1975 ондо техникумэй дипломтой залуухан Светланын Захаамин аймагай сүүдэй секретаряар ажалайнгаа намтар эхилһээрнь 19 жэл үнгэршэбэ. Шанга журамтай, нарин нягтаар, бушуу түргэн ажалаа бүтээдэг Светлана Шагдуровна 1998 ондо шүүхын сагдаагаар (приставээр) томилогдожо, бүхы хүсэ шадалаа, эрмэлзэл зоригоо аймагайнгаа Шүүхын сагдаагай федеральна албанай управлениин хүгжэлтэдэ зорюулаа.
Светлана Дашеева даалгагдаһан ажалаа үнэн сэхээр, тон харюусалгатайгаар дүүргэдэгээрээ суг хүдэлэгшэ нүхэдтөө жэшээ болодог, залуушуулда дүй дүршэлөө дамжуулдаг һайхан сэдьхэлтэй хүн лэ даа.
Хүн зоной, гүрэн ба эрхэтэнэй хоорондо элдэб янзын зүрилдөөнэй талаар сүүдэй шиидхэбэри дүүргүүлхын тула оньһон аргатай, дүй шадабаритай, эрхэтэндэ үгэеэ ойлгуулха дадалтай Светлана Шагдуровна аймагай приставүүдэй дундаһаа жэлһээ жэлдэ эгээл үндэр үрэ дүн харуулдаг. Ажалай ба гүйсэдхэхы заршам жэншэдгүйгөөр сахидаг, мэргэжэлэй дадалтай, хуулинуудые һайн мэдэхэ, сүүдэй шиидхэбэринүүдые саг соонь бэелүүлдэг, нютагаархидаа һайн таниха, харилсаа барисаатай байдаг хадаа, ажалаа урагшатайгаар бэелүүлдэг.
Жэшээнь, 2015 оной жэлэй дүнгүүдые харая: 3968 хэрэг шиидхэгдэжэ, 11146499 түхэригэй үри нэхэгдэн бусаагдаа. Гүрэндэ 870970 түхэригэй татабари оруулагдаа, 1667354 түхэригтэ яла түлэгдөө, 31 захиргаанай хуули эбдэгшэд сүүдтэ үгтөө. 2008 оной дүнгүүдээр, Захааминай приставүүд 1-дэхи һуури эзэлээ. Эндэ Светлана Шагдуровнагай үүргэ бага бэшэ.
Светлана Дашеева федеральна хуулинуудые, гуримшуулгын-хуули ёһоной шиидхэбэринүүдые зүбөөр хэрэглэжэ шададаг. 43 жэлэй туршада харюусалгата албандаа эрхим дүнгүүдые туйлаһан дээдэ эрдэмтэй бакалавр Светлана Шагдуровна олон шагналда хүртэһэн юм. Буряад Уласай Засагай газарай, Арадай Хуралай, Юстициин яаманай олон тоото грамотанууд, «Шүүхын сагдаагай федеральна албанай 10 жэл”, «Аша габьяатай байһанай түлөө», “Шүүхын сагдаагай федеральна албанай хүгжэлтэдэ хубита оруулһанай түлөө” болон бусад медальнууд бии. Шүүхын сагдаагай федеральна албанай ветеран болон хүндэтэ хүдэлмэрилэгшэ, дээдэ гарай юрист Светлана Шагдуровнагай гэрэл зураг Буряадай болон Россиин ФССП-эйн Хүндэлэлэй самбарта хүндэтэ һуурияа эзэлдэг.
Ажалдаа бэеэ үгэнги залиршагүй хүсэл зоригоороо, гайхамшагта үрэ дүнгүүдээрээ Светлана Дашеева хүн зоной хүндэлэлдэ хүртэнэ. Дундаршагүй хайрань нүхэд зоной, түрэл гаралай зүрхэ сэдьхэл татадаг. Халуун хүйтэниие, хатуу шэрүүниие үзэһэн Светлана Шагдуровна ямаршье хүнэй ядарал, зоболон тон дүтөөр ойлгожо, туһа дэмжэлгэ хүргэдэг. Наһанайнгаа нүхэр Анатолий Цыреновичтэй (сагһаан урид наһа бараһан) хүбүүн басаган хоёроо үргэжэ, дээдэ эрдэмдэ һургаа, гарынь ганзагада хүргөө. 6 аша зээнэрээ үргэлсэжэ, үнэр баян ажаһуудаг, баяр жаргалтай ёһотойл гуа сэсэн хатан лэ даа.
Жэгтэй һайхан сэдьхэлтнай
Жэбэр үгы туяаржа байг,
Залиршагүй хүсэлтнай
Зондоо зорюулгатай
Зол жаргалые дэбжээг!
Бадма БАЗАРОВА, Россиин габьяата багша, “Хүндэлэлэй Тэмдэг” орденой кавалер