​Шүлэг зохёожо урилдаба

Буряад хэлэнэй габшагай һарын эсэстэ И. Калашни­ковай нэрэмжэтэ номой санда “Сээжээр бэшэлгэ”, “Эрхим синквейн” гэһэн урил­даан үнгэрөө һэн.

Буряадай арадай ирагуу най­рагша Дулгар Доржиевагай шүлэгһөө абтаһан “Түрэлхи хэ­лэмнай-угаймнай захяа” гэһэн үгэнүүдээр нэрлэгдэһэн проект Буряад Уласай Засагай газарай грантда хүртэжэ, хоёр урилда­ан эмхидхэгдэһэн байгаа. Энэ нэрлэгдэһэн грантын талаар урилдаануудһаа гадна мэдээжэ уран зохёолшо Цыдып Цырен­доржиевай зохёохы ажал тухай библиографическа указатель гараһан байжа, энэ ном тухай Ка­лашниковай нэрэмжэтэ номой сангай хизаар ороноо шэнжэлгын таһагые даагша Любовь Гомбоева хөөрэжэ үгөө.

“Сээжээр бэшэлгэ” (изложе­ни) конкурсын 3-дахи һуурида Дугарма Санзаева, 2-дохи һуурида Ринчин-Ханда Гомбоева, харин 1-дэхи һуурида Баяндалай Ба­дагаров гэгшэд гаража, эрхимэй эрхим гэлсүүлжэ, диплом болон “Зам” этно-дэлгүүрэй 2000, 3000, 4000 түхэригэй шанда тус тустаа хүртэбэ.

И.Калашниковай нэрэмжэ­тэ номой сангай буряад хэлэнэй урилдаануудта олон жэлэй тур­шада ехэл эдэбхитэйгээр Влади­мир Бухаев хабаададаг. Тэрэ нё­дондо жэл 2-дохи һуури эзэлһэн, мүнөө жэл баһа һайн бэшэһэн байна гээд тэмдэглэлтэй.

Сентябрь һара соо “Верхнеудинск-Улаан-Үдэ: 95 жэл соо ни­ислэл хото” гэһэн видео-эссегэй конкурсдо Владимир Очирович илажа гараһан байгаа. Тиигэжэ Улаан-Үдэ тухай зохёоһон дууниинь клип болгожо буулгагдаһан байжа, энэ бүтээлынь номой сан­да сугларагшадай урда табигда­жа, булта анхаралтайгаар хужар­лан харабад.

Удаань “Эрхим синквейн” гэһэн богонихон шүлэг зохёо­хо урилдаанда хабаадагшадые шагналга эхилжэ, урмашуулгын бэлэгүүд түрүүн барюулагдаба. Эндэ тон залуу хабаадагшадай дунда Даши Шерхунаев ба үндэр наһатайшуулай дунда Михаил Очиров гэгшэд шалгарбад.

Энэ конкурсын 3-дахи һуурида Валерий Дабаев, 2-дохи һуурида Владимир Ранзаев, 1-дэхи һуурида Сэсэгма Гунтыпова гэгшэд илажа гарабад.

“Сээжэ бэшэлгэ” 2014 онһоо, харин “Эрхим синквейн” мүнөө жэл түрүүшынхиеэ эмхидхэгдээ, саашадаа заншалта болохоор ха­раалагдана.

Синквейнүүдтэй ном хэблэл­дэ тушаагдаад, һаядаа тэрэ “нара харахаяа” байна. Энэ ажалые тус номой сангай хизаар ороноо шэн­жэлгын таһагай ажалшад эмхид­хэжэ ябуулаа.