Манай Санага нютаг Дондок Улзытуевай найруулһаар, “заяан холын аялга” Захааминай захань болодог. Сэнхир номин урасхалтай Сэхир аршаан ундатай, Табан уула һахюултай, Хамба лама Дамба Аюшеевэй баталһаар “Диваажанай орон” гэгдэһэн нютаг. Хэр угһаа хойшо талаан бэлигээрээ, ажалша солоороо суурхаһан зон эндэ ажаһуудаг. Энэ зон сооһоо арадтаа туһалха эрмэлзэлтэйгээр мэргэжэлээ мүлиһэн хүн тухай Буряадайнгаа арад түмэндэ дуулгахам.
Дайнай ветеран Бимба Гомбоевич болон юрын лэ ажалша, малша эхэнэр Жаргал Гомбоевна Бадмаевтанай үнэр баян бүлэдэ 1952 оной сентябриин 10-да хүбүүнэй түрэхэдэ, тэрэ хойноо үшөө найман дүүе дахуулха, ажалаараа бүхы Буряадтаа суурхаха гэжэ хэн ойлгохо һэм даа.
Александр хүбүүн 1967 ондо нютагтаа найман класс дүүргэһэнэйнгээ удаа, Михей Ербановай нэрэмжэтэ хүдөө ажахын техникумдэ малай эмшэнэй мэргэжэл шэлэжэ оробо. Дүрбэн жэл соо һуража, 1971 ондо дүүргээд, нютагтаа ажаллахаяа ерээ. Залуу мэргэжэлтэнтэй дүй дүршэлөөрөө хубаалдаха аха нүхэд олон байгаа. “Замым залажа үгэһэн аха нүхэдөө һайханаар дурсажа ябагшаб. Гончик Аюрович Аюров, Дмитрий Шоймполович Будаев, Сэрэн Бадмаевич Охинов – эдэ ахатан намайе дахуулжа, баян дүй дүршэлөөрөө хубаалдажа, зааха сагтань шангаханаар зааһан юм даа,” – гэжэ Александр Бимбаевич мүнөө хөөрэдэг.
Санагада малай эмшэнээр хүдэлхэ гээшэ бэрхэтэйхэн ажал юм даа. Санагын совхозой эзэлдэг газар ехэ, хэдэн голһоо бүридэдэг. Аймаг, улас соогоо эгээл олон эбэртэ бодо малтай гэжэ суурхадаг һэн. Мүн баһа үсөөн бэшэ адуу үсхэдэг байһан. Хонид үсөөншэгшье һаа, баһал ажалтай.
- Зэдын, Хуурлигай, Ута Нюрганай болон Санагынгаа голнуудые хабар, намартаа бултыень зубшажа, малдаа халдабарита үбшэнһөө аргалха ба һаргылхэ тарилга, үшөөшье олон тоото эмнэлгэ хэнэбди. Нэгэ ябахадаа, хахад һара ябажа дүүргэнэбди, – гэжэ Александр Бимбаевич хөөрэнэ. - Бүхы малшадай байрануудта ороһон гараһанаа тоолоходомнай, 520 модо болодог.
Тиихэдэ үмсын мал хараха гээшэ бүри ехэ ажал, айл бүхэндэ ябагдаха хэрэг гарана ха юм. Тиимэһээ Александр Бимбаевич ехэ оролдолго гаргажа, сэлеэн бүхэндэ “расколнуудые” барюулһан юм. Тиигээд шуһа абалга гү, али халдабарита үбшэнүүдһээ һэргылхэ тарилгануудые хэхэдэ амар болоо. Сэлеэнэй зон бүхы малаа нэгэ доро туужа асарна ха юм. Тиигэхынь тулада эртээнһээ зар тунхаг тараадаг. Харин тахяа, нохой, гахай, туулай мэтые нэгэ доро суглуулхагүйш. Мүн хэн нэгэнэй малай үбдэхэдэ, һүнишье болог, шамдахал хэрэгтэй.
Гэр бүлэ – түшэг тулгуури
Александр Бимбаевич зоотехник мэргэжэлтэй Светлана Раднаевна Шадароватай 1982 ондо айл бүлэ боложо, нэгэ басага, хоёр хүбүүдые түрэжэ, гарынь ганзагада, хүлынь дүрөөдэ хүргэжэ табяа.
Лариса басаганиинь нютагайнгаа Баяр Цыреновтэй ниилэжэ, хоёр басагатай болонхой, мүнөө Санагынгаа һургуулида багшална. Олег хүбүүниинь Буряадай ехэ һургуулиин тамирай факультет дүүргэһэнэйнгээ удаа “Хара морин” гэһэн командада олон жэл наадаа, мүнөө Пенсионно жасада хүдэлнэ. Бэлигтэ хүбүүниинь баһал малай эмшэнэй һургуули дүүргэжэ ерээд, баабайнгаа ажалые саашань халан абаха зорилготой байгаад, харамтайгаар үдэрэй гайда дайралдажа, хада гэртээ мордошоһон юм. Энэ ехэ сохилтодо орожо, үбдэгөө наншажа уйдабашье, Александр Бимбаевичтан бэеэ шангаар барижа, бэе бэеэ дүмэжэ, ажабайдалаа үргэлжэлүүлээ. Үри хүүгэд, аша гушанарайнгаа ерэхэдэ, халуун сайгаараа угтажа, мордоходонь, үреэлээрээ үдэшэжэ, ан-бунхан ажалаа хээд лэ, зондоо туһатай һуугша даа. Мүнөө хоёр зээ басагатай, хоёр аша басагатай, нэгэ гушатай үнэр баян, үндэр таабай юм.
Ородой Холбоото Уласай, Буряад Уласай, мүн аймагайнгаа олон тоото шагналнуудта хүртөөшье һаа, Александр Бимбаевич: “Эгээл ехэ шагнални - зоной хүндэ”, – гэжэ хэлэдэг. Зон соогоо “Шура доктор” гэһэн алдартай юм. Тиибэшье эгээл ехэ шагналнуудыень дурдая: 2001 ондо “Буряадай малай эрхим эмшэн”, 2007 ондо “Буряадай хүдөө ажахын габьяата ажалшан”, 2012 ондо “Захаамин аймагай хүндэтэ эрхэтэн” гэһэн нэрэ зэргэдэ хүртөө; 2013 ондо Ородой Холбоото Уласай Хүдөө ажахын яаманай баярай тэмдэг барюулагдаа, Ородой Холбоото Уласай ажалай ветеран.
2012 онһоо наһанайнгаа амаралтада гараашье һаа, Александр Бимбаевич үшөө зургаан жэл хүдэлөөд, мүнөөл ажалһаа болибо. Тиибэшье Шура доктортоо найдажа һурашаһан зон хандажал байдаг. Малай залуу эмшэд байгаашье һаа, хүдөө нютагуудта гэр байрын талаар тулюур, ажал хүндэ, харин салин бага гээд, хүдөөдэ ажаллаха дурагүйл даа.
Шэлэһэн мэргэжэлээ орхингүй, хэдышье хүндэ хүшэр дабаануудые һайхан сэдьхэлээрээ, хүсэл зорилгоороо, зондоо туһатайгаараа дабажа шадаһан “номын ёһоор ажал хэрэгээ бүтээдэг Шура доктор” гэһэн алдартай Александр Бимбаевичта саашадаашье хүүежэ, ханхинажа ябахыень хани халуунаар хүсэе.
Даниил НОХОРОВ
Санага, Захаамин аймаг