Олониитын мэдээжэ ажал ябуулагша, Ород Уласай соёлой габьяата хүдэлмэрилэгшэ, Буряадай арадай артист Г.-Н.Ц. Гунзыновай түрэһөөр 80 жэлэй ойдо зорюулан, “Буряад хэлэнэй үдэрнүүдэй” оршомдо түхэреэн шэрээ боложо үнгэрөө юм.
Үдэшые хүгжэм, дуунууд гоёор шэмэглээ. Буряадай оперо болон баледэй театрай дуушан Тогмит Танхаев ахатанаа дулааханаар дурсажа, һайхан дуугаа зорюулаа. Хүгжэмэй 8-дахи һургуулиинхид бэлигээ гэршэлбэ. 1-дэхи лицей-интернадай шабинар Л.Толстойн онтохоной найруулгаар зүжэг харуулаа.
Владимир Бухаевай хүтэлбэри доро “Амар сайн” ансамбль Г.-Н.Гунзыновай үгэ дээрэ “Нарата һайхан Буряадни” гэһэн дуу гүйсэдхэжэ, олониие баясуулба. Хэжэнгэ аймагай захиралай орлогшо И.И.Эрдынеева нютагайнгаа омогорхол хүбүүнэй нэрые дам саашань үргэхэбди гэжэ найдуулаа.
Гунзэн-Норбо Гунзыновичай аша басаган, багша мэргэжэлтэй Ханда Дамбиевна Гунзынова, Буряадай арадай эмшэн Галан Дамбиевич Гунзынов гэгшэд абга тухайгаа арюун дулаан үгэеэ зорюулаа.
“Буряад үнэн” сонин тухай “Мир-Бурятия” телеканалаар мэдээсэл дэлгэрүүлдэг байһан үе тухайнь “Байгал” сэтгүүлэй редактор Галина Дашеева дурсан хөөрэбэ. Буряад соёлой тугые наһан соогоо дээрэ үргэн, намилзуулан гараһан хүн олон һалбарита бэлигтэй байгаа. Соло, магтаалнуудые бэшэжэ, Буряад орон соогуураа зэдэлүүлээ. Ирагуу найрагша, уран зохёол эмхидхэгшэ байһан Даша-Жамса ахынгаа номые бэлдэжэ гаргуулһан байна.
Буряад соёлоо үргэхэ талаар хоморой зүдхэлтэн Гунзэн-Норбо Гунзыновичай номые хэблэн гаргаха хэрэгтэй гэһэн Галина Дашеевагай дурадхалые Ород Уласай соёлой габьяата хүдэлмэрилэгшэ, эрдэмэй кандидат Валентина Бабуева бүри мүһэн дэмжэбэ. Хөөрхэ нютагтань аха дүү Гунзыновуудай нэрэмжэтэ үйлсэ нээгээ һаа, һайн байгаа гээд Валентина Дамдиновна дурадхаа.
Иимэ дэмбэрэлтэ үүсхэлнүүд дэмжэлгэ абаха ёһотой гэжэ нютагай басаган, Үндэһэтэнэй номой сангай ахамад мэргэжэлтэн Рыгзема Батомункуевагай түгэсхэлдэнь тобшолон хэлэһэниинь угаа һайшаалтай.
Доржи-Ханда ТУРТУЕВА