмжэлтэдэ хүртөөдүй байна.
Анна Огороднигой гэрэл зурагууд