​Николай Очировай “Наһанай харгы” уряална

Угсаата сэсэн нүхэдөөрөө

Уяржа нэгэ дуулаһайб.

Нангин хэрэг бүтээлсэжэ,

Наһанай харгы гаталһайб.

Сагһаа урид “Парнастаа” мордоһон мэдээжэ багша, ирагуу найрагша Николай Очировай шүлэг дуунуудай “Наһанайм харгы” ном энэ намар нара хараа. Шэнэ номтой танилсалга, эдир зохёолшодой “Уран Дүшын ургыханууд” урилдаан ирагуу найрагшын тоонто Ёнгорбойдо үндэр хэмжээндэ үнгэрбэ.

Заха холын Захаамин аймагай уран зохёолшодой “Уран Дүшэ” нэгэдэл Буряадтаа үнинэй мэдээжэ. Үбгэн түрүү Бадма Шойдоков, Цыбикжап Найданов; түүнһээ удаа хурса гуурһа залгаһан Аюша Доноев, Фёдор Цыденжапов, Владимир Данжалов, Василий Аюшеев, Баир Гомбоев, Цырен-Дулма Очирова, Владимир Гомбоев, Александр Цыбиков; дундахи үедэ Хандажап Дампилова, Николай Очиров, Санжай-Ханда Дармаева, Михаил Доржиев, Сэнгэ Ринчинов, Таисия Мархаева, Сергей Дулмаев, Долгорма Шангаева-Тогмитова; залуушуулһаа илангаяа Амгалан Будаев Дарима Дулмаева хоёр илгаран гараа. Бүгэдэ Буряадтаа мэдээжэ Мэлс Самбуев, Галина Базаржапова-Дашеева, Николай Шабаев, Надежда Гармаева, Валерий Цыбиков гэгшэд ниислэл хотодо байгаашье һаа, “Уран Дүшэтэеэ” нягта холбоотой юм гэжэ тэмдэглэе.

“Уран Дүшэ” нэгэдэлэй гэшүүд ерээдүйгөө һанажа, нэгэдэлэйнгээ дэргэдэ эдир бэлигтэйшүүлэй “Уран Дүшын ургыханууд” бүлгэм байгуулһан юм. Тиигэжэ захааминайхид «уг таһалангүй», үеын үедэ уран гуурһаяа алдахагүй гэһэн нангин хэрэг бүтээгээ. Мүнөөшье Николай Очировай номой рамнайда “Уран Дүшын ургыханууд” гэжэ урилдаанай үнгэргэгдэһэниинь удхатай.

Николай Очировай зохёолнуудые уран уншалгаар түрүүлээ гэбэл, Мэлын Бимба Будаев шүлэгыень уншахаһаа гадна дуугынь дуулажа, түрүү һуури эзэлээ. Мүн олон хүүгэд уран шүлэгтэ дуратайгаа гэршэлээ.

Өөрын зохёолнуудаар Санагын Арюна Доржиева, Бортын Янжима Цыденжапова, Шара-Азаргын Айсана Батуева, Утаатын Арюна Уржанова Софья Будаева хоёр, Үлэнтын Нима Доржиев, Ехэ-Сахирай Ирина Буянтуева эрхимлээ.

Эдэ бэлигтэй бэрхэ үхибүүдтэ Николай Цыденовичэй гэр бүлын, аха дүүнэрэй бэлэг сэлэгүүд, аймагай болбосоролой таһагай болон шэнээр байгуулагдаһан Арадууд хоорондын соёл болон хэлэ хүгжөөлгын зүблэлэй грамотанууд, Баярай бэшэгүүд барюулагдаа.

Уран зохёолой энэ найрта Ёнгорбойн зон бүгэдөөрөө сугларжа, нютагайнгаа урдаа хараха багша, ирагуу найрагшын шэнэ номтой танилсаһаниинь һайшаалтай. Николай Цыденович багадаа үншэрөөшье һаа, Галина Цыденовна, Пётр Норбоевич эгэшэ хуряахайнгаа, Зоя Николаевна эгэшынгээ ашаар хүн боложо, хүлөө дүрөөдэжэ, ажабайдалай үргэн харгыда гаража, наһанайнгаа нүхэр Татьяна Бадмаевнатаяа гурбан бэрхэ хүбүүдые, арюун һайхан басага хүмүүжүүлһэниинь, мүнөө үрэ дүнгынь элеэр харагдаба.

Ёнгорбойн һургуулиин багша, “Уран Дүшэ” нэгэдэлэй гэшүүн Михаил Доржиев дэлгэрэнгы элидхэл хэхэдээ, һургуулиингаа “Булагай эхин” бүлгэмэй бэлигтэй хүүгэдые хабаадуулаа. Михаил Цыбикович ирагуу найрагшын зохёохы зам тухай хөөрэхэдөө, нэн түрүүн багшынь ажалай габьяае, “Булагай эхин” бүлгэмые байгуулһыень онсолон тэмдэглээ. Тиигээд уран зохёолойнь замые элирхэйлжэ, шэнэ номтойнь танилсуулхадаа, бэлигтэй хүүгэдые хабаадуулһаниинь һайшаалтай.

“Наһанай харгы” номой бүлэг бүхэндэ “Булагай эхинэй” бэлигтэйшүүлэй шүлэгүүдээ уранаар уншаһандань урматай байгаа.

Маргарита Жалсановагай гэрэл зурагууд