​​ХЭЛЭҺЭН ҮГЭДӨӨ ХҮРЭЖЭ ШАДАДАГ

Эрхим захирал, бэлигтэй хүтэлбэрилэгшэ, энэрхы эжы, нагаса эжы, найдамтай наhанай нүхэр, шэг шарайгаар hайхан эхэнэр. Эдэ үгэнүүд Улаан-Yдэ хотын 32-дохи hургуулиин захирал, Улаан-Yдэ хотын депутадуудай зүблэлэй һунгамал Татьяна Геннадьевна Ми­трофановада сэхэ хабаатай.

Татьяна Митрофанова 1970 ондо Эрхүү можын Зима хотодо түрэhэншье hаа, Загарай аймагай Онохой hууринда өөдөө болоhон юм. Аба эжынь, Геннадий Николае­вич, Светлана Ильинична Андреев­тэн, Онохойн лесокомбинадта бүхы наhаараа ажаллаhан намтартай. Андрей Геннадьевич Василий Ген­надьевич гэжэ хоёр дүү хүбүүдтэй. Тэдэнь хоюулаа сэрэгшэ мэргэ­жэлтэй, полковник нэрэ зэргэдэ хүртэнхэйнүүд юм.

Татьяна басаган hургуулидаа тон бэрхээр hурахаhаа гадна, хүгжэмэй hургуули эрхимээр түгэсэжэ, гита­ра, баяан дээрэ наадаха, дуу дуулаха шадабаритай болоhон. Гэр бүлэнь эбтэй эетэй, хүндэмүүшэ, дуулаха, хатарха дуратай hэн гэжэ нютага­архидынь мүнөөшье болотор хэл­сэдэг. Андреевтэн бүлын ансамбль эмхидхэжэ, элдэб янзын конкурсну­удта, тоглолтонуудта нэгэнтэ бэшэ хабаадаhан байха.

1987 ондо Татьяна Митрофанова Улаан-Yдын багшанарай училищида орожо, 1991 ондо «хүгжэмэй багша» гэhэн мэргэжэлтэй улаан диплом абаба. Энэл ондоо багшанарай дээдэ hургуулида гурбадахи курсын оюу­тан болоо.

«Эхин ангиин багша» гэhэн мэр­гэжэлтэй Татьяна Улаан-Yдын «Мед­вежонок» hургуули-сэсэрлигтэ во­жатаар ажалайнгаа зам эхилээ юм. Эрмэлзэл ехэтэй, ухаансар, hүбэлгэн байhыень сэсэрлигые даагша Л.П. Табунова обёоржо, уданшьегүй ме­тодистын тушаал дурадхаа. Шэнэ тушаалда Татьяна Митрофанова одоол шуналтайгаар орожо хүдэлөө. Элдэб hонин түсэлнүүдые, туршал­гануудые зохёожо, бэелүүлжэ ша­даа. Дүй дүршэлөө ганса Буряад орон соогоо бэшэ, Росси гүрэн до­тор дэлгэрүүлжэ, «Медвежонок» hургуули-сэсэрлиг олондо мэдээжэ болоhон байха.

2005 ондо Татьяна Геннадьев­на Железнодорожно аймагай арбан нэгэдэхи «Лучик» гэhэн хүүгэдэй сэсэрлигые даагшаар томилогдо­жо, амжалтатайгаар хүдэлөө. 2008 ондо түрэл болоhон «Медвежо­нок» hургуули-сэсэрлигтээ дааг­шаар бусажа ерэhэн юм. Байшанай заhабарилга, элдэб туршалгануудые, багшанарай, хүмүүжүүлэгшэдэй эр­дэм дээшэлүүлгын семинарнуудые, эрдэм шэнжэлэлгын хуралдаануу­дые, «Эврика» гэжэ болбосоролой түбтэй харилсаа гэхэ мэтэ олон-олон үйлэ хэрэгүүдые амжалтатайгаар бэелүүлжэ шадаа.

2012 ондо «Медвежонок» 32-дохи hургуули хоёр болбосоролой ком­плекс боложо нэгэдээд, Татьяна Ген­надьевна энэ ехэ комплексын захи­ралаар томилогдоо hэн. Мүнөөдэрэй тоогоор 2300 гаран hурагшад hурана. Юумэнhээ айхагүй, гэдэр­гээ сухарихагүй зантай Татьяна Ми­трофанова багшанараа нэгэдүүлжэ, урмашуулжа, hургуулиингаа нэрэ нилээд дээшэнь үргөө. 2016 ондо Росси гүрэнэй эгээ эрхим 500 hургуулинуудай тоодо ороhон юм. Зургаан жэлэй туршада 32-дохи hургуулида ехэ хубилалтанууд бо­лоо.

2016 ондо Москва хотодо «Һургуулиин захирал» гэжэ Росси гүрэнэй hургуулиин даргануудай конкурс үнгэрhэн юм. 67 нютаг мо­жын 346 захирал хабаадаа. Гушан лэ хүн финал хүрэтэр ошоо, тэдэнэй то­одо Татьяна Митрофанова финалда орожо, «Директор-наставник» номи­нацида илажа гараа.

2017 ондо hунгуулиин хорин зур­гаадахи тойрогоор hунгалтада хаба­адажа, Улаан-Yдэ хотын депутадуу­дай зүблэлэй hунгамал болоо.

Һүүлэй үедэ hурагшадай тоо оло­шоржо, нэгэ ангида 34-36 үхибүүд hурана. Һургуулиин захирал шэнэ байшан бариха асуудал түрэлхидөөр суг хамта hүүлшын хоёр жэл соо ши­идхэжэ байна. Хамаг хэрэгтэй данса­нуудые ёhо гурим соонь суглуулжа, Ородой Холбоото Уласай программа­да ороо. Хойто жэлhээ шэнэ байшан баригдажа эхилхэ гэжэ хараалагдан­хай юм.

Татьяна Геннадьевна нэмэлтэ һуралсалда ехэ анхаралаа табидаг. 32-дохи hургуули өөрын театртай, театрай мэргэжэлтэд үхибүүдые дуулажа, хатаржа, зүбөөр дуугаржа, зүжэгүүдтэ наадажа hургадаг. Эл­дэб янзын кружогууд, секцинүүд, факультативууд бии. Онсо анхара­лаа буряад хэлэ заалгада хандуул­даг. Хоёрдохи ангиhаа зургаадахи анги хүрэтэр хоёр бүлэгтэ хубааран, hурагшад буряад хэлэ үзэнэ. Буряад хэлэнэй кабинедүүд соо мүнөө сагай техникэ тодхогдонхой, хотын, Буря­ад Уласай багшанарай семинарнууд, эрдэмэй хуралдаанууд үнгэрдэг. Ар­баад жэлэй туршада энэ hургуулида буряад хэлэнэй габшагай hарын хэмжээнүүд үнгэргэгдэдэг.

Татьяна Митрофанова эрдэм болбосоролдо бэлиг ехэтэйгээр, аша габьяатайгаар хүдэлhэнэйнгээ түлөө «Гүрэнэй эрдэм болбосоролой хүндэтэ ажалшан» гэhэн нэрэ зэргэ­дэ хүртэнхэй.

Тэрэ баян гэр бүлэтэй. Сергей нүхэртэеэ гурбан үхибүүдтэй юм. Ирина гэжэ ехэ басаганиинь айл боложо, эжы абадаа хоёр зээ ба­сагадые бэлэглэнхэй. Константин хүбүүниинь Санкт-Петербург хотын Сэрэгэй эмшэдэй дээдэ hургуулида hурана, бага хүбүүн Дмитрий - най­мадахи ангиин hурагша юм.

Татьяна Геннадьевна Митрофа­новагай хэжэ байhан ехэ ажалынь үрэ дүнтэй, үшөө ехэ амжалтануу­дые туйлажа, нютаг ороноо суурху­улжа ябахань болтогой.